މިދިޔަ އަހަރުގެ ތެރޭގައި ކުޑަކުދިންނާއި ގުޅުންހުރި 1300 މައްސަލަ ހުށައެޅުނު: ޝިދާތާ

މިދިޔަ އަހަރުގެ ތެރޭގައި ކުޑަކުދިންނާއި ގުޅުންހުރި 1300 މައްސަލަ ޖެންޑަރ މިނިސްޓްރީއަށް ހުށައެޅިފައިވާކަމަށް ޖެންޑަރ މިނިސްޓަރ ޝިދާތާ ޝަރީފް ވިދާޅުވެއްޖެއެވެ.

މިނިސްޓަރ ޝިދާތާ މިހެން ވިދާޅުވީ މިނިސްޓްރީގެ މަސައްކަތްތަކާއި ގުޅޭގޮތުން ނޫސްވެރިންނާއި ބައްދަލުކުރައްވާ ވާހަކަފުޅު ދައްކަވަމުންނެވެ.

ޝިދާތާ ވިދާޅުވީ މިދިޔަ އަހަރު އެ މިނިސްޓްރީއަށް 2800 އަށް ވުރެ ގިނަ މައްސަލަ ހުށަހެޅިފައިވާ ކަމަށާއި އޭގެ ތެރެއިން 1300 މައްސަލައަކީ ކުޑަކުދިންނާ ގުޅޭ މައްސަލަަތައް ކަމަށެވެ. މި އަދަދުތައް މި އަހަރު އިތުރުވެެފައިވާކަން ފާހަގަކުރައްވާ މިނިސްޓަރ ވިދާޅުވީ މި އަހަރުގެ މިހާހިސާބަށް 2345 މައްސަލައެއް މިނިސްޓްރީއަށް ހުށަހަޅާފައިވާ ކަމަށެވެ. އަދި އެ މައްސަލަތަކުގެ ތެރެއިން 50 ޕަސެންޓަށް ވުރެ ގިނަ މައްސަލަތަކަކީ ކުޑަކުދިންނާއި ގުޅުންހުރި މައްސަލަތައްކަމަށްވެސް އެކަމަނާ ފާހަގަކުރެއްވިއެވެ.

ކުޑަކުދިންނާއި ގުޅުންހުރި ސިޔާސަތުތަކަށް އަލިއަަޅުއްވައި ވާހަކަފުޅު ދައްކަވަމުން މިނިސްޓަރ ވިދާޅުވީ އާންމު ސަގާފަތެއް ނޫންކަމުގައިވިޔަސް ކުޑަކުދިންނާއި ގުޅޭ ސިޔާސަތުތައް މި ސަރުކާރުން ހަދާއިރު ކުޑަކުދިންގެ ޚިޔާލުތައް ހޯދުމަށް ނިންމާފައިވާ ކަމަށެވެ.

ޝިދާތާ ވަނީ ރައީސް ސޯލިހުގެ ފުރަތަމަ ސަތޭކަ ދުވަހުގެ ތެރެއިން ޖެންޑަރ އެންޑް ސޯޝަލް ސާވިސަސްގެ ދާއިރާއިން ހޯދާފައިވާ ކާމިޔާބީތައްވެސް ހިއްސާކުރައްވާފައެވެ.

އެގޮތުން އައިޑީކާޑުގެ މުއްދަތު ހަމަވި ނަމަވެސް އާސަންދައިގެ ހިދުމަތް ލިބޭނޭ ގޮތަށް ހެދުމުގެ ވައުދާއި، ކުޑަކުދިންގެ ހައްގުތައް ރައްކާތެރި ކުރުމަށް އާ ގާނޫނެއް އުފެއްދުމުގެ ވައުދާއި އަދި ހާއްސަ އެހީއަށް ބޭނުންވާ ފަރާތްތަކަށް ތެރެޕީގެ ހިދުމަތް އާސަންދައިގެ ތެރެއިން ދިނުމުގެ ވައުދާއި އަދި ހާއްސަ އެހީއަށް ބޭނުންވާ ފަރާތްތަކަށް ވަޒީފާ ހޯދައިދިނުމުގެ ވައުދު ފުއްދާފައިވާކަން އެކަމަނާ ވަނީ ފާހަގަކުރައްވާފައެވެ.

ހަމައެހެންމެ ކުޑަކުދީންގެ ރައްކާތެރިކަން ކަށަވަރުކޮށްދިނުމަށްޓަކައި އަޅަންޖެހޭ އެންމެ މުހިންމު ފިޔަވަޅަކީ ހަރުދަނާ ގާނޫނެއް ފާސްކުރުންކަމަށްވެސް އެކަަމަނާ ވަނީ ފާހަގަކުރައްވާފައެވެ.