ނިމިދިޔަ ގައުމީ ޤުރުއާން މުބާރާތް ބޭއްވީ އަމާބުނީތީ ފަރަށް ދާ ހެން: ޑރ ޝަހީމް
ނިމިދިޔަ ގައުމީ ޤުރުއާން މުބާރާތް ބޭއްވި "އަމާ ބުނީތީ ފަރަށް ދާ" ގޮތަށްކަމަށް ކުރީގެ އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އެމަނިކުފާނު އެފަދައިން ވިދާޅުވެފައިވަނީ ފެންވަރު ދަށްކޮށް ގައުމީ ގުރުއާން މުބާރާތް ބޭއްވުމަށްފަހު ޔޫތު މިނިސްޓްރީއާއި އިސްލާމިކް މިނިސްޓްރީ ގުޅިގެން ރާއްޖެ ޓީވީ މެދުވެރިކޮށް ގައުމީ ފެންވަރުގެ ގުރުއާން މުބާރާތެއް ބޭއްވުމަށް އިއުލާނުކުރުމާއި ގުޅިގެން ނުރުހުން ފާޅުކުރައްވާ ކުރެއްވި ޓްވީޓެއްގައެވެ.
ޑރ ޝަހީމް ވަނީ ނިމިދިޔަ ގައުމީ ގުރުއާން މުބާރާތް ނަމަކަށް ބޭއްވުމަށްފަހު އެއަށްވުރެ ބޮޑު ގުރުއާން މުބާރާތެއް ޔޫތު މިނިސްޓްރީއާއި އިސްލާމިކް މިނިސްޓްރީ ގުޅިގެން ބާއްވަން ޖެހުނީ ކޮން ސަބަބަކާއި ހުރެތޯ ސުވާލު ކުރައްވާފައެވެ.
އަދި އެ ދެ ވުޒާރާ ގުޅިގެން އެ މުބާރާތް ރާއްޖެ ޓީވީ މެދުވެރިކޮށް ބާއްވާއިރު، ގުރުއާނާއި ބެހޭ ކަންކަން ކުރުމުގެ ޒިންމާ އޮތް ގުރުއާނާއި ބެހޭ މަރުކަޒު ކޮބައިތޯވެސް ޑރ ޝަހީމް އެއްސެވިއެވެ. އެފަދަ މުބާރާތެއް ބާއްވާއިރު ގުރުއާނާއި ބެހޭ މަރުކަޒު އެއްފަރާތް ކުރި ކުރުމަށް އެމަނިކުފާނު ވަނީ ފާޑުވިދާޅުވެފަ އެވެ.
އޭގެ އިތުރުން ޑރ ޝަހީމް ވިދާޅުވީ ގައުމީ ގުރުއާން މުބާރާތަކީ ގައުމީ ފެންވަރުގައި ބާއްވާ އެންމެ ބޮޑު ގުރުއާން މުބާރާތްކަމަށެވެ.
އެހެން ނަމަވެސް އެ މުބާރާތް ނަމެއްގައި ބޭއްވުމަށްފަހު އަލުން ސަރުކާރުގެ ދެ ވުޒާރާ ގުޅިގެން ރާއްޖެ ޓީވީ ދެމުވެރިކޮށް މުބާރާތެއް ބާއްވަން އިއުލާނު ކުރީ، ކުރިން ކުރި މަސައްކަތް ތަކުރާރު ކުރައްވަންތޯވެސް ޑރ ޝަހީމް ވަނީ އައްސަވާފަ އެވެ.
މީގެ ކުރިން ދައުލަތުގެ ވުޒާރާތަކުން ބާއްވާ މިފަދަ ބޮޑެތި ގައުމީ ފެންވަރުގެ މުބާރާތްތައް ދުރައް ދައްކަނީ ދައުލަތުގެ މީޑިއާ މެދުވެރިކޮށެވެ.
އެހެން ނަމަވެސް މި ގުރުއާން މުބާރާތުގެ މީޑީއާ ޕާޓުނަރެއްގެ ގޮތުގައި ރާއްޖެ ޓީވީ ހަމަޖައްސާފައިވާއިރު ދައުލަތުން ޚަރަދުކޮށްގެން ބާއްވާ މިފަދަ މުބާރާތެއް ދުރައް ދެއްކުމުގެ ކަންކަން ދައުލަތުގެ މީޑިއާއަށް ހަވާލުނުކުރި ސަބަބާއި ގުޅިގެންވެސް ފާޑުކިޔުންތައް ވަނީ އަމާޒުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
