މި ސަރުކާރުގައި ސިޔާސީ މަންފާ ކިޔާ އެއްޗެއް އޮވޭތޯ؟: ސައީދު
ރައީސުލްޖުމުހިރިއްޔާ އިބްރާހިމް މުހައްމަދު ޞާލިހްގެ ސަރުކާރުގައި "ސިޔާސީ މަންފާ ކިޔާ އެއްޗެއް" އޮވޭތޯ ސުވާލު ކުރައްވައި ޕީއެންސީގެ ނައިބު ރައީސް އަދި ރައްޔިތުން މަޖިލީހުގެ މާވަށު ދާއިރާގެ މެންބަރު މުހައްމަދު ސައީދު ފިނޭންސް މިނިސްޓަރު އިބްރާހިމް އަމީރަށް ފާޑުވިދާޅުވެއްޖެއެވެ.
ޖީއެސްޓީ ބޮޑުކުރުމާއި އެނޫންވެސް ގޮތްގޮތުން ސަރުކާރުން އަޅަމުންދާ އިގްތިސާދީ ފިޔަވަޅުތަކާއި ގުޅިގެން ސަރުކާރަށް އަމާޒުވަމުންދިޔަ ފާޑުކިޔުންތަކަށް ރައްދު ދެއްވައި މިނިސްޓަރު އަމީރު ކުރެއްވި ޓްވީޓެއްގައި އޭނާ ވަނީ، ރައީސް އިބްރާހިމް މުހައްމަދު ސޯލިހުގެ އިގްތިސާދީ ސިޔާސަތުގެ ސަބަބުން ދިވެހިރާއްޖޭގެ އިގްތިސާދު ކޯވިޑްގެ ކުރީގެ ހާލަތަށް ރުޖޫއަ ކުރެވިފައިވާކަމަށެވެ.
އިގްތިސާދީ ދަތި ހާލަތުން ގައުމު ސަލާމަތް ކުރުމަށް ރައީސް ސޯލިހު ކަންކަން ނިންމަވަނީ އެމަނިކުފާނަށް ލިބިވަޑައިގަންނަވާނެ ސިޔާސީ މަންފާއަށް ބެއްލެވުމެއްނެތި ކަމަށްވެސް އަމީރު ވިދާޅުވިއެވެ.
މިކަމާއި ގުޅިގެން ސައީދު ކުރެއްވި ޓްވީޓެއްގައިވަނީ ޖީއެސްޓީ ބޮޑުކުރުމުން ފައިދާ ވަނީ ކާކައްތޯ އާއި މިސަރުކާރުގައި ސިޔާސީ މަންފާ ކިޔާ އެއްޗެއްއޮވޭތޯ ސުވާލުކުރައްވާފައެވެ.
އަދި ރާއްޖެއިން ބޭރުގެ ކަމާބެހޭ ފަރާތްތަކުން ސަރުކާރު ޚަރަދު މާ ބޮޑުކަން ފާހަގަކޮށް ޚަރަދު ކުޑަކުރަން އަންގާފައިވަނިކޮށް ސަރުކާރު ޚަރަދަށް ޒިއްމާވާންޖެހޭ ޤާނޫނު މަޖިލިސް ބޭނުންކޮށް ތަޅުލާފައިވާކަމަަށް ވެސް އޭނާ ވިދާޅުވިއެވެ.
"އޭގެފަހުން ކޮމަންޑޫ ގޮނޑި ނަގަންވެސް ކުރީ ޗާޕު؟ނަގާ ލޯނު ވެސް ކުރީ ޑަބަލް؟" ސައީދު ވިދާޅުވެފައިވެއެވެ.
ޚަރަދަށް ޒިންމާވާ ޤާނޫނުގެ ބައެއް މާއްދާތަކަށް އަމަލުކުރުން ރައްޔިތުންގެ މަޖިލީހުން އިސްތިސްނާކޮށް، އޭގެ ފަހުން 2021 ވަނަ އަހަރުގެ ނިޔަލަށް 4 ބިލިއަން ރުފިޔާ ޗާޕުކުރިއެވެ. އެކަމާއި ގުޅިގެން ދޭތެރެ ދޭތެރެއިން ސައީދު އަންނަނީ ކަންބޮޑުވުން ފާޅުކުރައްވަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
