ރައީސް ޔާމީންގެ އިގްތިސާދީ މޮޑެލް ދުނިޔޭގެ ބައެއް ލީޑަރުން އެބަ ބޭނުން ކުރައްވާ: ސައީދު

އިދިކޮޅު ޕީޕީއެމް، ޕީއެންސީގެ ލީޑަރު އަދި ކުރީގެ ރައީސް ޔާމީންގެ އިގްތިސާދީ، ބައެއް މޮޑެލް ދުނިޔޭގެ ބައެއް ލީޑަރުން ބޭނުން ކުރައްވަމުންދާ ކަމަށް އެމަނިކުފާނުގެ ވެރިކަމުގައި އިކޮނޮމިކް މިނިސްޓަރުކަން ކުރެއްވި، މާވަށު ދާއިރާގެ މެންބަރު މުހައްމަދު ސައީދު ވިދާޅުވެއްޖެ އެވެ.

ކުރިއަށް އޮތް ރިޔާސީ އިންތިހާބަށް ތައްޔާރުވުމަށް، އިއްޔެއިން ފެށިގެން މާދަމާގެ ނިޔަލަށް ކުރިއަށް ގެންދާ "ހޯޕް ކޮންފަރެންސް" ގެ ރޭގެ ސެޝަންގައި ޕީއެންސީގެ ނައިބު ރައީސް ސައީދު ވަނީ ރައީސް ޔާމީންގެ ވެރިކަމުގައި  އެމަނިކުފާނު ގެންގުޅުއްވި ހަރުދަނާ އިގްތިސާދީ ސިޔާސަތު ތަކުގެ މައްޗަށް އަލިއަޅުއްވާލައްވާފައެވެ.

އެގޮތުން ރައީސް ޔާމީން މަޝްރޫއުތަކަށް ފައިސާ ހޯއްދެވި ގޮތާއި، މިނިވަން ބާޒާރުގެ ތެރެއިން ރާއްޖެއަށް ފްރީ ޓްރޭޑް ކުރެވޭނެ ފުރުސަތުތައް ފަހިކޮށްދެއްވި ކަމަށާ،  އަދި ބައިނަލްއަގުވާމީ ބޭންކިންގެ ހިދުމަތްތަކާއި، ގާނޫނީ އޮނިގަނޑަށް ބަދަލު ގެނައުމާއި، ދިވެހި ވިޔަފާރިއަށް ފަހި ސިޔާސަތުއް އެކުލަވާލައި، ޑޮލަރުގެ ބާޒާރު މެނޭޖުކުރުން، ބައިނަލްއަގުވާމީ ރޭޓިން ހިފެހެއްޓެވިކަން ފާހަގަކުރެއްވިއެވެ.

މީގެ އިތުރުން ވެސް، ދިވެހިރާއްޖޭގައި ފުރަތަމަ ފަހަރަށް އުފެއްދެވި ސޮވެރެއިން ޑިވެލޮޕްމަންޓް ފަންޑް ވެސް އުފެއްދެވީ އެމަނިކުފާނުކަން ފާހަގަކުރައްވައި ސައީދު ވިދާޅުވީ އެ ފަންޑުގައިވާ ފައިސާ ބޭރުދުނިޔޭގައި އިންވެސްޓް ކުރުމަށް ބޭރުގެ ފަރާތްތަކާއިވެސް މަޝްވަރާ ކުރެއްވި ކަމަށެވެ.

"މިއީ ދިވެހިރާއްޖެ، ސްވިޒަލެންޑް އަކަށް ވިއްޔާ ސްވިޒަލޭންޑް އަކަށް ވާ ގޮތަކީ، ދިވެހިރާއްޖެ ސިންގަޕޫރަކަށް ވިއްޔާ ސިންގަޕޫރަކަށް ވާގޮތަކީ، ދިވެހިރާއްޖެ ދިވެހިރާއްޖެ އަކަށް ވަންޏާވެސް ކުރިމަގުގައި ޒުވާނުންގެ އުއްމީދު ގުޅިފައި ހުރީ މި ކަހަލަ ލީޑަރަކާ. ކޮންކަހަލަ ލީޑަރަކާ. ރައީސް ޔާމީން ކަހަލަ ލީޑަރަކާ." ސައީދު ވިދާޅުވި އެވެ.

މިއާއެކު ސައީދު ވަނީ ރާއްޖޭގެ އިގްތިސާދު ދަށަށް ނުގޮސް އަބަދުވެސް ކުރިއެރުވުމުގެ ގޮތުން، ޚާއްސަ ސްޓްރެޓެޖިކް ޕްރޮޑަކްޓް ތަކުގައި ރައީސް ޔާމީން އިންވެސްޓް ކުރެއްވި ކަމަށެވެ.

"މިސާލަކަށް މަހާ ޖައްރާފް. ހަމައެކަނި ހިންގުމުގެ ނިޒާމަށް ގެނައި ބަދަލު. ދިވެހިރާއްޖެ ކެބިނެޓް ދެބަޔަކަށް ބަހާލައިގެން އިކޮނަމިކް ކައުންސިލް އަކާއި އުފެއްދެވީ. އަޅުގަނޑު ފަޚުރުވެރި ކަމާއި އެކު ދަންނަވާލާނަން، މި މޮޑެލް އޭރުގެ ރައީސް ޔާމީން އާއި ވާހަކަފުޅު ދެއްކެވި ބައެއް ދުނިޔޭގެ ލީޑަރުން، (މިއީ) މާ ބޮޑު ކޮށްލާފައި ދައްކާ ވާހަކައެއް ނޫން، މި މޮޑެލް އެބަ ޕްރެކްޓިސް ކުރައްވާ." ސައީދު ވިދާޅުވި އެވެ.