އާރުޑީސީގެ ތިޖޫރި ފަޅާލުމުގައި އިންތިގެ ބައިވެރިވުން އޮތްކަމަށް ބެލެވޭ: މޫކޭ

ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ) ގެ ތިޖޫރި ފަޅާލުމުގައި މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި)ގެ ބައިވެރިވުން އޮތް ކަމަށް ބެލެވޭކަމަށް އާރުޑީސީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ތުހުމަތު ކުރައްވައިފި އެވެ.

މޫކޭ މިފަދައިން ތުހުމަތު ކުރައްވާފައިވަނީ ޓްވިޓާގައި ދެބޭފުޅުންގެ މެދުގައި ބަދަލުކުރެވުނު ބަހުގެ ހަމަލާތަކެއްގަ އެވެ.

އެގޮތުން މޫކޭ އަކީ ސަރުކާރު ކުންފުންޏެއް ހިންގުމުގެ ޤާބިލުކަން ނެތް ފަރާތެއްގެ ގޮތުގައި އިންތި ވަނީ ސިފަކުރައްވާފަ އެވެ. އެގޮތުން އިންތި ވިދާޅުވީ އާރުޑީސީ އަކީ އެއް އަހަރުތެރޭ 3 ފަހަރު އެ ކުންފުނީގެ ތިޖޫރި ފަލާލާފައިވާ ކުންފުންޏެއް ކަމަށެވެ. އަދި އެކަން ކޮށްފައިވަނީ ކުންފުނީގެ ތެރެއިން ބަޔަކު ހިއްސާވެގެން ކަމަށެވެ.

"އެއް އަހަރު ތެރޭ 3 ފަހަރު ތިޖޫރީ ފަޅާލާފައިވާ ތަނެއް ތިޔަ އާރު.ޑީ.ސީ އަކީ. އެތެރެއިން ނޫން ގޮތަކަށް ނޫން އެކަން ވެސް ކޮށްފައިވާނީ"

މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި)

އިންތިގެ އެ ވާހަކަތަކަށް ރައްދުދެއްވާ މޫކޭ ވިދާޅުވީ އާރުޑީސީގެ ތިޖޫރި ފަޅާލުމުގެ ފަހަތުގައި އިންތި ހިމެނޭކަމަށް ބެލެވޭކަމަށެވެ. ތިޖޫރި ފަޅާލުމުގެ ހަޤީގަތް އެހާ ބޮޑަށް އެނގިވަޑައިގަންނަވާނީ އެކަމުގައި އުޅުއްވާފައިވާތީ ކަމަށް މޫކޭ ވިދާޅުވި އެވެ.

"ބެލެވެނީ އިންތިގެ ބައިވެރިވުމެއް އޮތް ކަމެއް ކަމަށް. އެހެންވެ ތިހާ ބޮޑަށް އެނގިލައްވާނީ"

އާރުޑީސީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ)

އެމްޑީޕީގެ ތެރޭގައި ދެ ރައީސުންނަށް ތާއީދު ކުރައްވާ މެމްބަރުންގެ މެދުގައި ދެ ފެކްޝަން އުފެދިފައިވާއިރު، އެ ދެ ފެކްޝަނުނުގެ މެމްބަރުން ގެންދަވަނީ އެއްބަޔަކު އަނެއް ބަޔަކަށް ވައްކަމާއި ކޮރަޕްޝަންގެ ބޮޑެތި ތުހުމަތުތަކެއް ކުރަމުންނެވެ.

އެމްޑީޕީގައި ތިއްބެވި ރައީސް މުޙައްމަދު ނަޝީދަށް ތާއީދު ކުރައްވާ މެމްބަރުން ގެންދަވަނީ ރައީސް ޞާލިހާއެކު ތިއްބެވި ބޭފުޅުންނަށް ވައްކަމާއި ކޮރަޕްޝަން ހިންގާކަމުގެ ތުހުމަތުތައް ކެނޑިނޭޅި ކުރައްވަމުންނެވެ. އަދި ރައީސް ޞާލިހަށް ދެވަނަ ދައުރެއް ނުދިނުމަށް ވަކާލާތު ކުރަމުންނެވެ.

އަނެއްކޮޅުން ރައީސް ޞާލިހަށް ތާއީދުކުރައްވާ މެމްބަރުން ވިދާޅުވީ މިހާ ދުވަހު ސަރުކާރު ރަނގަޅު ކުރުމަށްފަހު ރިޔާސީ ޕްރައިމަރީން ބަލިވި ހިސާބުން ސަރުކާރު ގޯސްކޮށް ފާޅުގައި ސަރުކާރަށް ދެކޮޅަށް ނިކުތީ ބަލި ގަބޫލު ނުކުރެވެމުން ކަމަށެވެ. އަދި ރައީސް ނަޝީދު ފަޅީގެ ބޭފުޅުން ސަރުކާރުގެ މަޤާމުތަކުގައި ތިބެގެން ސަރުކާރުގެ ސިޔާސަތުތައް ތަންފީޒުކުރުމަށް ހުރަސްއަޅަމުންދާކަމަށް އެ މެމްބަރުން ދަނީ ބުނަމުންނެވެ.