ސަރުކާރަށް މި ޑިމާންޑުކުރަނީ ކަނޑުން ގެއްލުނު ބަޔާއެކު އެކު ފޯޅަވަހި ވެސް ހޯދަން: ޑރ މުނައްވަރު
ސަރުކާރުން ދޫކޮށްލި ދެކުނުގެ ޚާއްސަ އިޤތިޞާދީ ކަނޑުގެ ސަރަހައްދާއި އެކު، ޒަމާނުއްސުރެ ރާއްޖޭގެ ބައެއްގެ ގޮތުގައި ދެކެމުންއައި ފޯޅަވަހި ހޯދުމުގެ މަސައްކަތް ފެށުމަށް ކުރީގެ ބަންޑާރަނައިބު ޑރ މުޙައްމަދު މުނައްވަރު ގޮވާލައްވައިފި އެވެ.
ޑރ މުނައްވަރު މިފަދައިން ވިދާޅުވެފައިވަނީ ކަނޑުވިއްކާލުމާއި ދެކޮޅު އިއްތިހާދުން ރޭ ކާނިވާ ސަރަހައްދުގައި ބޭއްވި "ބާނަ ބާނަ ތިއްބާ ތިޔަ ވިއްކާލީ ކަނޑު" ޖަލްސާގައި ވާހަކަދައްކަވަމުން ނެވެ.
ޑރ މުނައްވަރު ވިދާޅުވީ ކަނޑުގެ ސަރަހައްދުން ބައެއް ގެއްލިގެން ދިޔައީ ސަރުކާރުގެ އިހުމާލުންކަމުގައި ދެންނެވެން ނެތްކަމަށެވެ. އަދި މޮރިޝަސްއިން އިޓްލޮސްއަށް ހުށައެޅި މައްސަލަ އެ ކޯޓުގައޮ ހިންގައިގަތް ހިސާބުން ކަމާގުޅުންހުރި ފަރާތްތަކާއި މަޝްވަރާކުރުމަށް ޚުދު އެމަނިކުފާނު އިސްނަންގަވާ ސަރުކާރުގައި ދަންނަވާފައިވާނެ ކަމަށާއި، އެހެން ނަމަވެސް ސަރުކާރުން އެއްވެސް ވަރަކަށް މަޝްވަރާ ކުރައްވަން ޖެހޭ ފަރާތްތަކާއި މަޝްވަރާކޮށްފައި ނުވާކަމަށެވެ.
އެފަދަ ބޮޑު މައްސަލައެއްގައި ގޮތް ނިންމާއިރު، ރައްޔިތުންގެ މަޖިލީހާއި މަޝްވަރާކޮށް، ރައްޔިތުންގެ މަންދޫބުންގެ ބަހެއް ހޯދަން ޖެހޭނެކަމަށާއި، މި މައްސަލައިގައި އެފަދަ އެއްވެސް ކަމެއް ސަރުކާރުން ކޮށްފައި ނުވާކަން ޑރ މުނައްވަރު ވިދާޅުވި އެވެ.
އޭގެ އިތުރުން ޑރ މުނައްވަރު ވިދާޅުވީ މި މައްސަލައިގައި ރާއްޖޭގެ ފަރާތުން ވަކާލާތު ކުރެއްވި ފަރާތްތައް، ވަކާލާތުކުރެއްވީ ވެސް ރާއްޖޭގެ މަސްލަހަތު ހިމާޔަތް ކުރުމަށް ނޫންކަން އެމަނިކުފާނު ފާހަގަކުރެއްވި އެވެ.
އެއާއެކު ޑރ މުނައްވަރު ވިދާޅުވީ އިޓްލޮސްގެ އެ ނިންމުމަށްފަހު "ދެން ކުރެވޭނެ ކަމެއް ނެތޭ" ބުނުމަކީ ރައްޔިތުންނަށް އަމާޒުކޮށް ސަރުކާރުން ކުރާ ފުރައްސާރައެއް ކަމަށެވެ.
ރާއްޖޭގެ ހައްގުގައި އަދިވެސް ކުރެވިދާނެ އެތައް ކަމެއް އެބަހުރި ކަމަށާއި، މިހާރުން މިހާރަށް އެ މަސައްކަތް ފެށުމަށް ސަރުކާރަށް ޑިމާންޑުކުރައްވާކަމަށް ޑރ މުނައްވަރު ވިދާޅުވިއެވެ. އަދި އެ މަސައްކަތުގެ ތެރެއިން ފޯޅަވަހި ހޯދުމުގެ މަސައްކަތް ވެސް ފެށުމަށް އެމަނިކުފާނު ވަނީ ސަރުކާރަށް ގޮވާލައްވާފަ އެވެ.
"އެއީ އަޅުގަނޑުމެންގެ ޖަޒީރާތަކާއި ގުޅިފައި އޮތް، އެ ޒަމާނުގައި އަޅުގަނޑުމެންގެ މެޕްތަކުގައި އަޅުގަނޑުމެންގެ ބައެއްގެ ގޮތުގައި ކަނޑައަޅާ ދައްކާފައި އޮތްތަކެއް އަޅުގަނޑުމެންނަށް ލިބެން ޖެހޭނެ. އެހެންވީމަ ސަރުކާރަށް މި ފުރުސަތުގައި އަޅުގަނޑުމެންގެ ކަނޑުގެ ސަރަހައްދުން ދޫކޮށްލިވައި އަނބުރާ ހޯދުމަށް ދަންނަވާލުމާއެކު މި ގޮވާލަނީ އެތަންވެސް ހޯދަން މަސައްކަތްޕުޅު ކުރައްވާށޭ"
ކުރީގެ ބަންޑާރަނައިބު ޑރ މުނައްވަރު
ޑރ މުނައްވަރު އިތުރަށް ވިދާޅުވީ ކަނޑުގެ ސަރަހައްދުން ގެއްލުނުބައި އަނބުރާ ހޯދާނެ ގޮތެއް ސަރުކާރުގއި ތިއްބެވި ބޭފުޅުންނަށް އެނގިނުލައްވާކަމަށް ވާނަމަ، އެންމެ ރަނގަޅުވާނީ ގެއަށް ވަޑައިގަތުން ކަމަށެވެ.
އެހެން ނޫންކަމަށް ވާނަމަ، ރައްޔިތުން ނިކުމެ މި ސަރުކާރުގެ އިސްވެރިން ވެރިކަމުން ބާލާނެކަމަށް ޑރ މުނައްވަރު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
