ބިންވެރިޔާ ސްކީމްގެ ދަށުން ދޫކުރާ ގޯތި 6200 އަށް އިތުރުކުރުމަށް ނިންމައިފި

ބިންވެރިޔާ ސްކީމްގެ ދަށުން ދޫކުރާ ގޯތި މިހާރު 6200 އަށް އިތުރުކުރުމަށް ނިންމާފައިވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ބިންވެރިޔާ ސްކީމްގެ ދަށުން ގޯތި ލިބޭ ފަރާތްތަކުގެ ލިސްޓު އާންމުކުރަން ބޭއްވުނު ނޫސްވެރިންގެ ބައްދަލުވުމުގައި ޕްލޭނިންގ މިނިސްޓަރ އަސްލަމް ވިދާޅުވެފައިވަނީ ފުރަތަމަ ދޫކުރާނީ 5،000 ގޯތި ކަމަށެވެ. އެއީ ހުޅުމާލެ ދެވަނަ ފިޔަވަހިން 2000 ގޯއްޗާއި ގުޅީފަރާއި ގިރާވަރުފަޅުން 3000 ގޯއްޗެވެ.

އެހެންނަމަވެސް އިއްޔެ ހަވީރު ގުޅިފަޅު ބިންހިއްކުމުގެ މަޝްރޫޢު ފައްޓަވައިދެއްވައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވަނީ މި ސްކީމްގެ ދަށުން ދޫކުރާ ގޯތީގެ އަދަދު ޖުމްލަ 6200 އަށް އިތުރު ކުރުމަށް ނިންމާފައިވާ ކަމަށް އިއުލާންކުރައްވާފައެވެ.

އެގޮތުން މާލޭގެ ރައްޔިތުންނަށް، ބަންޑާރަ ގޯތި ދޫކުރުމަށް ކުރިޔަށް ގެންދާ ބިންވެރިޔާ ސްކީމުގެ މައުލޫމާތު ޙިއްޞާކުރައްވަމުން ރައީސުލްޖުމްހޫރިއްޔާ ވިދާޅުވީ، އިއްޔެ ފެށި ގުޅިފަޅު ބިންހިއްކުމުގެ މަޝްރޫޢުގެ ދަށުން، އިތުރު 150 ހެކްޓަރުގެ ބިން ހިއްކައި، ގުޅިފަޅުން މަދުވެގެން 2000 ގޯތި ދޫކުރުމަށް ނިންމާފައިވާ ކަމަށެވެ.

އަދި ގިރާވަރުފަޅު ހިއްކުމުގެ މަސައްކަތް މިހާރުވެސް ހިނގަމުންދާއިރު، މިހާރު އެފަޅުން 20 ހެކްޓަރުގެ ބިން ހިއްކިފައިވާ ކަމަށާއި، ސަރުކާރުން ނިންމާފައި ވަނީ ގިރާވަރުފަޅުންވެސް މަދުވެގެން 2000 ގޯތި ދޫކުރުމަށް ކަމުގައި އެމަނިކުފާނު ވިދާޅުވިއެވެ.

އަދި ހުޅުމާލެއިން 2200 ގޯތި ދޫކުރާއިރު، މިބުރުގައި ޖުމުލަ 6200 ގޯތި ދޫކުރުމަށް ނިންމާފައިވާ ކަމަށް ރައީސުލްޖުމްހޫރިއްޔާ އިއުލާން ކުރެއްވިއެވެ.

"މި ދެންނެވި ތިން މަޝްރޫޢުގެ ދަށުން، ބިންވެރިޔާ ސްކީމްގެ ދަށުން މި ބުރުގައި އެކު ޖުމްލަ 6200 ގޯތި ދޫކުރުމަށް މިހާރު އަޅުގަނޑުމެން ވަނީ ނިންމާފައި. މިއީ ކުރީ ދުވަހު މިނިސްޓަރ އަސްލަމް ވިދާޅުވި އަދަދަށްވުރެ ކުޑަ ތަންކޮޅެއް އަނެއްކާވެސް އިތުރު އަދަދެއް."

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް

މީގެ އިތުރުންވެސް އިތުރު ގޯތި ދޫކުރެވޭނެ ގޮތްތައް ބައްލަވަމުން އަންނަ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ބިންވެރިޔާގެ ލިސްޓު އާންމުުކުރަން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޕްލޭނިންގ މިނިސްޓަރ އަސްލަމް ވިދާޅުވެފައިވަނީ ބިންވެރިޔާ ސްކީމްގެ ދަށުން ގޯއްޗަށް ހުށައަޅައިފައިވަނީ 15،164 ފޯމު ކަމަށެވެ.

އޭގެ ތެރެއިން 12،794 ފޯމެއްގެ ޝަރުތު ހަމަވާ ކަމަށާއި އެއީ 19،857 މީހަކު ބައިވެރިވާ ފޯމް ކަމަށްވެސް އަސްލަމް ވިދާޅުވިއެވެ.