ޙައްލަކީ މަޖިލީހުގެ ރައީސާއި ނައިބު ރައީސް އިސްތިއުފާދެއްވުން: މެޖޯރިޓީ ލީޑަރު

މަޖިލީހުގައި އެޅުވިފައި އޮތް މަރުތަޅު ފިލުވާ މަޖިލީހުގެ މަސައްކަތްތައް އުސޫލާއި އެއްގޮތަށް ކުރިއަށް ގެންދިއުމަށް އޮތް ޙައްލަކީ އިތުބާރު ނެތްކަމަށް ގިނަ މެމްބަރުންތަކަކަށް ފެނިގެން، މަޤާމުތަކުން ވަކިކުރުމަށް ހުށައަޅާފައިވާ މަޖިލީހުގެ ރައީސާއި ނައިބު ރައީސް އިސްތިއުފާދެއްވުން ކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު މުޙައްމަދު އަސްލަމް ވިދާޅުވެއްޖެ އެވެ.

އަސްލަމް މިފަދައިން ވިދާޅުވެފައި ވަނީ އެމްޑީޕީގެ ޕާލަމެންޓްރީ ގުރޫޕުގެ ލީޑަރުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.

އަސްލަމް ވިދާޅުވީ މަޖިލީހުގެ ރައީސް އާއި ނައިބު ރައީސްގެ އިތުބާރު ނެތްކަމަށް ރައްޔިތުންގެ މަޖިލީހުގެ ގިނަ މެމްބަރުންތަކަކަށް ފެނިގެން، އެ ދެމީހުން މަޤާމުން ވަކިކުރުމަށް ހުށައަޅާފައިވާ ކަމަށެވެ.

އޭގެ އިތުރުން ވަކި ސިޔާސީ ޕާޓީއެއް ތަމްސީލުވާ ގޮތަށް މަޖިލީހަށް ހޮވުމުން، ދައުރު ނިމުމުގެ ކުރިން ޕާޓީ ބަދަލުކުރުމަކީ ގިނަ ބަޔަކު ބަލައިގަންނާނެ ކަމެއް ނޫން ކަމަށެވެ.

ދުނިޔޭގެ ޑިމޮކްރެޓިކް ގައުމުތަކުން ކަންކަން ކުރާ އުސޫލަށް ބަލާއިރު ވެސް ގިނަ މެމްބަރުންތަކަކަށް ރިޔާސަތަށް އިތުބާރު ނެތްކަމަށް ފެނިގެން މައްސަލަ ހުށައެޅުމުން، އަދި ނޯ ކޮންފިޑެންސް ވޯޓާއި ހަމަޔަށް ނުދަނީސް ވެސް އިސްތިއުފާ ދިނުމުގެ އުސޫލު ގެންގުޅޭކަމަށް އަސްލަމް ވިދާޅުވި އެވެ.

އެހެންކަމުން ރައްޔިތުންގެ މަޖިލީހުގެ މަސައްކަތްތައް މިހާރު ހުއްޓިފައިވާ އޮތް އޮތުމަށް ނިމުމެއް އަންނާނީ އިތުބާރު ނެތްކަމަށް ގިނަ މެމްބަރުންތަކަކަށް ފެނިގެން މައްސަލަ ހުށައަޅާފައިވާ މަޖިލީހުގެ ރައީސް އާއި ނައިބު ރައީސް އަމިއްލަފުޅަށް އިސްތިއުފާދެއްވާ މަޖިލީސް ހިންގޭނެ މަގު ފަހިކޮށްދީގެން ކަމަށް އަސްލަމް ވަނީ ވިދާޅުވެފަ އެވެ.

"މަޖިލީސް ކުރިއަށް ގެންދިއުމަށް އޮތް އެންމެ ފުރިހަމަ މަގަކީ މަޖިލީހުގެ ރައީސް އަދި ނައިބު ރައީސްކަމުގެ މަގާމުގައި މި ވަގުތު ތިއްބެވި ބޭފުޅުން އިތުބާރު ގެއްލިފައި ވާތީވެ މަޤާމުން ވަކިވެވަޑައިގަތުން، އަދި އިތުބާރު ނެތްކަމުގެ މައްސަލައިގައި ވެސް ވޯޓަށް ދިއުމުގެ ކުރީގައި ވެސް އަސްލު އެބޭފުޅުންނަށް އެ އިޚްތިޔާރު ލިބިގެންދޭ"

މުޙައްމަދު އަސްލަމް

އަސްލަމް ވިދާޅުވީ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ލާން ޖެހުނީ ވެސް މަޖިލީހުގެ މަސައްކަތްތަކަށް ހުރަސް އެޅޭގޮތަށް މަޖިލީސް ހިންގެވުމުގެ އިތުރުން މެމްބަރުންގެ އިމްތިޔާޒަށް އަރައިގަނެ، ހިތު ހުރިގޮތަކަށް މަޖިލީސް ހިންގަވަން ފެއްޓުމުން ކަމަށެވެ.

އެ މައްސަލަ މަޖިލީހަށް ހުށައެޅުމާއެކު، މަޖިލީހުގައި މަރުތަޅު އަޅުވައި މަޖިލީހުގެ މަސައްކަތްތައް ކުރިއަށް ގެންދިއުމަށް އިތުރު ހުރަސްތައް އަޅުއްވަމުން ގެންދިއުމަކީ ރައްޔިތުންގެ މަސްލަހަތަށް އަރައިގަތުން ކަމަށާއި، ރައްޔިތުންނަށް އެންމެ ބޮޑު ގޮތަކަށް ވާނީ އިތުރަށް މަޖިލީހުގެ ރިޔާސަތުގައި އިންނެވުމުގެ ބަދަލުގައި ނަޝީދު އިސްތިއުފާދެއްވުން ކަމަށް އަސްލަމް ވިދާޅުވި އެވެ.