ރައީސް ނަޝީދު މަސައްކަތް ކުރަނީ ވީހާ ވެސް ގިނަ ދުވަހު މަޤާމުގައި ދެމިހުރުމަށް: އަސްލަމް

ރައްޔިތުންގެ މަޖިލީހުގެ ގިނަ މެމްބަރުންތަކަކަށް މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމަށް ޤަބޫލުކުރެވޭތީ މައްސަލަ ހުށައެޅުއްވި ނަމަވެސް، އެކަން ކުރިއަށް ގެންދެވުމަށް ހުރަސް އަޅުއްވަމުން ގެންދަވަނީ މަޤާމުގައި ގިނަ ދުވަހު ހުންނެވުމަށް ކަމަށް އެމްޑީޕީ ޕާލަމެންޓްރީ ގުރޫޕުގެ ލީޑަރު މުޙައްމަދު އަސްލަމް ވިދާޅުވެއްޖެ އެވެ.

އަސްލަމް މިފަދައިން ވިދާޅުވެފައި ވަނީ މަޖިލީހުގެ މަސައްކަތްތައް ހުއްޓިފައި އޮތުމުން، އެމްޑީޕީގެ ޕާލަމެންޓްރީ ގުރޫޕުގެ ކަންބޮޑުވުންތައް މީޑިއާއާއި ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.

އަސްލަމް ވިދާޅުވީ މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ އެއްވަގުތެއްގައި ހުށަނޭޅޭނެކަމަށް ވިދާޅުވެ ނަޝީދު ދައްކަވަނީ މުޅިން ހަގީގަތާއި ޚިލާފު ވާހަކަތަކެއް ކަމަށެވެ.

އެގޮތުން 18 ވަނަ ރައްޔިތުންގެ މަޖިލީހުގައި ވެސް ރައީސާއި ނައިބު ރައީސްގެ މައްސަލަ އެއްވަގުތެއްގައި ހުށައެޅިގެން ދިޔަކަން ފާހަގަކުރައްވާއިރު، އެ ދެ މައްސަލަ ހުށައެޅިފައި އޮއްވާ މަޖިލީހުގެ ގަވައިދަށް ގެންނަން ބޭނުންވި އިސްލާހުތައް ގެނައުމުގެ ފުރުސަތު ރިޔާސަތުން ފަހިކޮށްދީފައިވާކަމަށް އަސްލަމް ވިދާޅުވި އެވެ.

"މަސީހުއާއި މޫސާ މަނިކުގެ މައްސަލަ އެއްކޮށް އޮވެފަ، އެއް މައްސަލަ ނެގީއޭ. އޭ ރަނގަޅު ވާހަކައެއް ނޫން. މޫސާމަނިކު މަސީހުގެ މައްސަލަ ޗެއާ ކުރެއްވީ އެމަނިކުފާނުގެ މައްސަަލަވެސް ޗެއާ ކުރެވިފައި ވަނިކޮށް. އަދި އޭގެ ފަހުން ޤަވައިދަށް ގެނެވުނު ބަދަލެއްގެ ތެރެއިން އެ މައްސަލަ އުވިދިޔައީ... ވަރަށް ބޮޑަށް ގޯސްކޮށް މަޖިލީސް ހިންގިކަމަށް ފެނުނު އަބްދުالله މަސީހުގެ ރިޔާސަތުގައި ވެސް މަޖިލީހުގެ ޤަވައިދަށް ގެންނަވަން ޖެހޭ ބަދަލެއް ގެންނެވުމަށް ފަހު މަޖިލީހުގެ ގަވައިދު އެބިއުސް ނުކުރައްވާ ގެންދެވޭތޯ ވަރަށް ބޮޑަށް މަސައްކަތް ކުރެއްވި"

މެޖޯރިޓީ ލީޑަރު އަސްލަމް

އެކަން ފާހަގަކުރައްވާ އަސްލަމް ވިދާޅުވީ ނަޝީދު ރިޔާސަތުގައި އިންނަވައިގެން ވަރަށް ބޮޑަށް މަޖިލީހުގެ ގަވައިދާއި ޚިލާފަށް ކަންކަން ކުރައްވަމުން ގެންދަވާކަން ފާހަގަކުރެވޭ ކަމަށެވެ. އަދި މަގާމުގެ ނާޖާއިސް ފައިދާ ނެގުމަށް މަސައްކަތް ކުރައްވަމުން ގެންދަވާ ކަމަށެވެ.

ބެލެވޭގޮތުގައި އެމަނިކުފާނު މަޖިލީހުގެ ގަވައިދަށް ބެއްލެވުމެއް ނެތި ކަންކަން ކުރައްވަމުން ގެންދަވަނީ މަޤާމުގައި ގިނަ ދުވަހު ހުރުމަށްކަމަށް އަސްލަމް ވިދާޅުވި އެވެ.

"އަޅުގަނޑުމެންނަށް މިހާރު މި ފާހަގަކުރެވެނީ މަޤާމުގައި ދެމިހުންނަން ވެގެން މި ކަންކަން ކުރިއަށް ނުގެންދަވާތަން. ކުރިން ލަފާކުރެވުނީ އާއިލީ ބޭފުޅަށް ވާތީ މަޖިލީހުގެ ނައިބު ރައީސްގެ މައްސަލަ ޗެއާ ކުރައްވަން ދަތިފުޅުވަނީ ކަމަށް"

މެޖޯރިޓީ ލީޑަރު އަސްލަމް

އަސްލަމް ވިދާޅުވީ މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ އެއްވަގުތެއްގައި ކުރިއަށް ގެންދެވޭނެ ގޮތަށް ޤަވައިދު އިސްލާހުކުރުމަށް މަޖިލީހަށް ހުށައަޅާފައި ވީ ނަމަވެސް އެކަން ވެސް ކުރިއަށް ނުގެންދަވާ މަޖިލީސް ހުއްޓުވާފައި އޮތް ކަމަށެވެ.

މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ މަޖިލީހަށް ހުށައެޅީ ބޮޑު އަގުލަބިއްޔަތެއްގެ މެމްބަރުންގެ ތާއީދާއި އެކުގައި ކަމަށާއި، އެ މެމްބަރުންގެ ނިންމެވުމުގައި ވެސް ކޮންމްވެސް ބުރަދަނެއް އޮންނަން ވާނެކަމަށް އަސްލަމް ވިދާޅުވި އެވެ.

އެއާއެކު އޭނާ ވަނީ މަޖިލީހުގެ ގަވައިދާއި އެއްގޮތަށް މަޖިލީސް ކުރިއަށް ގެންދެވުމަށް ނަޝީދު އުޒުރުވެރިވާނަމަ، މަޤާމުން އިސްތިއފާދެއްވުމަށް އެދިވަޑައިގަންނަވާފަ އެވެ.