600 އަހަރުވެފައިވާ މިސްކިތެއް ބިނާ ކޮށްފައިވަނީ ފައްޅިއެއްގެ މަތީގައި ތޯ ބަލަން ސާވޭ ކުރަން ހުއްދަދީފި

600 އަހަރުވެފައިވާ މިސްކިތެއް ބިނާ ކޮށްފައިވަނީ ފައްޅިއެއްގެ މަތީގައިތޯ ބެލުމަށް ސާވޭ އެއް ކުރުމަށް ސާވޭ ޓީމަކަށް އިންޑިޔާގެ ކޯޓަކުން ހުއްދަދީފިއެވެ.

އިންޑިޔާގެ ވަރަނާސީ ޑިސްޓްރިކްޓްގައި ހުންނަ 17 ގަރުނުވެފައިވާ ގިޔާންވާޕީ މިސްކިތް ބިނާ ކޮށްފައިވަނީ ފައްޅިއެއްގެ މަތީގައި ބެލުމަށް ސާވޭ ހެދުމަށް ހުއްދަ ދީފައިވަނީ އިންޑިޔާގެ އަލާހްބާދްގެ ހައި ކޯޓުންނެވެ. އިންޑިޔާގެ ޤާނޫނު ހަދާ މަޖިލީހުގައި ވަރަނާސީ ޑިސްޓްރިކް ތަމްސީލް ކުރަނީ އިންޑިޔާގެ ބޮޑުވަޒީރު ނަރެންދްރަ މޯދީގެ ޕާޓީއިންނެވެ.

ގިޔާންވާޕީ މިސްކިތް ބިނާ ކޮށްފައިވަނީ ފައްޅިއެއް ތަޅާލައި އޭގެ މަތީގައި ކަމަށް ބުނެފައިވަނީ އިންޑިޔާގެ ކަނާތުފިޔައިގެ ހިންދޫންގެ ޖަމާޢަތަކުންނެވެ. އަދި އެޖަމާޢަތުން ބުނެފައިވަނީ އިންޑިޔާގައި ވެރިކަން ކުރި މުގަލުންގެ ދުވަސްވަރު އެތަނުގައި ބިނާ ކޮށްފައިހުރި ފައްޅިއެއް ތަޅާލައި އޭގެ މަތީގައި ކަމަށެވެ.

ހިންދޫންގެ ޖަމާޢަތް ތަމްސީލުކުރާ ވަކީލު ވިޝްނޫ ޝަންކަރު ޖެއިން ބުނެފައިވަނީ އަލާހްބާދުގެ ހައިކޯޓުން ޢިމާރާތައް ގެއްލުން ނުވާނޭހެން  އެމިސްކިތުގެ އާކިޔޮލޮޖިކަލް ސާވޭ އެއް ހެދުމަށް ހުއްދަ ދީފައިވާކަމަށެވެ.

މިކަމާއި ދެކޮޅު ހަދަމުންދާ މުސްލިމުންގެ ގްރޫޕަކުން ބުނެފައިވަނީ މިކަމަކީ އެކަމުގެ ސަބަބުން މިސްކިތުގެ ޢިމާރާތައް ގެއްލުންތަކެއް ވެގެންދާނޭ ކަމެއް ކަމަށެވެ.

މިކަމާއި ދެކޮޅަށް މަސައްކަތްކުރާ މުސްލިމް ގްރޫޕްގެ ފަރާތުން ވާހަކަދެއްކި ޚާލިދް ރަޝީދު ބުނެފައިވަނީ އަލާހްބާދުގެ ހައިކޯޓުގެ ނިންމުން އިސްތިއުނާފު ކުރުމަށް ސްޕްރީމް ކޯޓަށް ހުށައަޅައިފައިވާ ކަމަށެވެ.

"އުންމީދުކުރަނީ މިމައްސަލައިގައި މުސްލިމުންނަށް އިންސާފު ލިބޭނެކަމަށް، އެމިސްކިތުގައި މުސްލިމުން ނަމާދުކުރަމުން ގެންދާތާ 600 އަހަރަށްވުރެ ގިނަވެގެން މިދަނީ" ޚާލިދު މީޑިއާތަކަށް ބުނެފައިވެއެވެ.

ގިޔާންވާޕީ މިސްކިތުގައި ސާވޭގެ މަސައްކަތް މިދިޔަ މަހު ފަށައިފައިވެއެވެ. ނަމަވެސް ސްޕްރީމް ކޯޓަށް އެމައްސަލަ ހުށައަޅައިފައިވާތީ އެމަސައްކަތް ވަނީ ހުއްޓާލައިފައެވެ.