ފޮނަދޫގައި ސިޓީ ހޮޓާހެދުން ގައުމީ ސަލަމާތަށް އޮތް ނުރައްކަލެއް؟

ހުކުރު ދުވަހުގެރޭ ބޭއްވި އެމްޑީޕީގެ މާލޭގެ ބޮޑު ޖަލްސާގައި ރައީސް އިބްރާހީމް މުހައްމަދު ސާލިހް އެމަނިކުފާނު ދެން އަންނަ ރިޔާސީ ދައުރަކަށް ރައްޔިތުން ހޮވައިފިނަމަ ހިންގަވާނެ ވަރަށް ބޮޑު މަޝްރޫއެއް އިއުލާން ކުރެއްވިއެވެ. އެމަޝްރޫއު އިއުލާން ކުރައްވަމުން ވިދާޅުވީ އެއީ މެނިފެސްޓޯ އިއުލާން ކުރިއިރު ކަސިޔާރުވެފައިވާ އެކަމަކު މިހާރު އެމަނިކުފާނު ވާހަކަދައްކަވައި ހިންގަވަން ނިންމަވާފައިވާ ބޮޑު ޕްރޮޖެކްޓެއް ކަމަށެވެ. އެ ޕްރޮޖެކްޓަކީ މާލޭގެ މޫނުމަތީގައިވާ ރާއްޖޭގެ ގައުމީ ތެޔޮ ރިޒާވް ރައްކާކުރެވިފައިވާ ފޮނުދޫގައި ބޮޑު ކޮންވެންޝަން ސެންޓަރަކާއެކު ހޮޓަލެއް އެމަނިކުފާނުގެ ދެވަނަ ދައުރުގައި އެޅުއްވުމެވެ. އެކަން ކުރުމަށް ފައިސާ ހަމަޖައްސައިދޭން ގައުމަކުން އެއްބަސްވެފައިވާކަމަށްވެސް ވިދާޅުވިއެވެ.

ފޮނަދޫގައި ހިންގުމަށް ރައީސް ސާލިހް މިއިއުލާން ކުރެއްވި ޕްރޮޖެކްޓާއިމެދު ފުންކޮށް ވިސްނައި ގައުމީ ސަލާމަތާގުޅޭ ނަޒަރަކުން ކަޅިއެއް ހިންގައިލަން ޖެހިއްޖެއެވެ. އެތައް ޒަމާނެއް ވަންދެން އެރަށް ދިވެހި ސަރުކާރުގެ ކޮންޓްރޯލްގެ ދަށުގައި ރިސޯޓް ނުހަދައި ސިޓީ ހޮޓާ ނާޅައި ބާއްވަންވީ ކީއްވެގެންހެއްޔެވެ. ތެދުފުޅެކެވެ. ކުރީ ޒަމާނުގައި އެރަށަކީ މާލޭގެ ކޮންމެވެސް ބޭފުޅަކަށް ސަރުކާރުން ދެއްވާފައި އޮންނަ ފަޅު ރަށެކެވެ. ހުޅުލެވެސް އެގޮތަށް މާލޭގެ ބޭފުޅަކަށް ދެއްވާފައި އޮވެއެވެ. އެކަމަކު ދިވެހި ގައުމުގެ ޒަމާނީ އަސްކަރިއްޔާއެއް އުފެދި ގައުމީ ސަލާމަތާއިގުޅޭ ސްޓްރެޓަޖީތައް އެކަށައަޅަން ފެށީއްސުރެ ފޮނަދޫ އޮންނަނީ ގައުމީ ސަލާމަތަށްޓަކައި ދިވެހި އަސްކަރިއްޔާގެ ރާޑަރުތެރޭގައެވެ. އެސްޓީއޯއިން ޜާއްޖޭގެ ގައުމީ ތެޔޮރިޒާވް ފޮނަދޫގައި ބަހައްޓަމުންދިޔަޔަސް ސިފައިންގެ ބެލުމުގެ ދަށުން އެރަށް ނެއްޓިގެންނެއް ނުދެއެވެ.

ރައީސް ސާލިހްގެ ސިޓީ ހޮޓާ މަޝްރޫއު އިއުލާން ކުރުމާއެކު ރާއްޖޭގެ އަސްކަރިއްޔާގެ އެންމެ އިސްކޮށް ކުރިން އުޅުއްވި އެއްބޭފަޅަކު ވިދާޅުވި ގޮތުގައި މީގެކުރިން އެރަށުގައި އަމިއްލަ ފަރާތްތަކުން އެކިއެކި މަޝްރޫއުތައް ހިންގަން ޝައުގުވެރިކަން ފާޅުކުރުމުންވެސް ދިވެހި އަސްކަރިއްޔާގެ އިސްވެރިން އެކަމަށް ހުރަސްއެޅުއްވިއެވެ. އެއީ ގައުމީ ސަލާމަތަށް ކުރިމަތިވާނެ ނުރައްކަލެއްކަމަށް އަސްކަރިއްޔާގެ ބޭފުޅުން ދެކެވަޑައިގަތެވެ.

ގައުމީ ސަލާމަތާއި ފޮނުދުއާއި ގުޅުވަނީ ކީއްވެގެން ހެއްޔެވެ. ފޮނަދޫ އޮތީ ރާއްޖޭގެ ސިފައިންނާ ފުލުހުންގެ މައިމަރުކަޒުތައް ކުރިމަތީގައެވެ. ރައީސުލްޖުމްހޫރިއްޔާގެ އޮފީސް ކުރިމަތީގައެވެ. އެދިމާއިން ކަނޑުމަތީގައި އުޅަނދެއް މަޑުކުރިޔަސް ކޯސްޓްގާޑު ސިފައިން އެއުޅަނދެއް ދުރައްޖައްސައެވެ. ސިޓީ ހޮޓާ އަޅައިގެން ބޭރުމީހުން ފޮނަދޫގައި މިނިވަންކަމާއެކު ދިރިއުޅެން ފެށުން ގައުމީ ސަލާމަތަށް ނުރައްކާ އޮތް މިންވަރު އެނގިވަޑައިގަންނަވާނީ އަސްކަރިއްޔާގެ ބޭފުޅުންނަށެވެ. މީގެކުރިން ތިއްބެވި ބޭފުޅުން ގެންގުޅުއްވި ސްޓްރެޓަޖީ މިހާރު ތިއްބެވި ބޭފުޅުން ރިވައިޒްކުރައްވާފައި އެއީ ގައުމީ ސަލާމަތަށް މުހިއްމު ރަށެއް ނޫންކަމަށް ނިންމަވާފައިވާނަމަ ރައީސް ސާލިހްގެ އެޕްރޮޖެކްޓް ހިންގުމަކީ މައްސަލައަކަށް ނުވެދާނެއެވެ.

ފޮނަދޫގައި ރައީސް ސާލިހް ހައްދަވަން އިއުލާން ކުރެއްވި ކޮންވެންޝަން ސެންޓަރާއި ސިޓީ ހޮޓާ މަޝްރޫއު ސީރިއަސް އަދި މާ ނުރައްކާތެރި އެހެން މަންޒަރެއް ފެނެއެވެ. ރާއްޖޭގެ އެންމެ މުހިއްމު ސްޓްރެޓެޖިކް ސަރަހައްދުތަކުގައި ތަރައްގީގެ ބިޔަ މަޝްރޫއުތައް ހިންގަން ހަމައެކަނި އަވަށްޓެރި އިންޑިއާއާއި ސަރުކާރާ ހަވާލުކޮށްފައި އޮތުމުން އިންޑިއާގެ ނުފޫޒު ދިވެހި ސަރުކާރުގެ މައްޗަށް އޮންނަކަމާއި ދިވެހި ގައުމުގެ މިނިވަންކަމާ ސިޔާސަދަތަށް އެކަމުން ބުރޫ އަރަމުންދާކަމަށް އިދިކޮޅު ސިޔާސީ ލީޑަރުން ގެންދަވަނީ ވިދާޅުވަމުންނެވެ. އެމަޝްރޫއުތަކާ ގުޅުވައިގެން އިންޑިއާ ސިފައިން ރާއްޖޭގައި ބައިތިއްބާފައި ތިބިކަން މިސެޕްޓެމްބަރ 9 ވަނަ ދުވަހު ރާއްޖޭގައި ބާއްވާ ރިޔާސީ އިންތިޚާބަށް ކެމްޕެއިން ކުރައްވަމުން ގެންދަވާ ރިޔާސީ ކެންޑިޑޭޓުން ތުހުމަތު ކުރައްވަމުން ގެންދަވައެވެ. އެތުހުމަތު ތަކެއް ސްރީލަންކާއާއި ޕާކިސްތާނާއި ޗައިނާއާއި އެމެރިކާގެ މައްޗަކަށް ނުކުރެއެވެ. އުތުރުގައި ހަނިމާދޫ އެއަރޕޯޓް އިންޓަރނޭޝަނަލް އެއަރޕޯޓަކަށް ހަދަން އިންޑިއާ ސަރުކާރުން ލޯން ނެގުމުން އިންޑިއާ ސަރުކާރުން އެމަޝްރޫއު ހިންގަން ހަވާލުކޮށްފައިވަނީ އެގައުމުގެ ކުންފުންޏަކާއެވެ. އެތަނުގައި އިންޑިއާ ސިފައިން ތިބޭކަމާއި އިންޑިއާގެ އަސްކަރީ އުޅަނދުތައް ޖައްސާކަމުގެ އަޑުތައް އާއްމު ޕަބްލިކްގައި ހުރެއެވެ. ރާއްޖޭގެ މެދުތެރެއިން މާލެއާ ކައިރިން އުތުރު ތިލަފަޅުގައި އަސްކަރީ ފެޒިލިޓީޒްތައް ހަދަން ހަވާލުކޮށްފައި އޮތީވެސް އިންޑިއާއަށެވެ. އެތަނުގައި މިނިވަންކަމާއެކު އުޅެން ދިވެހި ސިފައިންނަށް ހުރަސްތައް އޮންނަކަމާއި އިންޑިއާ ސަރުކާރާއެކު ސާލިހްގެ ސަރުކާރުން ހަދާފައިވާ އެއްބަސްވުން ސިއްރުކުރަމުންދާކަމަށް ތުހުމަތު ކުރެވެމުންދެއެވެ. ދެކުނުނުން އައްޑޫގައި ޕޮލިސް އެކަޑީއާއި ގުޅިގެން އިންޑިއާ ސިފައިން ތިބިކަމަށް ސިޔާސީ ބޭފުޅުން ތުހުމަތު ކުރައްވައެވެ. ލ އަތޮޅަކީވެސް އެކަހަލަ ތަނެކެވެ. އެހެން އޮއްވައި ސިފައިންނާއި ފުލުހުންގެ ހެޑްކުއާޓަރ ކުރިމަތީގައި ހޮޓަލެއް ހަދަން ގައުމަކުން ލޯންދޭއިރު އެގައުމަކުން ޝަރުތު ކުރާގޮތަށް އެމަޝްރޫއު ހިންގަން އެގައުމެއްގެ ކުންފުންޏަކަށް ދޫކޮށްފިނަމަ އެގައުމުގެ އަސްކަރީ ސިފައިން ގެނެސް ބަތިއްބައިގެން ކުރާނެ ކަންތަކުގެ ނުރައްކާތެރިކަން ދިވެހި އަސްކަރިއްޔާގެ ޖެނެރަލުންނާއި އަސްކަރީ ސްޓްރެޓަޖީ ރާވާ ބޭފުޅުންނަށް ވަޒަން ކުރެވެން ވާނެއެވެ. ސިޓީ ހޮޓަލަށް ލޯން ދޫކުރަނީ ކޮން ގައުމަކުން ކަމެއް ރައީސް ވިދާޅެއް ނުވެއެވެ. އެކަމަކު މިކަހަލަ ބޮޑެތި ޕްރޮޖެކްޓްތަކަށް ސާލިހްގެ ސަރުކާރަށް ލޯންދެމުން އަންނަނީ މުޅިންވެސް އަވަށްޓެރި އިންޑިއާއިންނެވެ. ސިޓީ ހޮޓަލަށް ލޯން ނަންގަވަނީ އިންޑިއާއިން ކަމަށްވާނަމަ ދެން ބުނާނެ އެއްޗެއް ނެތެވެ. މުޅި ދިވެހި ގައުމު ވަށާ ބަނދެވި ނިމުނީ ނޫންތޯއެވެ.

ފޮނަދޫގައި ހުރި ގައުމީ ސްޓްރެޓެޖިކް ތެޔޮ ރިޒާވް އެހެން ރަށަކަށް ބަދަލު ކުރެވިދާނެއެވެ. އެކަމަކު އެރަށަކީ ބިދޭސިން ބޭނުން އިރަކު އައިސް ރާއްޖޭގެ ދިފާއީ މައިމަރުކަޒުތައް ކުރިމަތީގައި ބަނޑަހަ ޖަހައި ވީޑިއޯ ކެމެރާތައް އަޅުވައިގެން ޖާސޫސްކުރަން ދޫކޮށްލާފައި ބާއްވަންވީ ރަށެއްތޯ ރައީސް އަލުން ވިސްނަވާލައްވަން ޖެހެއެވެ. ދިވެހި އަސްކަރިއްޔާގެ ވެރިން ރައީސަށް މިކަމުގެ ނުރައްކާ ދަންނަވައިދެއްވަން ޖެހެއެވެ.