ދައުލަތުގެ މީޑިއާއަށް 100 މިލިއަން ޑޮލަރުގެ ލޯނުވެސް ފެންނަނީ ހިލޭ އެހީގެ ގޮތުގައި: ސައީދު
ދައުލަތުގެ މީޑިއާއަށް ދަރަންޏާއި ހިލޭ އެހީ ވަކިކުރަން ނޭގޭކަން ފާހަގަކުރައްވާ ކުރީގެ އިކޮނޮމިކް މިނިސްޓަރު އަދި މިހާރު މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ފާޑުވިދާޅުވެއްޖެއެވެ.
"އިންޑިއާއިން ރާއްޖެއަށް 100 މިލިއަން ޑޮލަރުގެ ހީދިނުމުގެ އެއްބަސްވުމެއްގައި ސޮއިކޮށްފި" މި ސުރުހީގެ ދަށުން ދައުލަތުގެ މީޑިއާ ޕީއެންސްއެމް ނިއުސްގައި ޝާއިއުކޮށްފައިވާ ޚަބަރެއްގެ ސްކްރީން ޝޮޓެއް ހިއްސާކުރައްވާ ސައީދު ކުރެއްވި ޓްވީޓެއްގައި ވިދާޅުވީ އިންޑިއާއިން ލޯނު ނަގައިގެން ފެށި ބްރިޖުގެ އަގު މިހާރު އެތައް ގުނައެއް ބޮޑުކޮށްފައިވާކަމަށެވެ.
އެ ލޯނު ދިވެހިންގެ ބޮލުގައި އެޅުވުމަށްފަހު، ޕްރޮޖެކްޓު އަވަސްކުރުމުގެ ނަމުގައި އަނެއްކާވެސް އިތުރު ލޯނު އަޅުވަމުންދާކަމަށް އޭނާ ވިދާޅުވިއެވެ.
ސަރުކާރުން ބަހާ ހުސްކުރަމުންދަނީވެސް ލޯނުތައް ކަަމަށާއި، އިންތިޚާބުތަކާއި ދިމާކޮށްވެސް ބޭނުންކުރަނީ ލޯނު ފައިސާކަން ދޭހަވާ މޭރުމަކުން ސައީދު ވަނީ ކުރީ ސަރުކާރުން ލޯނު ނެގުމުން އެކަމަށް ފާޑުކީ އެމްޑީޕީ މިއަދު ކޮބައިތޯ އައްސަވާ ސުވާލުވެސް ކުރައްވާފައެވެ.
އެހެން ނަމަވެސް ސަރުކާރުން މަތިމައްޗަށް ލޯނުތައް ނަގަމުންދާއިރު، ދައުލަތުގެ މީޑިއާއަށް އިންޑިއާއިން ނެގި 100 މިލިއަން ޑޮލަރުގެ ލޯނުވެސް ފެންނަނީ ހިލޭ އެހީގެ ގޮތުގައިކަމަށް ސައީދު ވަނީ ވިދާޅުވެފައެވެ.
ރައީސް އިބްރާހިމް މުހައްމަދު ސޯލިހު ވެރިކަމާއި ހަވާލުވެވަޑައިގަންނަވަމުން ވަނީ ދަރިންނާއި ދަރިންގެ ދަރިންގެ ބޮލުގައި ދަރަނި އަޅުއްވާނެ ބޭފުޅަކަށް ނުވާނެކަމަށް ވައުދުވެވަޑައިގެންފައެވެ.
އެހެން ނަމަވެސް މި ސަރުކާރަށް ހަތަރު އަހަރު ފުރެންދާއިރު، މިހާރު ދައުލަތުގެ ދަރަނި 100 ބިލިއަން ޑޮލަރަށްވުރެ އިތުރުވެފައިވާކަން ފިނޭންސް މިނިސްޓްރީގެ ތަފާސްހިސާބުތަކުން ދައްކައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
