ޔޯގާ މައްސަލާގައި ދައުވާ އުފުލީ އިންޑިޔާ ރުއްސަން: ޝިޔާމް

ބައިނަލްއަގުވާމީ ޔޯގާ ދުވަސް ފާހަގަކުރުމަށް ގަލޮޅު ދަނޑުގައި ބޭއްވި ހަރަކާތް ހުއްޓުވުމުގެ ތެރެއިން ހިނގި ހަމަނުޖެހުމާ ގުޅިގެން ހައްޔަރުކުރި މީހުންގެ މައްޗަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުން ދައުވާ ކުރަން ނިންމާފައިވަނީ އިންޑިއާ ސަރުކާރު ރުއްސަން ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަދި އިދިކޮޅު ޕީޕީއެމްގެ ނާއިބު ރައީސް އަހުމަދު ޝިޔާމް ވިދާޅުވެއްޖެއެވެ.

21 ޖޫން 2022 ވަނަ ދުވަހު ބައިނަލްއަގުވާމީ ޔޯގާ ދުވަސް ފާހަގަކުރުމަށް ގަލޮޅު ދަނޑުގައި ކުރިއަށް ގެންދިޔަ ހަރަކާތަށް ހުރަސް އަޅައި، ޓެރަރިޒަމްގެ އަމަލުތައް ހިންގި ކަމުގެ ތުހުމަތު ކުރެވުނު މައްސަލާގައި ދައުވާ ކުރުމަށް އިއްޔެ ކްރިމިނަލް ކޯޓަށް ހުށަހަޅާފައިވާކަމަށް މިއަދު ޕީޖީ އޮފީހުން ވަނީ ބުނެފަައެވެ.

އަދި އެ ދައުވާ ކުރެވުނު ބައެއް މީހުންގެ މައްޗަށް ދައުވާ ސާބިތު ވެއްޖެ ނަމަ 10 އަހަރާއި 25 އަހަރާއި ދެމެދުގެ ޖަލު ހުކުމް އަންނާނެއެވެ. އެގޮތުން ދައުވާ ކުރެވުނު މީހުންގެ ތެރޭގައި ދީނީ ދެ ޢިލްމުވެރިން ކަމުގައިވާ ޝެއިޚް ފަޟުލޫން ބިން މުހައްމަދު އާއި ޝެއިޚް އާދަމް ނިޝާން ހިމެނޭ އިރު އެ ދެމީހުންގެ މައްޗަށް ކުރި ދައުވާ ސާބިތު ވެއްޖެ ނަމަ 10 އަހަރާއި 15 އަހަރުގެ ޖަލު ހުކުމެއް އަންނާނެއެވެ.

އަދި ހަމައެހެންމެ، އެ މައްސަލާގައި، ހައްޔަރުކުރި ޕީޕީއެމްގެ ހަރަކާތު ކޮމިޓީގެ ޗެއަރމަން މުހައްމަދު އިސްމާއީލަށް 21 އަހަރުގެ ޖަލު އަދަބެއް އަތުވެދާނެ 2 ދަޢުވާއެއް ވެސް ޕީޖީ އޮފީހުން ވަނީ އުފުލާފައެވެ.

އެފަދަ ބޮޑެތި އަދަބު ލިބޭ ދައުވާތަކެއް ޔޯގާ މައްސަލާގައި ދައުލަތުން އުފުލާފައިވާއިރު، އެ ހަމަނުޖެހުން ހިންގީ ފުލުހުންނާއި ސަރުކާރުގެ އިހުމާލުން ކަމަށް ގިނަ ބަޔަކު އަންނަނީ ބުނަމުންނެވެ.

އެ ފަރާތްތަކުގެ ވާހަކަތައް ތެދުކޮށް އެ މައްސަލާގައި ރައްޔިތުން ކުށްވެރިވާންޖެހޭ ސަބަބެއްނެތް ކަމަށް ބުނެ މަހިބަދޫ ދާއިރާގެ މެންބަރު އަހުމަދު ޠާރިގު، ކުރެއްވި ޓުވީޓަކަށް ރައްދު ދެއްވައި ޝިޔާމް ވިދާޅުވީ، ޔޯގާ ހަމަނުޖެހުމަކީ ފުލުހުން ކުރުވިކަމެއް ކަމަށެވެ. އަދި އެ މައްސަލައިގައި މުހައްމަދު އިސްމާއިލްގެ މައްޗަށް ބޮޑެތި އަދަބު ލިބޭ ދައުވާ ކޮށްފައިވާއިރު އޭނާ އަކީ އެތަނަށް ވަޑައިގެން މީހެއްވެސް ނޫން ކަމަށް ޝިޔާމް ފާހަގަކުރެއްވިއެވެ.

"މީ އިންޑިޔާ ރުއްސަން ސަރުކާރުން ކުރާކަމެއް. ރައްޔިތުން ނިކުމެ ސަރުކާރު ޒިންމާދާރުކުރުވަންވެއްޖެ." ޝިޔާމް ވިދާޅުވިއެވެ.

ޔޯގާ މައްސަލާގައި ގިނަ ބަޔަކަށް ބޮޑެތި ދައުވާ ތަކެއް އުފުލާފައިވާއިރު އެ ހަމަނުޖެހުން ހިނގުމުގައި ފުލުހުންގެ އިހުމާލު އޮތް ކަމަށް ކޮމިޝަނަރ އޮފް ޕޮލިސް މުހައްމަދު ހަމީދުވެސް މީގެ ކުރިން ވަނީ އެއްބަސްވެފައެވެ. އަދި އެ ހަމަނުޖެހުން ހިނގި ދުވަހާއި ގުޅޭ ގޮތުން ދައުރުވަމުންދިޔަ ވީޑިއޯ ތަކުންވެސް އެކަން ހުއްޓުވަން ފުލުހުން މަބޮޑު މަސައްކަތެއް ނުކުރާކަން ވަރަށް ސާފުކޮށް ހާމަވެއެވެ.