މިޞްރުގެ ރައީސް އަލްސީސީ ތިންވަނަ ދައުރަކަށް ކުރިމަތިލުމަށް ނިންމައިފި

މިޞްރުގެ ރައީސްގެ މަޤާމުގައި ހުންނެވި ޢަބްދުލް ފައްތާޙް އަލްސީސީ ރައީސް ކަމުގެ ތިންވަނަ ދައުރަކަށް ކުރިމަތިލުމަށް ނިންމައި އެކަން އިޢުލާނު ކުރައްވައިފި އެވެ.

ކުރިއަށް އޮތް އިންތިޚާބު ކާމިޔާބު ކުރައްވާނެ ކަމުގެ ބޮޑު އުންމީދަކާއި އެކު އަލްސީސީ ވެރިކަމަށް ކުރިމަތިލައްވާއިރު މިޞްރު މިވަގުތު އޮތީ  އިޤްތިޞާދީ ގޮތުން ދަތި ޙާލަތަކަށް ވެއްޓިފައެވެ. އަދި ރިކޯޑް މިންވަރަކަށް އެޤައުމުގެ އިންފްލޭޝަން ރޭޓް ވެސް ވަނީ މަތިވެފައެވެ.

"ކުރިއަށް އޮތް އިންތިޚާބުގަ ވާދަކުރަން ނިންމައިފިން، މި އިންތިޚާބު ކާމިޔާބު ކުރުމަކީ އަހަރެން ދެކޭ ހުވަފެނެއް، މިޞްރުގެ ރައްޔިތުންނަށް އަހަރެން މި ގޮވާލަނީ ކުރިއަށް މިއޮތް އިންތިޚާބުގައި ބައިވެރިވެ ޤައުމުގެ މުސްތަޤްބަލަށް ގޮތް ނިންމުމަށް ތިޔަހުރިހާ ރައްޔިތުންގެ ދައުރު އަދާކުރުމަށް"

އަލްސީސީ އެޤައުމުގެ ރައްޔިތުންނާއި މުޚާތަބު ކުރަމުން ވިދާޅުވެފައިވެއެވެ.

ޑިސެމްބަރު މަހުގެ 10 އަކުން 12 އަށް މިޞްރުގެ އިންތިޚާބު ކުރިއަށް ދާއިރު މި އިންތިޚާބުގައި ވޯޓް ލުމުގެ ހައްޤު 65 މިލިއަން މީހުންނަށް ލިބިގެން ވާކަމަށް ވަނީ ލަފާކޮށްފަ އެވެ.

އަލްސީސީ އެންމެ ފުރަތަމަ މިޞްރުގެ ވެރިއެއްގެ ގޮތުގައި އިންތިޚާބު ވެފައިވަނީ 2014 ވަނަ އަހަރުއެވެ.

އޭގެ ފަހުން 2018 ވަނަ އަހަރު ބޭއްވުނު އިންތިޚާބު ވެސް އަލްސީސީ ވަނީ ކާމިޔާބު ކުރައްވައިފައެވެ. ދެފަހަރުވެސް 90 ޕަސެންޓަށް ވުރެ މަތިން އަލްސީސީ ވަނީ ވޯޓް ހޯއްދަވައިފަ އެވެ.