ރީބްރޯޑްކާސްޓިން ގަވާއިދަށް ގެނައި އިސްލާހަކީ ފޮރިން އިންވެސްޓްމެންޓަށް އޮތް ހުރަހެއް: އުރީދޫ

ރީބްރޯޑްކާސްޓް ކުރުމާ ގުޅޭ ގަވާއިދަށް ގެނައި އިސްލާހަކީ ދިވެހިރާއްޖެއަށް ލިބެން އޮތް ބޭރުގެ އިންވެސްޓްމަންޓްތަކަށް އޮތް ހުރަހެއް ކަމަށް އުރީދޫ މޯލްޑިވްސްއިން ބުނެފިއެވެ.

ބްރޯޑްކާސްޓިން ކޮމިޝަނުން ރީބްރޯޑްކާސްޓް ކުރުމުގެ ގަވާއިދަށް ގެނެސްފައިވާ ބަދަލުގައިވާގޮތުން ރީބްރޯޑްކާސްޓް ކުރަން އެދޭ ކުންފުންޏަކީ 100 ޕަސެންޓް ދިވެހިން ހިއްސާވާ ކުންފުންޏަކަށް ވާންޖެހެއެވެ. މިއާއެކު، ރާއްޖޭގައި ބްރޯޑްކާސްޓްކުރުމުގެ ލައިސަންސް ދީފައިވާ، ބޭރުގެ ހިއްސާވެސް އޮންނަ ކުންފުންޏެއް ކަމަށްވާ ދިރާގަށް އެ ފުރުސަތު ގެއްލިގެންދާއިރު، އުރީދޫއަށްވެސް ދެން އެ ފުރުސަތެއް ނުލިބޭނެއެވެ. އެހެނީ އުރީދޫ އަކީވެސް ބޭރުގެ ހިއްސާ އޮންނަ ކުންފުންޏެކެވެ. އަދި ދިރާގުގެވެސް 52 ޕަސެންޓު ހިއްސާ އޮންނަނީ ބަހުރައިންގެ ކުންފުންޏެއް ކަމަށްވާ ބަޓެލްކޯއަށެވެ.

ރީބްރޯޑްކާސްޓް ކުރުމުގެ ގަވާއިދާ މި ގެނައި އިސްލާހާއި ގުޅިގެން ރައްޔިތުންގެ މަޖިލީހުގެ ގަވާއިދު ކޮމިޓީއަށް ވާހަކަދައްކަވަމުން އުރީދޫގެ ޗީފް ކޮމާޝަލް އޮފިސަރު ހުސެއިން ނިޔާޒް ވަނީ ބްރޯޑްކާސްޓިން ކޮމިޝަންގެ އެ އިސްލާހާމެދު ކަންބޮޑުވުން ފާޅުކޮށްފައެވެ. އަދި އެއީ ގާނޫނާއި ގަވާއިދު ހެދުމުގެ މިންގަނޑުތަކަށް ބަލާއިރުވެސް ރަނގަޅު ގަވާއިދެއް ކަމަށް ގަބޫލު ނުކުރެވޭ ކަމަށް އޭނާ ވިދާޅުވިއެވެ.

މިއާއެކު ނިޔާޒް ވިދާޅުވީ، އެ ގަވާއިދުގެ ސަބަބުން ގިނަ ބަޔަކަށް ވިޔަފާރީގެ ތެރެއަށް ނުކުމެވި ކޮންޕެޓިޓިވް މާހައުލެއްގައި އެކަން ކުރުމަށް ހުރަސް އެޅިގެންދާނެ ކަމަށާ އެއީ އެންމެ ރަނގަޅު ގޮތް ނޫން ކަމަށެވެ.

"ބްރޯޑްކާސްޓިން ގާނޫނަށް ވުރެ ފުޅާކޮށް ރެގިއުލޭޝަންސް އެއޮތީ ހެދިފަ. ގާނޫނު ހެދުމުގެ މިންގަނޑުތަކަށް ބަލާއިރުވެސް އެއީ ރަނގަޅު ގާނޫނެއް ކަމަށް އަޅުގަނޑުމެންނަކަށް ގަބޫލެއް ނުކުރެވޭ،" ނިޔާޒް ވިދާޅުވިއެވެ.

މީގެ އިތުރުން އުރީދޫގެ ނޮން އިންޑިޕެންޑެންޓް ނޮން އެގްޒެކެޓިވް ޑިރެކްޓަރު ދީނާ ހުސައިން މިގަވާއިދާ ގުޅޭގޮތުން ވާހަކަދައްކަވަމުން ވިދާޅުވީ، އުރީދޫގެ ޚިދުމަތްތައް ފުޅާކޮށް ގިނަ ރައްޔިތުންނަށް ޚިދުމަތް ލިބޭނެ ގޮތަށް އެކުންފުނިން ކުރަމުންދާ މަސައްކަތުގެ ދަށުން ރީބްރޯޑްކާސްޓިން ލައިސެންސެއް ހޯދުމަށް މަސައްކަތް ފަށާފައިވާ ކަމަށެވެ. ނަމަވެސް އާ އިސްލާހުގެ ސަބަބުން އެކަމަށް ހުރަސް އެޅޭކަން އޭނާ ފާހަގަކުރެއްވިއެވެ.

ބްރޯޑްކާސްޓިން ކޮމިޝަނުން ރީބްރޯޑްކާސްޓް ކުރުމުގެ ގަވާއިދަށް ގެނައި އިސްލާހާއި ގުޅިގެން ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ބޭއްވި ބައްދަލުވުމުގައި ވަނީ އެ އިސްލާހު ގެނައުމުގައި ކަން ހިނގައި ދިޔަ ގޮތް ސާފުކުރުމަށް ބްރޯޑްކޮމްއަށް ސިޓީއެއް ހުށަހެޅުމަށް ފާސްކޮށްފައެވެ.