މިހާރު ވެރިކަން ކުރަމުންދަނީ އާންމުން އެދޭ ގޮތާއި ޚިލާފަށް: ނަޝީދު

އެމްޑީޕީ އިސްވެ އޮވެ ހިންގާ ކޯލިޝަން ސަރުކާރުން މިހާރު ވެރިކަން ކުރަމުން ދަނީ ރައްޔިތުން އެދޭ ގޮތާއި ޚިލާފަށް ކަމަށް އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިފަދައިން ވިދާޅުވެފައިވަނީ އެމަނިކުފާނު ތިނަދޫއަށް ކުރައްވާ ދަތުރުފުޅުގައި ރޭ ބޭއްވި ޖަލްސާއެއްގައި ވާހަކަ ދައްކަވަމުން ނެވެ.

އެ ޖަލްސާގައި ވާހަކަ ދައްކަވަމުން ނަޝީދު ވިދާޅުވީ މިހާރު ވެރިކަން ކުރަމުން ދަނީ ރައްޔިތުން ނިންމާފައި އޮތް ގޮތަށް ނޫންކަމަށެވެ. އަދި އެކަމުގެ ސަބަބުން ވަރަށް ގިނަ ދެކޮޅު ނުޖެހުންތައް އުފެދިފައިވާ ކަމަށާއި، އެކަމުގެ ސަބަބުން ރާއްޖޭގެ ތަރައްގީއަށް ހުރަސް އެޅިގެން ދާނެކަމަށް ނަޝީދު ވިދާޅުވިއެވެ.

އޭނާ ވިދާޅުވީ ވެރިކަން އެންމެ ރަނގަޅީ ނިޒާމީ ވޯޓެއް ނެގުމަށްފަހު ރައްޔިތުންގެ ނިންމުމާއި އެއްގޮތަށްކަމަށެވެ. ނިޒާމީ ވޯޓަކަށް ނުގޮސް ވެރިކަން ކުރަން ފެށުމަކީ ހެދުނު ވަރަށް ބޮޑު ގޯހެއްކަމަށް ނަޝީދުގެ ވާހަކަފުޅުގައި ވިދާޅުވިއެވެ.

"މީކީއެއް ރައްޔިތުން ނިންމި ގޮތެއް ނޫން. ރައްޔިތުން ނިންމާ ގޮތަށް ސަރުކާރު އެކުލަވާލެވެން ޖެހޭނީ. އަޅުގަނޑު ރައީސުލްޖުމްހޫރިއްޔާ އަރިހުގައި ދެންނެވިން ރައީސް އޭ ވެރިކަން ފައްޓަވާފައި މިކަމަށް އިސްކަން ދެއްވުުމަށް އަޅުގަނޑު ވަރަށް އެދެމޭ. އެހެން ބުނެގެން އަޅުގަނޑު މި ހުންނަނީ"

އެމްޑީޕީގެ ރައީސް މުހައްމަދު ނަޝީދު

ރާއްޖޭގައި އޮންނަން ފެންނަ ވެރިކަމުގެ ނިޒާމު ކަނޑައެޅުމަށް ރައްޔިތުންގެ ފެންނަ ނުފެންނަ ވޯޓެއް ނަގަން ޖެހޭކަމަށް ނަޝީދު ގެންދަވަނީ ވަކާލާތު ކުރައްވަމުންނެވެ.

މީގެ ދެ ދުވަސްކުރިން ރައްޔިތުންގެ މަޖިލީހުގެ ރައީސް އާ ބޭނުން ސުވާލެއް ކުރުމަށް ހުޅުވާލައި ކުރިއަށް ގެންދިޔަ "އާސްކް ސްޕީކާ" ޕްރޮގްރާމްގައި މީހަކު ކުރި ސުވާލަކަށް ޖަވާބުދެއްވަމުންވެސް ނަޝީދު ވަނީ ކޯލިޝަނަށް ވެރިކަން ލިބޭތާ ދޮޅު އަހަރު ދުވަހުގެ ތެރޭގައި ނިޒާމާ ބެހޭ ވޯޓެއް ނެގުމަށް ކޯލިޝަނުން އެއްބަސްވި މެނިފެސްޓޯގައި އޮންނާނެކަމަށް ވިދާޅުވެފައެވެ.

ނިޒާމީ ވޯޓެއް ނުނަގާ އެމްޑީޕީގެ ރިޔާސީ ޓިކެޓު ދިނުމަށް ބާއްވާ ޕްރައިމަރީ ބޭއްވުމަކީވެސް އެމަނިކުފާނު ގަބޫލުކުރައްވާ ގޮތުގައި ރަނގަޅު ގޮތް ނޫންކަމަށް ނަޝީދު ވިދާޅުވިއެވެ.

"އެއީ ވަރަށް ބޮޑު ވައުދެއް. ވެރިކަމުގެ ނިޒާމު ބަދަލުކުރުމަށް ވެވުނު ވައުދެއް. އެ ވޯޓަށް އަދި ނާހާ. އަޅުގަނޑަށް ފެންނަތަނުގައި ރައްޔިތުން ގާތުގައި އެވާހަކަ ނާހާ ދެން އިތުރު ވާޙަކަ އެއް އަހަން އުޅުމަކީ ބުުއްދިވެރި ކަމެއް ނޫން."

އެމްޑީޕީގެ ރައީސް މުހައްމަދު ނަޝީދު

ނަޝީދުގެ ވާހަކަފުޅުގައި ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ބޮޑެތި ފާޑުކިޔުންތަކެއް އަމާޒުކުރައްވާފައެވެ. އެމްޑީޕީއިން ރައްޔިތުންނަށް ވީ ވައުުތައް ފުއްދުމުގައި ރައީސް ސޯލިހު ފަހަތުފަޔަށް ބުރަވެވަޑައިގެން ހުންނަވާކަމަށް ނަޝީދު ވިދާޅުވިއެވެ.

ނަޝީދު ރައީސް ސޯލިހަށް އެންމެ ބޮޑު ފާޑުކިޔުއްވުމެއް އަމާޒުކުރައްވާފައިވަނީ ނިޒާމީ ވޯޓު ނުނަންގަވާ މައްސަލައާއި ގުޅިގެންނެވެ. ރާއްޖޭގައި އޮންނަން ފެންނަ ވެރިކަމުގެ ނިޒާމާއި ގުޅިގެން އެމްޑީޕީގެ ދެ ރައީސުންގެ ޚިޔާލު ވަރަށް ބޮޑަށް ތަފާތުކަން ފާހަގަކުރެވެއެވެ.

އެމްޑީޕީގެ ދެ ރައީސުންގެ ދެމެދުގައި އެންމެ ބޮޑު ނުތަނަވަސްކަމެއް އުފެދިފައި ވަނީވެސް ނިޒާމީ ވޯޓާއި ގުޅިގެންކަމަށް މަޝްރަހު ދިރާސާ ކުރައްވާ ފަރާތްތައް ވިދާޅުވެއެވެ.