އެމެރިކާ އަތްދަށުކޮށް ނެދަލޭންޑްސް ވޯލްޑްކަޕުގެ ކުއާޓާފައިނަލަށް

އެމެރިކާ އަތުން ހޯދި މޮޅާއެކު ފީފާ ވޯލްޑް ކަޕްގެ ކުއާޓާފައިނަލަށް ދަތުރުކުރި ފުރަތަމަ ޓީމަކަށް ނެދަލޭންޑްސް ވެއްޖެއެވެ.

ގަތަރުގެ ހަލީފާ އިންޓަނޭޝަން ސްޓޭޑިއަމްގައި ކުޅުނު މި މެޗު ނެދަލޭންޑްސް ކާމިޔާބުކޮށްފައި ވަނީ އެމެރިކާ އާއި ވާދަކޮށް 3-1 ގެ ނަތީޖާއަކުންނެވެ.

ކުއާޓާގައި ނެދަލޭންޑްސް ބައްދަލުކުރާނީ އާޖެންޓީނާ އާއި އޮސްޓްރޭލިއާ މިރޭ ކުޅޭ މެޗުން މޮޅުވާ ޓީމަކާ އެވެ. މިއީ އެ ޓީމު ކުއާޓާއަށް ދިޔަ ހަ ވަނަ ފަހަރެވެ.

މެޗުގެ 10 ވަނަ މިނެޓްގައި މެމްފިސް ޑެޕާއި ވަނީ ނެދަލޭންޑްސް އަށް ލީޑު ނަގާދީފަ އެވެ. މިއީ ޑެންޒެލް ޑަމްފްރީސް އެމެރިކާގެ ޕެނަލްޓީއޭރިއާ ތެރެއަށް ހުރަސްކޮށްލި ބޯޅަ އެއް ފަހަރުން ޖަހައި ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކުރި ލަނޑެކެވެ.

ފުރަތަމަ ހާފްގެ އެންމެފަހު މިނެޓްގައި ޑޭލީ ބްލިންޑް ވަނީ ނެދަލޭންޑްސްގެ ދެވަނަ ގޯލް ކާމިޔާބުކޮށްދީ އެޓީމުގެ ލީޑު ފުޅާކޮށްދީފައެވެ. މެޗުގެ 76 ވަނަ މިނެޓްގައި ހާޖީ ރައިޓް ވަނީ ގޯލެއް ކާމިޔާބުކޮށް އެމެރިކާ އަށް ނަތީޖާގެ ފަރަގު ކުޑަކޮށްދީފަ އެވެ. އޭ

ނަތީޖާ އެއްވަރުކުރަން އެމެރިކާ އިން ވަރަށް ބޮޑަށް މަސައްކަތް ކުރަމުންދަނިކޮށް މެޗުގެ 81 ވަނަ މިނެޓްގައި ޑަމްފްރީސް ވަނީ ނެދަލޭންޑްސްގެ ތިންވަނަ ގޯލު ކާމިޔާބުކޮށްދީ މުބާރާތުގެ ކުއާޓާ އިން އެޓީމަށް ޖާގަ ކަށަވަރުކޮށްދީފަ އެވެ.