ދިގުރަށުން ބުނަނީ ކޮތަޅަށް ލާފައި އޮއްވާ ފެނުނީ ބިދޭސީއެއްގެ ދަރިއެއް ކަމަށް!
އދ. ދިގުރަށުން ކޮތަޅަކަށްލައި އެއްލާލާފައި އޮއްވާ ފެނުނު ކުއްޖާއަކީ ދިވެއްސެއްގެ ދަރިއެއް ނޫން ކަމަށް މައުލޫމާތު ލިބިއްޖެއެވެ.
ވިހެއުމަށްފަހު ކޮތަޅަކަށް ލައި އެއްލާލާފައި އޮތް ތުއްތު ކުއްޖަކު ދިގުރަށު ކުނިގޮނޑުން ފެނިފައިވާކަމަށް ފުލުހުން މިއަދު ހެނދުނު ވަނީ ހާމަކޮށްފައެވެ. އަދި އެ ކުއްޖާ ހޮސްޕިޓަލަށް ގެންދެވުނު އިރުވެސް ނިޔާވެފައިވާ ކަމަށް ހޮސްޕިޓަލާއި ހަވާލާދީ ފުލުހުން ވަނީ ބުނެފައެވެ.
އެކަމާއި ގުޅޭ އިތުރު ތަފްސީލް ފުލުހުން އަދި ހާމަ ކޮށްފައި ނުވާއިރު، ދިގުރަށުން "ވޮއިސް" އަށް މަޢުލޫމާތު ދިން މީހަކު ބުނީ، އެ ފެނުނު ކުއްޖާ އަކީ ވޯކް ޕާމިޓް ވިސާގައި އެ ރަށުގައި މަސައްކަތް ކުރަމުން އަންނަ ބިދޭސީ އަންހެނެއްގެ ދަރިއެއް ކަމަށް އެނގިފައިވާ ކަމަށެވެ. ނަމަވެސް އެއީ ކޮން ގައުމެއްގެ މީހެއްކަން ކަށަވަރު ނުވާ ކަމަށާ، އެއީ އެރަށު މީހެއްގެ ދަރިއެއް ނޫން ކަން ޔަގީންވާ ކަމަށް އޭނާ ބުންޏެވެ.
މި މައްސަލައިގައި މައުލޫމާތު ދިން އިތުރު ފަރާތެއްވެސް ވަނީ އެ ކުއްޖާ އަކީ އެ ރަށު މީހެއްގެ ދަރިއެއް ނޫން ކަން ކަށަވަރުވެފައިވާ ކަމަށް ބުނެފައެވެ.
އޭނާ މައުލޫމާތު ދީފައިވާ ގޮތުގައި، އަދި ކުއްޖާ ފެނިފައިވަނީ ކުނި ގޮނޑަށް ގެން ކުނީގެ ތެރޭގައި ހުންނަ ދަޅާއި ޕްލާސްޓިކު އަދި އެހެނިހެން ތަކެތި ކޮތަޅުތަކުން ނަގައި ވަކިކުރަމުން ދަނިކޮށް ގެސްޓު ހައުސްތަކުން ގެނެވުނު ކުނި އަޅާފައި ހުރި ބޮޑު ކަޅު ކޮތަޅެއްގެ ތެރެއިންނެވެ.
އަދި ފެނުނު އިރު ކުއްޖާގެ ފޫޅުވެސް އޮތީ ނުކަނޑައި ކަމަށާ، އެއީ ފިރިހެން ކުއްޖެއް ކަމަށްވެސް މައުލޫމާތު ލިބިފައިވާ ކަމަށް އޭނާ ބުންޏެވެ. އަދި ކުއްޖާ ފެނުނު މީހުންނާއި ހަވާލާދެމުން އެއީ ދުވަސް ފުރާ ވިހާފައިވާ ކުއްޖެއްކަންވެސް އޭނާ ފާހަގަ ކުރެއެވެ.
މިކަމާއި ގުޅިގެން ފުލުހުންގެ ތަހުގީގު ކުރިއަށްދާއިރު، ފުލުހުން ވަކި އެއްޗެއް ހާމަ ނުކުރަނިސް ދިގުރަށު ކައުންސިލް މައްސަލައިގެ ތަފްސީލް ހާމަ ނުކުރަން ނިންމާފައިވާ ކަމަށް އެ ރަށު ކައުންސިލުން ވަނީ ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
