ހަރުކަށިފިކުރުގެ ޔަހޫދީ މިނިސްޓަރެއް ވަރުގަދަ ސެކިޔުރިޓީ އާއި އެކު އަޤްސާ ތެރެއަށް
ހައްދުފަހަނައަޅާފައިވާ އިސްރާއީލްގެ ހަރުކަށި ފިކުރުގެ ޔަހޫދީ ފާ-ރައިޓް މިނިސްޓަރެއް ކަމަށްވާ އިޓަމާރް ބެން-ގުވީރ މުސްލިމުންގެ ޙުރުމަތްތެރިވެގެންވާ ބިނާ އެއް ކަމަށްވާ މަސްޖިދުލް އަޤުޞާ އަށް ވަނުމާއި ގުޅިގެން އިސްލާމީ ގައުމުތަކުން ނުރުހުން ފާޅުކޮށްފިއެވެ.
އިސްރާއީލު ގެ ނެޝަނަލް ސެކިޔުރިޓީ މިނިސްޓަރ އިޓަމާރް އިއްޔެގެ ވަގުތެއްގައި ފުރިހަމަ ސެކިޔުރިޓީ އާއި އެކު މަސްޖިދުލްއަޤްޞާ އަށް ވަނުމާއި ގުޅިގެން ފަލަސްޠީނުގެ އާއްމުންނާއި ހަމާސް ޖަމާއަތުން ވެސް ނުރުހުން ފާޅުކޮށްފައިވާއިރު، އޭނާގެ ހައްދުން ނައްޓާފައިވާ މިއަމަލަކީ މުސްލިމުން ގަސްތުގައި ރުޅި އަރުވާލައި ހަމަނުޖެހުންތަކެއް ފެށުމަށް ދިން ދައުވަތެއް ކަމަށް ފަލަސްޠީނުން ވަނީ ބުނެފައެވެ.
ގަސްތުގައި މުސްލިމުންގެ ލޭ ކައްކުވާލުމަށް އަޤުޞާ އަށް ވަނުމަށްފަހު އެކަމާއި ގުޅިގެން ހަމާސް ޖަމާއަތުން ވެސް ނުރުހުން ފާޅުކުރުމާއި ގުޅިގެން އިޓަމާރް ކުރި ޓުވީޓެއްގައި ވަނީ އޭނާ ހަމާސް ޖަމާއަތުން ދޭ އިންޒާރު ތަކަށް އެއްވެސް ބިރެއް ނުގަންނަ ކަމަށް ބުނެފައެވެ.
"އެ މިސްކިތަކީ (އަޤްސާ) އަކީ އެންމެނށް ވެސް ހުޅުވާލެވިފައިވާ ތަނެއް. އަދި ހަމާސް ޖަމާއަތުން އަހަރެންނަށް ބިރު ދެއްކޭނެ ކަމަށް ހީވާނަމަ އެމީހުންނަށް މިހާރު އެނގި ކަށަވަރުވެފައި އޮންނަންވާނީ ވަގުތާއި ހާލަތު މިހާރު ބަދަލުވެއްޖެ ކަން" އިޓަމާރް ގެ ޓުވީޓުގައި ވެއެވެ.
އިޓަމާރް އަކީ މިނިސްޓަރު ކަމަށް އައުމުގެ މާ ކުރިންވެސް، އަޤުޞާ މިސްކިތަށް ޔަހޫދީންނަށް ވަދެ އުޅެވެން ވާނެ ކަމަށް އަޑުއަރުކޮށް ވަކާލާތުކުރާ، ފަލަސްޠީނުގެ ރައްޔިތުންނާއި މުސްލިމުން ދެކެ ނުހަނު ރުޅިއަންނަ މީހެކެވެ.
އަދި އިޓަމާރް އަޤްޞާ އަށް ވަނުމާއި ގުޅިގެން ފަލަސްޠީނުގެ ބޮޑުވަޒީރު ވަނީ، ޔަހޫދީން އަގްސާ އަށް ވަނުން ހުއްޓުވުމަށް އެމީހުންނާއި ކުރިމަތިލުމަކަށް ދާންޖެހޭ ކަމަށް ވިދާޅުވެފައެވެ. އަދި އިޓަމާރް، އަޤްޞާ މިސްކިތަށް ވަދެފައި މިވަނީ، އެ މިސްކިތް ޔަހޫދީންގެ ފައްޅިއަކަށް ހެދުމަށް އޭނާ ކުރާ މަސައްކަތް ހަގީގަތަކަށް ހެދުމަށް ރާވަމުންދާ ރޭވުން ހަގީގަތަކަށް ހެދުމުގެ ގޮތުން ކަމަށްވެސް ފަލަސްޠީނުގެ ބޮޑުވަޒީރު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
