ރައީސް ޔާމީން ޖަލަށްލާ ނަޝީދު ނިކަމެތިކުރުމަކީ ސަރުކާރުން ހަދާ ބޮޑު ގޯހެއް: ޑރ ޖަމީލު

އެމްޑީޕީ އިސްވެއޮވެ ހިންގާ ކޯލިޝަން ސަރުކާރުން ހަދަމުންދާ ބޮޑެތި ގޯސްތައް ކުރީގެ ނައިބުރައީސް ޑރ މުހައްމަދު ޖަމީލު އަހުމަދު ފާހަގަކުރައްވައިފި އެވެ.

ސަރުކާރުން ހަދަމުންދާ 3 ގޯހެއްގެ ވާހަކަ އެމަނިކުފާނު ވަނީ ކުރެއްވި ޓްވީޓެއްގައި ބަޔާންކުރައްވާފައެވެ.

އެގޮތުން އެންމެ ފުރަތަމަ ކަމެއްގެ ގޮތުގައި ޑރ ޖަމީލު ފާހަގަކުރައްވާފައިވަނީ ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ޖަލަށް ލުމެވެ. ޑރ ޖަމީލު ވިދާޅުވީ އެއީ ސަރުކާރުން ހެދި ބޮޑު ގޯހެއްކަމަށެވެ.

ވ އާރަށުގެ މުއާމަލާތާއި ގުޅުވާ ރައީސް ޔާމީންގެ މައްޗަށް އުފުލާފައިވާ ދައުވާތައް އެމަނިކުފާނުގެ މައްޗަށް ސާބިތުވާކަމަށް ކަނޑައަޅާ ނިމިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން ހުކުމްކޮށްފައިވާއިރު، އެއީ ސިޔާސީ ނުފުޒު ފޯރުވައިގެން ކޮށްފައިވާ ހުކުމެއްކަމަށް އިދިކޮޅުން ގެންދަނީ ތުހުމަތު ކުރަމުންނެވެ. އަދި އެހުކުމަކީ ހަރާން ހުކުމެއް ކަމަށާއި، އެ ހުކުމް ބަލައިނުގަންނަކަމަށް އިދިކޮޅުން ވަނީ ބުނެފައެވެ.

ރައީސް ޔާމީންގެ މައްޗަށް ހުކުމް ކުރުމާއި ގުޅިގެން އިދިކޮޅުން ގެންދަނީ އެ ހުކުމާއި ދެކޮޅަށް އަޑުއުފުލާ އިހުތިޖާޖުކުރަމުން ނެވެ.

ދެވަނަ ގޯހެއްކަމަށް ޑރ ޖަމީލު ފާހަގަކުރައްވާފައިވަނީ ސަރުކާރުން ރައްޔިތުންނަށް ވަޒީފާގެ ބިރު ދެއްކުމެވެ. އިންތިޚާބުތަކާއި ދިމާކޮށް ސަރުކާރުން ރައްޔިތުންނަށް ވަޒީފާގެ ބިރު ދައްކަމުންދާ ކަމުގެ ވާހަކަތައް ނިމިދިޔަ އެމްޑީޕީގެ ޗެއަރޕާރސަން އިންތިޚާބާއި ދިމާކޮށް އެމްޑީޕީގެ ތެރެއިންވެސް ވަނީ ފެންމަތިވެގެން ގޮސްފައެވެ.

އެ އިންތިޚާބު ފައްޔާޒު އިސްމާއިލްއަށް ކާމިޔާބުކޮށްދިނުމަށް ސަރުކާރުގެ ކުންފުނިތަކުގައި ވަޒީފާ އަދާކުރަމުންދިޔަ ފަރާތްތަކަށް އަނަގާ ބިރުދައްކަމުން ދިޔަކަމަށް ޗެއަރ ޕާރސަން އިންތިޚާބުގައި ފައްޔާޒާއި ވާދަކުރެއްވި އިމްތިޔާޒު ފަހުމީ ވަނީ ތުހުމަތުކުރައްވާފަ އެވެ.

އޭގެ އިތުރުން ރައީސް ޔާމީން އަތޮޅުތެރެއަށް ކުރައްވާ ދަތުރުފުޅުތަކުގައި އެމަނިކުފާނަށް މަރުހަބާ ދެންނެވުމަށް ނިކުތުން މަނާކޮށް އެފަދަ ކަމެއް ފެނިއްޖެ ނަމަ ފިޔަވަޅު އަޅާނެކަމުގެ ބިރު ސަރުކާރު ކުންފުނިތަކުގެ މުވައްޒަފުންނަށް ދައްކާފައިވާ މައްސަލަތަކެއް އައްޑޫ ދަތުރުގައި ފެންމަތިވެގެން ގޮސްފައިވެއެވެ.

ސަރުކާރުން ހަދަމުންދާ ތިންނަމަ ގޯހެއްކަމަށް ޑރ ޖަމީލު ވިދާޅުވެފައިވަނީ ޕާޓީގެ ރައީސް މުހައްމަދު ނަޝީދު ނިކަމެތިކުރުމެވެ.

ރައީސް ސޯލިހު ވެރިކަމަށް ވަޑައިގަތުމާއެކު ނަޝީދު ޕާޓީއިން އެއްފަރާތްކުރުމަށް މަސައްކަތް ކުރަމުންދާކަމަށް ނަޝީދުގެ ވަފާތެރިން ދަނީ ވިދާޅޫވަމުންނެވެ. އެ ވާހަކަތައް އެމްޑީޕީގެ ޗެއަރާރސަން އިންތިޚާބުގެ ތެރޭގައި ފެންމަތިވެފައިވާއިރު އެމްޑީޕީގެ ރިޔާސީ ޕްރައިމަރީގައި ދެ ރައީސުން ވާދަކުރައްވަން ފެއްޓެވުމާއެކު އެ ބަހުސް ވަނީ ހުޅުފަޅައިގެން ގޮސްފައެވެ.

އެގޮތުން ނަޝީދަށް ކުޑައިމީސްވާ ގޮތަށް ރައީސް ސޯލިހުގެ މެމްބަރުން އެކި ބަސްތައް ރައްދުކުރަމުންދާކަން ފާހަގަކޮށްލެވެއެވެ. އަދި ނަޝީދުގެ ފުރާނަ ދުއްވާލުމަށް ދިން ހަމަލާގެ މައްސަލަވެސް އެކަށީގެންވާ ގޮތެއްގައި ބަލާފައި ނުވުމަކީ ނަޝީދަށް ދިން ނިކަމެތި ކަމެއްކަމަށް އޭނާގެ ވަދާތެރިން ދަނީ ސިފަކުރަމުންނެވެ.

މި ކަންކަމަށް ފާހަގަކުރައްވާ ކުރައްވާ ޑރ ޖަމީލު ވިދާޅުވީ އެއީ ސަރުކާރުން ހަދަމުންދާ ވަރަށް ބޮޑެތި ގޯސްތަކެއްކަމަށެވެ. އެކަމުގެ ސަބަބުން ސަރުކާރަށް ގެއްލުންތަކެއް ލިބިގެންދާނެކަމަށް ޑރ ޖަމީލު ވަނީ އިޝާރާތްކުރައްވާފައެވެ.