މަރުގެ މައްސަލައެއްގެ ތުހުމަތު ގައި ހައްޔަރުކުރި ނިޒާމްގެ ބަންދަށް 60 ދުވަސް

މަރުގެ މައްސަލައެއްގެ ތުހުމަތުގައި އިއްޔެ ފުލުހުން ހައްޔަރު ކުރި، ގދ. ތިނަދޫ / މަނާރު، މުޙައްމަދު ނިޡާމް (45އ)ގެ ބަންދަށް 60 ކްރިމިނަލް ކޯޓުން ޖަހާފައިވާ ކަމަށް ފުލުހުން ބުނެފިއެވެ.

ވިލިމާލެ އިން ތެޔޮ ބޯޓުން ފުރި ފަހުން ޚަބަރެއް ނުވެގެން، ޑިސެމްބަރު މަހުގެ ވަނަ ދުވަހު ފުލުހުންނަށް ރިޕޯޓް ކުރުމާއި ގުޅިގެން މުޙައްމަދު ނިޡާމްގެ އިތުރުން ބަނގްލަދޭޝް ރައްޔިތެއް ކަމުގައިވާ މޮހައްމަދު ލިޓަން (35އ) ފުލުހުން އައީ ހޯދަމުންނެވެ.

އޭގެތެރެއިން، މުޙައްމަދު ނިޡާމް އިއްޔެ މާލޭގައި ހުންނަ ގެސްޓް ހައުސް އަކުން ފެނިފައިވާއިރު، ކޯޓު އަމުރެއްގެ ދަށުން އޭނާ އިއްޔެ ހައްޔަރު ކޮށްފައިވާ ކަމަށް ފުލުހުން ވަނީ ބުނެފައެވެ.

އަދި އޭނާ ހައްޔަރު ކޮށްފައިވަނީ، އޭނާގެ މައްޗަށް ތުހުމަތު ކުރެވޭ މަރުގެ މައްސަލަ އަކާއި ގުޅިގެން ކަމަށްވެސް ފުލުހުން ބުނެފައިވެއެވެ.

މީގެ އިތުރުން, އޭނާގެ ބަންދާއި މެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން 60 ދުވަހަށް އޭނާ ބަންދުކުރަން ކޯޓުން ހުކުމް ކޮށްފައިވާ ކަމަށް ފުލުހުން ވަނީ ބުނެފައެވެ.

ތެޔޮ ބޯޓުން ގެއްލުނު މުހައްމަދު ނިޒާމް މަރުގެ މައްސަލައެއްގެ ތުހުމަތުގައި ފުލުހުން ހައްޔަރު ކޮށްފައިވާއިރު، އެ ބޯޓުން ގެއްލުނު ބިދޭސީ މީހާ އަދިވެސް ނުފެނެއެވެ. ނިޒާމް ހައްޔަރު ކުރީ ބިދޭސީ މީހާގެ މަރުގެ މައްސަލައާއި ގުޅިގެން ކަމަށް ބެލެވުނު ނަމަވެސް ފުލުހުން އަދި އެކަން ކަށަވަރުކޮށްދީފައެއް ނުވެއެވެ.