ނާކާމިޔާބު ވުމަކީ ކޮޅު ބަދަލު ކުރަން ޖެހޭ ސަބަބެއް ނޫން: އިމްރާނު

ނާކާމިޔާބީއާއި ކުރިމަތިލާން ޖެހުމަކީ އެމީހާ ހުރި ގޮތެއްގެ މަތީގައި ދެމި ނުހުރެވެންވީ ސަބަބެއް ނޫން ކަމަށް އަދާލަތު ޕާޓީގެ ރައީސް އަދި ސަރުކާރުގެ ހޯމް މިނިސްޓަރު އިމްރާނު އަބްދުﷲ ވިދާޅުވެއްޖެ އެވެ.

އިމްރާނު މިފަދައިން ވިދާޅުވެފައިވަނީ އަނެއްކާވެސް އެމްޑީޕީއާއެކު ކޯލިޝަން ހަދަން އަދާލަތުން ނިންމުމާއި ގުޅިގެން ފާޑުކިޔުންތައް އަމާޒުވަމުންދާ ދަނޑިވަޅެއްގައި ކުރެއްވި ޓްވީޓެއްގަ އެވެ.

ވަކި މީހެއްގެ ނަން ނުޖައްސަވާ އިމްރާނު ކުރެއްވި އެ ޓްވީޓުގައި ވިދާޅުވީ ސިޔާސީ މަސައްކަތުގައި އިޚްލާސްތެރި ހިތަކައިގެން އެއްގޮތެއްގައި ދިގު މުއްދަތަކަށް މެދިހުރެގެން މެނުވީ ހެޔޮ ނަތީޖާއެއް ނުނެރެވޭނެކަން ވަރަށް ސާފުކޮށް ފެންނަމުންދާ ކަމަށެވެ.

އަދި ނާކާމިޔާބުވުމަކީ އިރުކޮޅު ކޮޅާ ގޮތް ބަދަލުކުރަން ޖެހޭ ސަބަބެއް ނޫން ކަމަށްވެސް އިމްރާނު ވިދާޅުވެފައިވެ އެވެ.

"ސިޔާސީ މަސައްކަތުގައި އިޚްލާސްތެރި ހިތަކައިގެން އެއްގޮތެއްގައި ދިގު މުއްދަތަކަށް މެދިހުރެގެން މެނުވީ ހެޔޮ ނަތީޖާއެއް ނުނެރެވޭނެކަން ވަރަށް ސާފުކޮށް މި ދަނީ ފެންނަމުން. ނާކާމިޔާބުވުމަކީ އިރުކޮޅު ކޮޅާ ގޮތް ބަދަލުކުރަން ޖެހޭ ކަމެއްވެސް ނޫން"

އަދާލަތު ޕާޓީގެ ރައީސް އިމްރާނު އަބްދުﷲ

އިމްރާނުގެ މި ޓްވީޓަކީ ނުސީދާކޮށް އެމްޑީޕީގެ ރައީސް މުހައްމަދު ނަޝީދަށް އަމާޒުކުރެއްވި ޓްވީޓެއްކަމަށްވެސް ބެލެވެއެވެ.

އެއީ، އެމްޑީޕީގެ ރިޔާސީ ޓިކެޓު ހަވާލުކުރާނެ ފަރާތެއް ކަނޑައެޅުމަށް ބޭއްވި ޕްރައިމަރީ އިންތިޚާބުގައި ނާކާމިޔާބު ވުމާއި އެކު ނަޝީދު ވަނީ އެ އިންތިޚާބު ކާމިޔާބު ކުރެއްވި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ފަހަތްޕުޅަށް އަރާވަޑައި ނުގަންނަވާނެކަން އިއުލާނުކުރައްވާފަ އެވެ.

އަދި ރައީސް ޞާލިހަށް ދެވަނަ ދައުރެއް ދޭން ޖެހޭ ސަބަބެއް ނެތްކަމަށް ވިދާޅުވެ ނަޝީދަށް ތާއީދު ކުރައްވާ މެމްބަރުން ގެންދަވަނީ ވަކާލާތު ކުރައްވަމުން ނެވެ.

ކުރިއަށް އޮތް ރިޔާސީ އިންތިޚާބު ކާމިޔާބު ކުރުމަށް ގުޅިގެން މަސައްކަތް ކުރުމަށް ނަޝީދާއި، އޭނާގެ ފެކްޝަންގެ މެމްބަރުންނަށް އެމްޑީޕީގެ އިސް ސަފުގައި މިއަދު ތިއްބެވި ފަރާތްތައް ގޮވާލި ނަމަވެސް، ނަޝީދު އެކަމަށް އަދި މިހާތަނަށް އިޖާބަ ދެއްވާފަ އެއް ނުވެއެވެ.

ބަދަލުގައި ނަޝީދު ގެންދަނަވަނީ ޕާޓީގެ ތެރެއިން "ފިކުރެއްގެ ދިރުން" ނަމުގައި ގޮތްޕެއް އުފެއްދުމަށް މަސައްކަތްޕުޅު ކުރައްވަމުން ނެވެ.