ފޯޅަވަހި މައްސަލައިގައި ޤައުމީ މަސްހަލަތު ދޫކޮށް ސަރުކާރުން އިސްކުރީ އެހެން ބައެއްގެ މަސްލަހަތު: ދުންޔާ

ދިވެހިރާއްޖެއާއި ޗާގޯސްއާއި ދެމެދު އޮތް ކަނޑުގެ ސަރަހައްދުގައި ފުށޫއަރާ ސަރަހައްދެއް އޮތްކަމަށް ބުނެ މޮރިޝަސްއިން އިޓްލޮސްއަށް ހުށައެޅި މައްސަލައިގައި ދިވެހި ސަރުކާރުން ވަކާލާތު ކުރީ ދިވެހި ގައުމުގެ މަސްލަހަތަށްވުރެ އެހެން ބައެއްގެ މަސްލަހަތު އިސްކޮށްގެން ކަމަށް ކުރީގެ ޚާރިޖީ ވަޒީރު ދުންޔާ މައުމޫނު ވިދާޅުވެއްޖެ އެވެ.

ދުންޔާ މިފަދައިން ވިދާޅުވެފައިވަނީ ގާޗޯސް ކަންބޮޑުވާ ފަރާތްތައް ގުޅިގެން ކުރިއަށް ގެންދިޔަ ޕްރެސް ކޮންފަރެންސްއެއްގައި ވާހަކަދައްކަވަމުން ނެވެ.

ދުންޔާގެ ވާހަކަ ފައްޓަވަމުން ވިދާޅުވީ ޑިޕްލޮމަސީ އަކީ ނުވަތަ ޚާރިޖީ ސިޔާސަތަކީ އަބަދުވެސް އެ ޤައުމަށް އެންމެ ފައިދާ ބޮޑުގޮތަށް ނުވަތަ އެ ޤައުމުގެ މަސްލަހަތު އިސްކޮށްގެން ސިޔާސަތު އެކުލަވާލުން ކަމަށެވެ.

އެހެން ނަމަވެސް ފޯޅަވަހި މައްސަލައަށް ބަލާއިރު، ފެންނަނީ ޑިޕްލޮމަސީއާއި ޚިލާފަށް ދިވެހި ސަރުކާރުން އަމަލުކޮށްފައިވާ ކަމަށާއި، މި މައްސަލައިގައި ޤައުމީ މަސްލަހަތު އިސްކުރުމަށް ވުރެ ބޮޑަށް ދިވެހި ސަރުކާރުން ހިމާޔަތްކޮށްފައިވަނީ މޮރިޝަސްގެ މަސްލަހަތުކަން ފެންނަން އޮތްކަމަށް ދުންޔާ ވިދާޅުވި އެވެ.

"އަޅުގަނޑު ދެކޭގޮތުގައި އީއީޒެޑް މައްސަލައިގައި މިފަހަރު ސަރުކާރުން މިވަނީ މޮރިޝަސްގެ މަސްލަހަތު އިސްކޮށްފަ. ނުވަތަ ޔޫކޭގެ މަސްލަހަތުކަމަށް ވެސް ބުނެވިދާނެ، ނުވަތަ މި ސަރަހައްދުގައި އޮތް އެހެން ބައެއްކަމަށް ވެސް ދެންނެވިދާނެ. ހަމަގައިމުވެސް ދިވެހިރާއްޖޭގެ ނުވަތަ ދިވެހިންގެ މަސްލަހަތެއް ނޫން"

ކުރީގެ ޚާރިޖީ ވަޒީރު ދުންޔާ މައުމޫނު

ދުންޔާ ވިދާޅުވީ އިޓްލޮސްގައި އޮތް މައްސަލަ ނިމިގެން ދިޔައީ މޮރިޝަސްއަށް ލިބުނު ކާމިޔާބީއެއް ގޮތުގައި ކަމަށެވެ. ސަރުކާރުން ކާމިޔާބީއެއްކަމަށް ބުނި ނަމަވެސް އެއީ އެއްވެސް ހާލެއްގައި ދިވެހިންނަށް ލިބުނު ކާމިޔާބީއެއް ނޫން ކަމަށް ދުންޔާ ވިދާޅުވި އެވެ.

އެކަންކަން ފާހަގަކުރައްވާ ދުންޔާ ވިދާޅުވީ ދިވެހިރާއްޖޭގެ ކަނޑުގެ ސަރަހައްދުން ބައެއް ގެއްލިގެން ދިޔަ ދިއުމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހާއި، ފޮރިން މިނިސްޓަރު އަބްދުالله ޝާހިދާއި، އެޓާނީ ޖެނެރަލް އިބްރާހިމް ރިއްފަތު ޒިންމާ ނަންގަވަން ޖެހޭނެ ކަމަށެވެ.

މި މައްސަލަ އިތުރަށް ބަލާ، ރައްޔިތުންނަށް ސާފުކޮށްދޭން ޖެހޭކަމަށް ޤަބޫލުކުރައްވާކަމަށް ދުންޔާ ވިދާޅުވި އެވެ.