ސަރަހައްދާއި ގުޅޭގޮތުން ރައްޔިތުންގެ ބަހެއް ނުހޯދާ ސަރުކާރުން ގޮތް ނިންމުމަކީ ގޯހެއް: އެމްއާރުއެމް

ދިވެހިރާއްޖޭގެ ސަރަހައްދުން ބައެއް ދޫކޮށްލެވޭނީ ނުވަތަ ސަރަހައްދާއި ގުޅޭގޮތުން އެއްވެސް ގޮތެއް ނިންމޭނީ ރައްޔިތުންގެ ބަހެއް ހޯދާ ލޮޖުކޮށްގެން ކަމަށާއި، ފޯޅަވަހި މައްސަލައިގައި ސަރުކާރުން އަމަލުކޮށްފައިވަނީ ގޯސްކޮށްކަމަށް ސަރުކާރު ކޯލިޝަންގައި ހިމެނޭ މޯލްޑިވްސް ރިފޯމް މޫވްމަންޓު (އެމްއާރުއެމް) އިން ބުނެފި އެވެ.

ފޯޅަވަހި މައްސަލައިގައި ސަރުކާރުން އަމަލުކޮށްފައިވާ ގޮތް ގޯސްކަން ބަޔާންކުރުމަށް ގިނަ ސިޔާސީ ޕާޓީތަކެއް ހިމެނޭހެން ކުރީެގ ބަންޑާރަ ނައިބުންނާއި ކުރީގެ ވަޒީރުން ގުޅިގެން ވަނީ ޕްރެސް ކޮންފަރެންސްއެއް ބާއްވާފަ އެވެ.

އެ ކޮންފަރެންސްގައި އެމްއާރުއެމް ތަމްސީލު ކުރައްވާފައިވަނީ ޕާޓީގެ ނައިބުރައީސާ އާމިނަތު ނާދިރާ އެވެ.

ނާދިރާގެ ވާހަކަ ފައްޓަވަމުން ވިދާޅުވީ ޗާގޯސް މައްސަލައިގައި ސަރުކާރުން އަމަލުކޮށްފައިވަނީ ރައްޔިތުންނަށް ބޮޑު ގެއްލުމެއް ލިބޭގޮތަށް ކަން އެމްއާރުއެމުން ޤަބޫލުކުރާ ކަމަށެވެ. އަދި ކޯލިޝަން ޕާޓުނަރެއްގެ ހައިސިއްޔަތުން އެ ކަންބޮޑުވުންތައް ސަރުކާރާއިވެސް ހިއްސާކޮށްފައިވާނެކަމަށް ނާދިރާ ވިދާޅުވި އެވެ.

އޭނާގެ ވާހަކައިގައި ވަނީ ފޯޅަވަހި މައްސަލައިގައި ސަރުކާރުން އަމަލުކޮށްފައިވާ ގޮތުގެ ސަބަބުން ދިވެހިރާއްޖޭގެ ކަނޑުގެ ސަރަހައްދުން ބައެއް ގެއްލިގެން ދިއުމާއި ގުޅިގެން އޮތް ކަންބޮޑުވުންތައް ވެސް ހިއްސާ ކުރައްވާފަ އެވެ. އޭގެ ތެރޭގައި ހިމެނެނީ:

1. މަސްވެރިކަން ކުރެވޭ ސަރަހައްދެއް ގެއްލުން

2. މުޅި ރާއްޖޭގެ މަސްވެރިކަމުގެ ސްޓޮކް ހީނަރުވެގެން ދިއުމުގެ ފުރުސަތު މިކަމުގައި ބޮޑުވެގެން ދިއުން

3. ރާއްޖޭގެ ދެކުނުގެ ސަރަހައްދުން ވަގަށް މަސްވެރިކަން ކުރުމުގެ ފުރުސަތު ބޮޑުވެގެން ދިއުން

4. ވާދަވެރި ހަރަކާތްތައް އިތުރުވެ ސަރަހައްދު ބެލެހެއްޓުމުގެ އަގު ބޮޑުވެގެން ދިއުން

5. އެ ސަރަހައްދުގެ ކަނޑާއި ބިމުއަޑީގެ ތަހުލީލުތައް ކުރުމާއި ކަނޑުވެށި މޮނިޓާކުރުމުގެ ފުރުސަތު ގެއްލިގެން ދިއުން

6. އެ ސަރަހައްދުގައި މޫސުމީ އަދި ކާރިސީ ތަހުލީލުތައް ކުރުމުގެ ފުރުސަތު ގެއްލިގެން ދިއުން

7. ދެ ޤައުމުގެ މަސްލަހަޓު ބެލެހެއްޓޭ ޚާރިޖީ ޚަރަދު ވަޒަން ނުކުރެވޭވަރަށް ބޮޑުވެގެން ދިއުން

8. މައްސަލައިގެ ބާވަތުން ދާޚިލީ ހަމަނުޖެހުން އިތުރުވެ އޭގެ ދިފާއީ އަގު ބޮޑުވުން

9. އިންޑިއާ ކަނޑުގެ ސްޓްރެޓެކިޖް ބެލެންސް ގެއްލި ސަރަހައްދުގައި ދެމެހެއްޓިފައިވާ އަމާންކަން ގެއްލުމުގެ ބިރުވެރިކަން އުފެދުން

10. ޤައުމީ އެއްބައިވަންތަކަން ރޫޅޫން

11. ބޭރުގެ އިސްތިއުމާރީ ފިކުރަށް ޖާގަ ހުޅުވިގެން ދިއުން

12. ސަރަހައްދުގައި މިނިވަންކަމާއެކު ދަތުރުކުރަމުންދާ ޝިޕިން ރޫޓުތަކަށް ނޭދެވޭ އަސަރުތައް ކުރުން

ނާދިރާ ވިދާޅުވީ ސަރުކާރު ކޯލިޝަންގައި އޮތަސް ފޯޅަވަހި މައްސަލައިގައި ސަރުކާރުން އަމަލުކޮށްފައިވާ ގޮތް ގޯސްކަމަށް ބުނެ، އެކަމުގައި އެމްއާރުއެމް ނިކުތީ ޤައުމީ މަސްލަހަތު އިސްކޮށްގެން ކަމަށެވެ. އަދި އެ މައްސަލައިގައި ދިވެހިންގެ ހައްޤުތައް ކަށަވަރުކުރުމަށް ސިޔާސީ ޕާޓީތަކާއި، ފަންނީ ބޭފުޅުންނާއި އެކު ގުޅިގެން މަސައްކަތް ކުރުމަށް އެމްއާރުއެމް އޮތީ ތައްޔާރަށްކަމަށް ނާދިރާ ވިދާޅުވި އެވެ.