ވިލިމާލޭ ބަގީގެ ހިދުމަތަށް ބޮޑު ތަރުހީބެއް

މާލޭ ސިޓީ ކައުންސިލުން ވިލިމާލޭގައި ފޯރުކޮށްދެމުންދާ ބަގީގެ ޚިދުމަތަށް މަސްދުވަސް ފުރުނުއިރު، އެ ޚިދުމަތަށް އާއްމުންގެ ބޮޑު ތަރުހީބެއް ލިބިފައިވާ ކަމަށް ސިޓީ ކައުންސިލުން ބުނެފިއެވެ.

މިއަދު މާލެ ސިޓީ ކައުންސިލްގައި ކުރިއަށްދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މާލޭ މޭޔަރ ޑރ މުޙައްމަދު މުޢިއްޒު ވިދާޅުވީ، މިިދިޔަ މަހުުގެ ފަސްވަނަ ދުވަހު ރަސްމީކޮށް ފެށުނު މި ޙިދުމަތަށް އިއްޔެއާއި ހަމައަށް ޖުމުލަ 24328 ދަތުރު ކޮށްފައިވާ ކަމަށެވެ.

އެއީ ބަގީގެ ޚިދުމަތަށްއެދި ގުޅައިގެން 15392 ދަތުރު އަދި ބަގީއަށް ކަނޑައަޅާފައިވާ ރޫޓުން 8936 ދަތުރު ކަމަށް މޭޔަރު ވިދާޅުވިއެވެ.

ވިލިމާލޭގައި ބަގީގެ ޚިދުމަތް ރައްޔިތުންނަށް ފަސޭހަވާނެ ގޮތަށް ފޯރުކޮށްދިނުމަށް މާލެސިޓީ ކައުންސިލުން ވަނީ 10 ބަގީ ގެނެސްފައެވެ. މި ބަގީތަކުގެ ތެރޭގައި، މުދާ އުފުލާ ބަގީ އާއި، ކުއްލި ޙާލަތް ތަކުގައި އިމަރޖެންސީކޮށް ބަލިމީހުންނަށް ދަތުރު ކުރެވޭނެ ގޮތަށް ހެދިފައިވާ ބަގީ ހިމެނެއެވެ.

މީގެ އިތުރުން ހަތަރު ސީޓުގެ ބަގީ އާއި، ހަ ސީޓުގެ ބަގީ އަދި 12 މީހުންގެ ކެޕޭސިޓީ ހިމެނޭ ބަގީ ހިމެނެއެވެ.

ބަގީގެ ރޫޓުން ކުރާ ކޮންމެ ދަތުރަކަށް ދެ ރުފިޔާގެ ފީއެއް ނަގާއިރު، ބަގީ "ޕްރައިވެޓް ހަޔާރ" ގެ ގޮތުގައި ނަގާނަމަ އަގު ތަފާތު ވާެއެގޮތުން ޕްރައިވެޓް ހަޔަރ ގެ ގޮތުގައި ބަގީ ނަގާނަމަ އަގު ތަކަކީ:

. 4 ސީޓްގެ ބަގީއަކަށް 6 ރުފިޔާ

. 6 ސީޓްގެ ބަގީއަކަށް 10 ރުފިޔާ

. 12 ސީޓްގެ ބަގީއަކަށް 15 ރުފިޔާ އެވެ.

މީގެ އިތުރުން 6 އަހަރުން ދަށުގެ ކުޑަކުދިންނާއި 65 އަހަރުން މަތީގެ މީހުންނާއި އެންސްޕާގައި ރެޖިސްޓަރ ވެފައިވާ ނުކުޅެދުންތެރިކަންހުންނަ ފަރާތްތަކާއި ސްކޫލް ޔުނިފޯރމްގައި ދަތުރުކުރާ ދަރިވަރުންނަށް ހިލޭ ބަގީގައި ދަތުރު ކުރެވޭނެއެވެ.

ބަގީގެ ޚިދުމަތަށް އެދުމަށް ގުޅާނީ 7240505 އަށް ކަމަށާއި އަދި އޮންލައިންކޮށް ބަގީގެ ޚިދުމަތަށް އެދޭނީ https://villibuggy.malecity.gov.mv/ އިން ކަމަށް ސިޓީ ކައުންސިލުން މައުލޫމާތުދެއެވެ.