ހައުސިން މިނިސްޓްރީއަށް ގޯތި ދޫކުރެވޭނެ ގާނޫނީ ހަމައެއް ނެތް: މުޢިއްޒު
ބިމާއި ބެހޭ ގާނޫނުގައިވާ ގޮތުން ހައުސިންގ މިނިސްޓްރީއަށް ގޯތި ދޫކުރެވޭނެ ހަމައެއް ނެތް ކަމަށް ކުރީގެ ބަންޑާރަ ނާއިބު އަހުމަދު މުޢިއްޒު ވިދާޅުވެއްޖެއެވެ.
ބިމާ ބެހޭ ގާނޫނުގައިވާ ގޮތުން، ދިރިއުޅުމަށް ގެދޮރު އެޅުމަށާއި، އިމާރާތް ކުރުމަށް، ގޯތި ދޫކުރާނީ، ހައުސިން މިނިސްޓްރީން ކަނޑައަޅައި، އާއްމުކޮށް، ޝާއިޢު ކުރާ އުސޫލުތަކާއި، ކަމާބެހޭ ގަވާއިދުތަކާއި، ގަވާއިދުތަކާއި އެއްގޮތްވާ ގޮތުގެ މަތިން، މިނިސްޓްރީން ކަނޑައަޅާ އުސޫލަކުން އެ ރަށެއްގެ ނުވަތަ ސިޓީ އަކަށް ނިސްބަތްވާ ކައުންސިލަކުން ކަމަށެވެ.
މިކަމަށް އިޝާރާތް ކުރައްވައި މުއިއްޒު ކުރެއްވި ޓްވީޓެއްގައި ވިދާޅުވީ، ބިމާ ބެހޭ ގާނޫނުގެ އެ މާއްދާގައި އެހެން އޮއްވައި، ހައުސިން މިނިސްޓްރީން ގޯތި ދޫކުރެވޭނެ ހަމައެއް ނެތް ކަމަށެވެ.
ގާނޫނުގައި އެފަދައިން ލިޔެފައިވާ ނަމަވެސް، މި ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަހައްދުން ބަންޑާރަ ގޯތި ދޫކުރުމުގެ ކަންކަން ކުރަމުން އަންނަނީ ހައުސިންގ މިނިސްޓްރީން ނެވެ.
އެގޮތުން، އެ ކަމަށްޓަކައި ގުޅީފަޅު ވެސް ހިއްކަން މިހާރު ފަށާފައިވާއިރު، އެކަމުގައި، ޕީޕީއެމްގެ މެޖޯރިޓީ އޮންނަ މާލެ ސިޓީ ކައުންސިލްގެ އެއްވެސް ބަހެއް ހޯދާފައި ނުވާ ކަމަށް އެ ކައުންސިލުން އަންނަނީ ބުނަމުންނެވެ. އަދި އެފަދަ ކަންކަމުގައި، މި ސަރުކާރުން އަމަލު ކުރަމުން އަންނަނީ ލާ މަރުކަޒީ ގާނޫނާއި ޚިލާފަށް ކަމަށްވެސް ސިޓީ ކައުންސިލުން ވަނީ ބުނެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
