ލިސްޓުގައި ނެތް މީހަކަށް ހިޔާ ފުލެޓެއް ނުދެން: ހައުސިންގް މިނިސްޓްރީ

ހިޔާ ފުލެޓްތައް ލިބޭ މީހުންގެ ދާއިމީ ލިސްޓު ނެރުނު އިރު، އޭގައި ނެތް އެއްވެސް މީހަކަށް ފުލެޓް ދީފައި ނުވާނެ ކަމަށް ޕްލޭނިންގ މިނިސްޓްރީން ބުނެފިއެވެ.

މިނިސްޓްރީން މިފަދައިން ބުނެފައި ވަނީ، ހިޔާ ފުލެޓްތައް ލިބޭ މީހުންގެ ދާއިމީ ލިސްޓު ނެރުނު އިރު، އެ ލިސްޓުގައި ނެތް އެއްވެސް މީހަކަށް ފުލެޓް ދީފައިވޭތޯއާއި، ދީފައި ވާނަމަ، އެއީ ކޮން ބަޔަކަށް ކަން ހާމަކުރުމަށް އެދި އަމިއްލަ ފަރާތަކުން އިންފޮރމޭޝަން ކޮމިޝަނަރުގެ އޮފީހަށް ހުށަހެޅި މައްސަލަ އަށް ޖަވާބުދާރީވަމުންނެވެ.

އެގޮތުން މައްސަލަ ހުށަހެޅި ފަރާތުން ބުނެފައިވާ ގޮތުގައި، ހިޔާ ފުލެޓް ލިބުނު މީހުންގެ ލިސްޓު ނެރުނު އިރު، އެ ލިސްޓާއި އެކު، ޝަރުތު ހަމަވެފައި، ފުލެޓް ނުލިބޭ މީހުންގެ ލިސްޓަކާއި، އަދި ޝަރުތު ހަމަ ނުވާ މީހުންގެ ލިސްޓެއްވެސް ނެރެފައިވާ ކަމަށެވެ.

އަދި ފުލެޓް ލިބުނު މީހުންގެ ލިސްޓުގައި ހިމެނޭ މީހުން ފިޔަވައި އެހެން ބަޔަކަށް ފުލެޓް ދިން ތޯ ބެލުމަށް މައުލޫމާތު ސާފުކުރުމަށް އެފަރާތުން ހުށަހެޅުމުން، ހައުސިންގ މިނިސްޓްރީން ދިން ޖަވާބުގައި ވަނީ ލިސްޓުގައި ނެތް މީހަކަށް ފުލެޓް ނުދޭ ކަމަށްވާއިރު، އެއީ އެ ތިން ލިސްޓުގެ ތެރެއިން ކޮން ލިސްޓެއް ކަމެއް މިނިސްޓްރީން ހާމަ ނުކުރާ ކަމަށް މައްސަލަ ހުށަހެޅި ފަރާތުން ފާހަގަކޮށްފައިވެއެވެ.

މީގެ އިތުރުން، ފުލެޓް ލިބޭ މީހުންގެ ދާއިމީ ލިސްޓުގައި ނަންނެތް ފަރާތްތަކަށް ވެސް ފަހުން ފުލެޓް ލިބިފައިވާކަން ފާހަގަކުރައްވައި މައްސަލަ ހުށަހެޅި ފަރާތުން ވަނީ، މިނިސްޓްރީގެ ޖަވާބުގައި ލިސްޓުގައި ނެތް ފަރާތަކަށް ފުލެޓް ނުދޭ ކަމަށް ލިޔުމުގެ އިތުރުން އެއީ ކޮން ލިސްޓެއް ކަންވެސް އެ ޖަވާބުގައި ހާމަކޮށްދެން ޖެހޭ ކަމަށް ވިދާޅުވެފައެވެ.

އޭގެ ޖަވާބުގައި މިނިސްޓްރީން ބުނަމުން ދިޔައީ، މައުލޫމާތު ހޯދަން އެދުނު ފަރާތުގެ ސިޓީގައި، "9 ފެބްރުއަރީ 2021 ގައި ނެރެފައިވާ ހިޔާ ފުލެޓް ލިބޭ މީހުންގެ ދާއިމީ ލިސްޓު"ގައި ހިމެނިފައިވާ ފަރާތްތައް ފިޔަވައި އެހެން ފަރާތްތަކަށް ފުލެޓް ދިން ތޯ ސުވާލު ކޮށްފައިވާ ކަމަށާ، އަދި މިނިސްޓްރީން ޖަވާބު ދިން އިރު، އެ ސިޓީ އާއި ހަވާލާދީ ޖަވާބު ދީފައިވާ ކަމަށެވެ. ވުމާއެކު، އެ ޖަވާބުގައި އަލުން، "9 ފެބްރުއަރީ 2021 ގައި ނެރެފައިވާ ހިޔާ ފުލެޓް ލިބޭ މީހުންގެ ދާއިމީ ލިސްޓު" އެފަދައިން ނުލިޔެ، ހަމައެކަނި، ލިސްޓުގައި ހިމެނިފައިވާ ފަރާތްތައް ފިޔަވައި އެހެން ފަރާތަކަށް ގޯތި ނުދޭ ކަމަށް ބުނި ނަމަވެސް އެ ޖަވާބު ދެވެނީ އެ ސުވާލަށް ކަމަށް މިނިސްޓްރީން ފާހަގަކޮށްފައިވެއެވެ.

އެހެންނަމަވެސް، ޖަވާބު ހޯދަން އެދުނު ފަރާތުން ވަނީ ކުރިއަށް އޮތް ތަނުގައި، އޭ މައްސަލަ ހިފައިގެން އެހެން ތަނަކަށް ދާއިރު، މިނިސްޓްރީގެ ވާހަކަ ބަދަލު ކުރުމުގެ ފުރުސަތު ނޯންނާނީ އެގޮތަށް ސީދާ ޖަވާބު ބަދަލު ކުރުމުން ކަމަށް ބުނެފައެވެ. އަދި އިންފޯމޭޝަން ކޮމިޝަނަރުވެސް ވަނީ އެކަމަށް އެއްބަސްވެވަޑައިގެންފައެވެ.

ނަމަވެސް މިނިސްޓްރީން ވަނީ ސިޓީއާއި ހަވާލާ ދެވުމުން، އެ ޖަވާބު ދެވުނީ ސިޓީގައިވާ ސުވާލަށް ކަމަށް ފާހަގަކޮށް، އެ ބަދަލު ކުރުމުގެ ބޭނުމެއް ނެތް ކަމަށް ބުނެފައެވެ.

އެހެންކަމުން، އިންފޮމޭޝަން ކޮމިޝަނަރު ވެސް ނިންމެވީ، މައުލޫމާތު ހުށަހެޅި ސިޓީގައި އެފަދައިން ވުމުން، އެ ޖަވާބު ދެވެނީ އެ ސުވާލަށް ކަމަށް ނިންމައި މައްސަލަ ނިންމަވާފައެވެ.