ރީ ރެޖިސްޓްރޭޝަން މުއްދަތު މާދަމާ ހަމަވާނެ؛ ދެން މުއްދަތު އިތުރު ނުކުރާނެ: އީސީ

‏ރަށްވެހިވެފައިވާ ރަށްނޫން، އެހެން ތަނެއްގައި ވޯޓުލުމަށް، ރީ-ރަޖިސްޓްރޭޝަނަށް ހުޅުވާލި މުއްދަތު މާދަމާ (2023 އޮގަސްޓު 5 ވާ ހޮނިހިރު ދުވަހު) ގެ ނިޔަލަށް، ހަމަވާނެ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.

އީސީގެ ނާއިބު ރައީސް އިސްމާއީލް ހަބީބު ކުރެއްްވި ޓުވީޓެއްގައި ވިދާޅުވީ، ރީ-ރަޖިސްޓްރޭޝަންގެ މުއްދަތު މާދަމާ ހަމަވާއިރު، އެ މުއްްދަތު ދެން އިތުރު ނުކުރާނެ ކަމަށެވެ.

ވީމާ، ވޯޓުދިނުމުގެ ޙައްޤު ލިބިފައިވާ ކޮންމެ ބޭފުޅަކުވެސް، 1414 އަށް ގުޅުއްވައިގެން ނުވަތަ މެސެޖް ކުރައްވައިގެން، އެ ބޭފުޅަކު މިހާރު ރަޖިސްޓަރީ ވެފައިވާ ތަން ޗެކް ކުރުމަށް ހަބީބު ވަނީ އެދިލައްވާފައެވެ. އަދި މިހާރު ރަޖިސްޓަރީ ވެފައިވަނީ، ވޯޓުލާ ދުވަހު ހުންނަ ރަށް، ނޫންކަމަށްވާނަމަ، ވޯޓުލަން ބޭނުންވާ ތަނަކަށް، އަވަހަށް ރީ-ރަޖިސްޓްރީ ކުރުމަށް ހަބީބު ވަނީ އެދިލައްވާފައެވެ.

ހަބީބު ވިދާޅުވީ ރީ ރެޖިސްޓްރޭޝަން އަށް ދެން ދެވަނަ ފުރުސަތެއް ނުލިބޭނެ ކަމަށާ، ރީ-ރަޖިސްޓްރޭޝަނަށް، އިތުރު މުއްދަތު ދެވެންނެތީ، އިންތިހާބުގެ މަސައްކަތްތަކުގެ އިންތިޒާމުތަކަށް، ބުރޫއަރާނެތީ ކަމަށެވެ.

އެހެންނަމަވެސް، މިހާރު ރަޖިސްޓްރީކޮށްފައިވާ ތަނުގައި، ވޯޓުފޮށްޓެއް ނުބެހެއްޓޭ ޙާލަތުގައި، އެފަދަ ފަރާތްތަކަށް ދެވަނަ ފުރުސަތެއް ލިބޭނެ ކަމަށާ، އެގޮތަށް ދިމާވާނީ، ރާއްޖޭން ބޭރާއި ރިސޯޓްތަކަށް ރީ-ރަޖިސްޓްރީ ކޮށްފައިވާ މީހުންނަށް ކަމަށްވެސް ހަބީބު ވިދާޅުވި އެވެ.

މިއާއެކު އޭނާ ވިދާޅުވީ، އެންމެ ފަހުވަގުތަށް މަޑުނުކޮށް، ރީ-ރަޖިސްޓްރީ ގެ ކަންތައްތައް ނިންމެވުމަށް، ހުރިހާ ބޭފުޅުންނަށް އަދި ކެންޑިޑޭޓުންނަށާއި، ސިޔާސީ ޕާޓީތަކަށް، އީސީ އިން އިލްތިމާސް ކުރާ ކަމަށެވެ. އަދި މިހާރު ރަޖިސްޓަރީ ކުރެވިފައިވާ ތަން ޗެކްކޮށް ލެއްވުމަށް، ވީއާރު ޖެހުމަށްފަހު، އައިޑެންޓިޓީ ކާޑުގެ ނަންބަރު ޖައްސަވާ 1414 އަށް އެސްއެމްއެސް ކުރުމުން އެނގިގެންދާނެ ކަމަށް އޭނާ ވިދާޅުވި އެވެ.