ރިޔާސީ ކެންޑިޑޭޓުންގެ ނަން ތަރުތީބު ކުރުން މިމަހު 9 ގައި!

ރިޔާސީ އިންތިހާބު 2023 އަށް ކުރިމަތިލާ މީހުންގެ ތެރެއިން، ޝަރުތު ފުރިހަމަވާ މީހުންގެ ނަންތައް ތަރުތީބު ކުރުމަށްޓަކައި، ގުރުއަތުލުން 2023 އޮގަސްޓު 9 ވާ ބުދަދުވަހު އޮންނާނެ ކަމަށް އިލެކްޝަންސް ކޮމިޝަނުން ބުނެފިއެވެ.

އިލެކްޝަން ކޮމިޝަންގެ ނާއިބު ރައީސް އިސްމާއީލް ހަބީބު ކުރެއްްވި ޓުވީޓެއްގައި ބުނީ، ރިޔާސީ ކެންޑިޑޭޓުންގެ ނަން ތަރުތީބު ކޮށް، ކެންޑިޑޭޓު ނަންބަރު ދިނުން އޮގަސްޓު ނުވަ ވަނަ ދުވަހު ހަވީރު 4:30 ން 5:30 އަށް، ދަރުބާރުގޭގެ ރަންނަބަނޑޭރި މާލަމުގައި ކުރިއަށްދާނެ ކަމަށެވެ.

އަދި މި ރަސްމިއްޔާތުގައި، ކެންޑިޑޭޓަކަށް ބައިވެރިވެ ނުވެވޭ ޙާލަތުގައި، މަންދޫބަކު ބައިވެރިވެ ކުރެވިދާނެ ކަމަށާ، މިކަމާގުޅޭ ތަފްސީލް، އީސީ އިން ކެންޑިޑޭޓުންނަށް އަންގާނެ ކަމަށް އޭނާ ވިދާޅުވި އެވެ.

ރިޔާސީ އިންތިހާބުގައި ވާދަކުރުމުގެ ފުރުސަތު މިމަހު 7 ވަނަ ދުވަހު ހަމަވާއިރު، އަދި މިހާތަނަށް ކެންޑިޑެސީ ފޯމު ހުށަހެޅުއްވީ ކުރީގެ ރައީސް، އަދި އިދިކޮޅު ޕީޕީއެމް/ޕީއެންސީގެ ރިޔާސީ ޓިކެޓް އަރުވާފައިވާ ރައީސް ޔާމީން އަބްދުލްގައްޔޫމް އެކަންޏެވެ.

ނަމަވެސް އެމަނިކުފާނު ޖަލުގައި ހުންނެވުމުން އެމަނިކުފާނުގެ ކެންޑިޑެސީ ފޯމް އީސީން ބަލައި ނުގަތުމުން މިހާރު އިދިކޮޅުުން ވަނީ އެ މައްސަލަ ސްޕްރީމް ކޯޓަށް ހުށަހަޅާފައެވެ. މައްސަލައިގެ އަޑުއެހުން މިއަދަށް ވަނީ ތާވަލްކޮށްފަ އެވެ.

ރައީސް ޔާމީންގެ އިތުރުން، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާއި، ދަނގެތީ ދާއިރާގެ މެމްބަރު މުހައްމަދު ނާޒިމް، އާއި، ޖޭޕީގެ ލީޑަރު ގާސިމް އިބްރާހިމް އާއި، އެމްއާރުގެ ރައީސް ފާރިސް މައުމޫނުގެ އިތުރުން ޕީއެންސީގެ ފަރާތުން މާލެ ސިޓީ ކައުންސިލްގެ މޭޔަރު ޑރ. މުހައްމަދު މުޢިއްޒު އާއި ޑިމޮކްރެޓްސް އިން ހުޅުދޫ ދާައިރާގެ މެންބަރު އިލްޔާސް ލަބީބް އަދި އަމިއްލާ ގޮތުން އުމަރު ނަސީރު ވެސް ރިޔާސީ އިންތިހާބުގައި ވާދަކުރައްވައެވެ. އެބޭފުޅުން އަދި އިންތިޚާބުގައި ވާދަކުރައްވަން ފޯމު ނުލައެވެ.