ފަހަތުން އަރައި މާޒިޔާ އިން އީގަލްސް މޮޅުވިޔަނުދީ ހިފަހައްޓައިފި!

އެމްޑަބްލިއުއެސްސީ ދިވެހި ޕްރެމިއާ ލީގުގައި މިރޭ އެންމެ ފަހުގެ މާޒިޔާ އާއި ކުލަބް އީގަލްސް ވާދަކުރި މެޗު 2-2 ގެ ނަތީޖާއަކުން އެއްވަރުވެ ލީގު ތާވަލުގެ އެއްވަނައަށް އަރަން ލިބުނު ފުރުސަތު އީގަލްސް އިން ނަގާލައިފިއެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ކްލަބް އީގަލްސް އިންނެވެ. މިލަނޑު ފުރަތަމަ ހާފުގެ 9 ވަނަ މިނެޓުގައި ކާމިޔާބުކޮށްދިނީ އެޓީމުގެ ބްރެޒިލްގެ މިޑްފީލްޑަރު އިވާން އެވެ. މިއީ އެޓީމުގެ ކެޕްޓަން ރިޒްވާން ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އީގަލްސްގެ ލަނޑަށްފަހު މާޒިޔާ އިން މެޗު ޑޮމިނޭޓުކުރި ނަމަވެސް މިހާފުގައި އީގަލްސްގެ ގޯލާއި އަމާޒުކޮށް އެޓީމަށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ.

މި މެޗުގައި އީގަލްސް އިން ކާމިޔާބުކުރި ދެވަނަ ލަނޑު ފުރަތަމަ ހާފުގެ 44 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން އަހުމަދު ރިޒްވާން އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އީގަލްސް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ބޯކޮށް ވާރޭ ވެހުމުގެ ސަބަބުން ދެޓީމަށް ވެސް ކުޅެން އުނދަގޫވިއިރު، މި މެޗުގައި މާޒިޔާ އިން ކާމިޔާބުކުރި ފުރަތަމަ ލަނޑު މެޗުގެ 72 ވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް އަލީ ފާސިރު އެވެ.

މިއީ އަރިމަތިން ހަލީލް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. އަދި ޖެހިގެން އައި މިނެޓުގައި އެޓީމުގެ ހަސަން ރާއިފް އަހުމަދު ވަނީ އިތުރު ލަނޑެއް ކާމިޔާބުކޮށް އެޓީމަށް މެޗުގެ ނަތީޖާ އެއްވަރުކޮށްދީފައެވެ.

މި ލަނޑާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ. މިމެޗުގެ މޭން އޮފް ދަ މެޗަކަށް ހޮވުނީ މާޒިޔާގެ ހަސަން ރާއިފް އަހުމަދު އެވެ.

މި މެޗުން ލިބުނު އެއް ޕޮއިންޓާއެކު ކުޅުނު 7 މެޗުން މާޒިޔާއަށް 19 ޕޮއިންޓް ލިބިފައިވާއިރު, މިވަގުތު ލީގު ތާވަލުގެ އެއްވަނައިގައި އޮތީ އެޓީމެވެ. ލީގު ތާވަލުގެ ދެވަނައިގައި އޮތް އީގަލްސް އަށް 7 މެޗު ކުޅެގެން 17 ޕޮއިންޓް ލިބިފައިވާއިރު، ލީގުގައި މިހާތަނަށް މިދެޓީމު މެޗަކުން ބަލިވެފައެއް ނުވެއެވެ.