އީޕީއޭ އަކީ އެފްކޯންސްގެ ޑިޕާޓުމަންޓެއް ނޫން: ސައީދު

އެންވައަރުމަންޓު ޕްރޮޓެކްޝަން އޭޖެންސީ(އީޕީއޭ) އަކީ ތިލަމާލެ ބްރިޖުގެ މަސައްކަތް ހަވާލުކޮށްފައިވާ އިންޑިއާގެ އެފްކޯންސް ކުންފުނީގެ ޑިޕާޓުމަންޓެއް ނޫންކަމަށް މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.

ސައީދު މިފަދައިން ވިދާޅުވެފައިވަނީ ތިލަމާލެ ބްރިޖުއެޅުމަށް އެފްކޯންސް ކުންފުނިން ހެދި ޕްލެޓްފޯމު ހައްޔަރުން ނެއްޓި ވިލިމާލޭ ފަރަށް އެރުމާއި ގުޅިގެން މިހާތަނަށް އެފަރަށް ލިބުނު ގެއްލުން ދެނެގަތުމުގެ މަސައްކަތް އީޕީއިން ފަށާފައިނުވާތީ ނުރުހުން ފާޅުކުރައްވާ ކުރެއްވި ޓްވީޓެއްގައެވެ.

ފްލްޓުފޯމު ފަރަށް އެރުމާއި ގުޅިގެން ލިބުނު ގެއްލުންތައް ދެނެގަތުމުގެ މަސައްކަތާއި ގުޅޭގޮތުން އީޕީއޭއިން ބުނީ ޕްލެޓުމޯނު ފަރަށް އެރުމުގެ ސަބަބުން ބައެއް ތަކެތި އެ ސަރަހައްދަށް ވެއްޓިފައިވާކަމަށެވެ. އަދި ޕްލެޓްފޯމުގެ ސަބަބުން ފަރަށް ލިބުނު ގެއްލުން ދިރާސާ ކުރުމުގެ މަސައްކަތް ފެށޭނީ އެފްކޯންސް ކުންފުނިން އެތަން ސާފުކުރުމުންކަމަށް އީޕީއޭއިން ވަނީ ބުނެފައެވެ.

ފަރަށް ލިބުނު ގެއްލުން ދިރާސާނުކޮށް ލަސްކުރަމުންދާ ދިއުމާއި ގުޅިގެން ނުރުހުން ފާޅުކުރައްވާ ސައީދު ކުރެއްވި ޓްވީޓެއްގައި ވިދާޅުވީ އީޕީއޭއަކީ އެފްކޯންސްގެ ޑިޕާޓުމަންޓެއް ނޫންކަމަށެވެ. ގާނޫނު ޒިންމާ އޮތްކަމެއްގައި ސަރުކާރުގެ ނުފޫޒު އިސްކުރާކަމަށް ނުޖެހޭކަމަށް ސައީދު ވިދާޅުވިއެވެ.

އީޕީއޭއަށް ފާޑުކިޔުން އަމާޒުކުރައްވާ ސައީދު އިތުރަށް ވިދާޅުވީ، މީގެ ކުރިން އެ އިދާރާއަކީ ރިސޯޓަކުން ނުވަތަ ރަށެއްގެ ގޮނޑުދޮށުން އާންމު ފަރުދަކު ވެލިމުށެއް ނެގިޔަސް ގައުމު ހުއްޓުމަކަށް ގެންނަ އިދާރާއެއްކަމަށެވެ.

އެއާއެކު އޭނާ ވަނީ އިންޑިއާގެ އެފްކޯންސްއާއި ޖެހުމުން ރާއްޖޭގެ ތިމާވެއްޓަށް ލިބުނު ގެއްލުން ދިރާސާކުރުން ފަސްކުރުމަށް ގިނަ ހުތްޖަތްތަކެއް ދައްކާ ސަބަބަކީ ކޮބައިތޯ އައްސަވާ ސުވާލުވެސް ކުރައްވާފައެވެ.

ތިލަމާލެ ބްރިޖުއެޅުމުގެ މަސައްކަތް ކުރުމަށް އިންޑިއާގެ އެފްކޯންސް ކުންފުނިން ހެދި ޕްލެޓްފޯމު ހައްޔަރުން ނެއްޓި ވިލިމާލޭ ފަރަށް އެރީ އޯގަސްޓުމަހުގެ 16ގައެވެ.

އެފްކޯންސް ކުންފުނިން ޕްލެޓްފޯމު ފުންކޮށްފައިވަނީ ފަރަށް އެރުމުގެ ސަބަބުން ވިލިމާލޭ ފަރަށް ބޮޑެތި ގެއްލުންތަކެއް ލިބެމުންދާކަން ފާހަގަކޮށް އެ ދާއިރާގެ މަޖިލީސް މެމްބަރު ކުއްލި މައްސަލައެއް ހުށައަޅާ، އެތައް ކަންބޮޑުވުންތަކެއް ފާޅުކުރިން ފަހުންނެވެ.

ޕްލެޓް ފޯމު ފުންކުރުމަށް ގާތްގަނޑަކަށް ދެ ހަފްތާގެ މުއްދަތެއް ނަގާފައިވާއިރު، އަދިވެސް އެ ސަރަހައްދު އެ ކުންފުން ސާފުކޮށްފައެއް ނުވެއެވެ.

މީގެ ކުރިން މިފަދަ މައްސަލަތަކުގައި ކުންފުނިތައް ބޮޑެތި އަދަދުތަކުން ޖޫރިމަނާކޮށްފައިވެއެވެ. އެހެން ނަމަވެސް އެފްކޯންސް ކުންފުނީގެ އިހުމާލުން ވިލިމާލޭ ފަރަށް ލިބުނު ގެއްލުންތައް ދެނެގަތުމުގެ ދިރާސާގެ މަސައްކަތް އަދި އީޕީއޭއިން ފަށާފައިވެސް ނުވާކަން ފާހަގަކޮށްލެވެއެވެ.