ޕްރިމިއާ ލީގު: ވީއޭއާރުގެ ނިންމުމާއި އެކު ޗެލްސީއިން ވެސްޓްހަމް ބަލިކޮށްފި

ޕްރިިމިއާ ލީގުގައި ލަންޑަނަށް ނިސްބަަތްވާ ދެ ޓީމު ކަމަށްވާ ޗެލްސީއާއި ވެސްޓްހަމްއިން ކުޅުނު މެޗު ވީއޭއާރުގެ ނިންމުމާއި އެކު ޗެލްސީއިން ކާމިޔާބު ކޮށްފިއެވެ.

މެޗުން ޗެލްސީ 2-1 ގެ ނަތީޖާއަކުން މޮޅުވިއިރު، މެޗުގެ 90 މިނެޓު ހަމަވެގެން ދެއްކި އިތުރު ވަގުތުގައި ވެސްޓް ހަމްއިން ނަތީޖާ ހަމަކުރި ނަމަވެސް ވީއޭއާރުން ވަނީ އެ ގޯލު ޖެހުމުގެ ތެރޭގައި ޗެލްސީގެ ކީޕަރ މެންޑީއަށް ފައުލް ވެފައިވާ ކަމަށެވެ.

ޗެލްސީގެ ދަނޑުގައި ކުޅުނު މި މެޗުގެ ފުރަތަމަ ހާފުގައި ދެޓީމުން ކުރެ އެއްވެސް ޓީމަކަށް ގޯލެއް ޖެހިފައިނުވާއިރު، މެޗުގެ 62 ވަނަ މިނަޓުގައި ފުރަތަމަ ގޯލު ޖަހާ ލީޑު ނެގީވެސް ވެސްޓްހަމްއިންނެވެ. މި ގޯލު އެ ޓީމަށް ކާމިޔާބު ކޮށްދިނީ މިކައެލް އެންޓޮނީއެވެ.

ޗެލްސީއިން މެޗުގެ ނަތީޖާ އެއްވަރު ކުރީ 76 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ނިކުތް ބެން ޗިލްވެލްއެވެ. މެޗުން ޗެލްސީ މޮޅުކޮށްދިން ގޯލު އެ ޓީމަށް މެޗުގެ 88 ވަނަ މިނަޓުގައި ކާމިޔާބު ކޮށްދިނީ ކައި ހާވޭޒްއެވެ.

މެޗަށްފަހު ވެސްޓްހަމްގެ ކޯޗު މޮޔެސް އަދި ކުޅުންތެރިން ވަނީ ރެފްރީގެ ނިންމުމާއި މެދު ވަރަށް ބޮޑަށް ފާޑު ކިޔާފައެވެ. އެ ގޮތުން އެ ޓީމުގެ ކެޕްޓަން ޑެކްލަން ރައިސް ވަނީ މިއީ މިހާތަނަށް ވީއޭއާރުން ނިންމި އެންމެ ގޯސް ނިންމުން ކަމަށް ބުނެ ޓްވީޓް ވެސް ކޮށްފައެވެ.

މި މެޗު ކާމިޔާބު ކުރުމާއި އެކު ޗެލްސީއިން ވަނީ މި ސީޒަނުގެ ޕްރިމިއާ ލީގުގައި އެ ޓީމު ކުޅުނު 6 މެޗުން 10 ޕޮއިންޓު ހޯދާފައެވެ.

ޗެލްސީއިން ލީގުގައި ދެން ނުކުންނާނީ މި ސީޒަނުގައި ރަނގަޅު ކުޅުމެއް ދައްކަމުންދާ ފުލަމްއިންނެވެ. ނަމަވެސް އޭގެ ކުރިން އެ ޓީމުން ޗެމްޕިއަންސް ލީގުގައި ޒަގްރެބާއި ދެކޮޅަށް އަމިއްލަ ދަނޑުގައި ކުޅޭނެއެވެ.