ޕްރެޒިޑެންޓްސް ޓޫރިޒަމް ގޯލްޑް އެވޯޑް 77 ފަރާތަކަށް

"ޕްރެޒިޑެންޓްސް ޓޫރިޒަމް ގޯލްޑް އެވޯޑްސް" ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު 77 ބޭފުޅަކަށް ދެއްވައިފިއެވެ.

މިއެވޯޑުތައް ދެއްވާފައިވަނީ ފަތުރުވެރިކަމަށް 50 އަހަރުފުރުން ފާހަގަކުރުމަށް ކުރުނބާ ވިލެޖުގައި ބޭއްވި ގާލާ އީވްނިންގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙެވެ.

އެގޮތުން ފާއިތުވި 50 އަހަރުގެ ތެރޭގައި ފަތުރުވެރިކަމަށް އެކި ގޮތްގޮތުން ޚިދުމަތްކޮށްދެއްވި 77 ފަރާތަަކަށް ރައީސުލްޖުމްހޫރިއްޔާ ވަނީ އެވޯދް ދީފައެވެ.

"ޕްރެޒިޑެންޓްސް ޓޫރިޒަމް ގޯލްޑް އެވޯޑްސް" ރައީސުލްޖުމްހޫރިއްޔާ ދެއްވާފައިވާ ބޭފުޅުންގެ ތެރޭގައި ފަތުރުވެރިކަން ރާއްޖެއަށް ތައާރަފްކުރެއްވުމަށް މަސައްކަތްކުރެއްވި މިހާރުގެ ހެލްތު މިނިސްޓަރ އަހުމަދު ނަސީމް، އެމްޔޫ އުމަރު މުހައްމަދު މަނިކު އަދި ޗަމްޕާ ހުސެއިން އަފީފް ހިމެނެއެވެ. ރައީސްގެ ވާހަކަފުޅުގައިވެސް މިތިން ބޭފުޅުން ކުރެއްވި މަސައްކަތުން ނަމޫނާ ނެގުމަށް ޒުވާނުންނަށް ވަނީ ގޮވާލައްވާފައެވެ.

ރާއްޖޭގައި ފަތުރުވެރިކަން އެހެން ޙަރުފަތަކަށް ގެންދެވުމަށް ރައީސް މުޙައްމަދު ނަޝީދު ގެސްޓހައުސް ޓޫރިޒަމް ފައްޓަވާ ކޮށްދެއްވި ޚިދުމަތް ފާހަގަކޮށް އެމަނިކުފާނަށްވެސްވަނީ އެވޯޑު ދެއްވަފައެވެ. އަދި ރައީސުލްޖުމްހޫރިއްޔާގެ ނައިބު ފައިސަލް ނަސީމް އުމުރުން 17 އަހަރުގައި ފަތުރުވެރިކަމުގެ ދާއިރާއަށް ވަންނަވައި މިދާއިރާއިން ޒުވާނުން ބިނާކުރުމަށް ހޭދަކުރެއްވި 27 އަހަރުގެ އަގުވަޒަންކޮށްވަނީ އެވޯޑު ދެއްވާފައެވެ.

އަދި ރާއްޖޭގެ ރައީސުލްޖުމްހޫރިއްޔާކަން ކުރެއްވި ބޭފުޅުންނަށް އެބޭފުޅުންގެ ޒަޢާމަތުގައި ފަތުރުވެރިކަން ކުރިއަރުވައި ތަރައްޤީކުރުމަށް ކޮށްދެއްވި މަސައްކަތް ފާހަގަކޮށް ޕްރެޒިޑެންޓްސް ޓޫރިޒަމް ގޯލްޑް އެވޯޑް ދެއްވާފައެވެ. މިގޮތުން ރާއްޖޭގެ ދެވަނަ ޖުމްހޫރިއްޔާގެ ފުރަތަމަ ރައީސް އިބްރާހިމް ނާސިރު ރާއްޖޭގެ ފަތުރުވެރިކަން ފައްޓަވާ ދެއްވުމަށް ކުރެއްވި މަސައްކަތްޕުޅާއި، ރައީސް އަލްއުސްތާޛު މައުމޫން ޢަބްދުލްޤައްޔޫމް ރާއްޖޭގެ ފަތުރުވެރިކަން ބައިނަލްއަޤުވާމީ ބްރޭންޑަކަށް ހެއްދެވުމަށް ކޮށްދެއްވި މަސައްކަތް ފާހަގަކުރައްވާވަނީ އެވޯޑު ދެއްވާފައެވެ.

މީގެ އިތުރުންވެސް ގެސްޓް ހައުސް އާއި، ޑައިވިން ސެންޓަރުތަކާއި ފަންނުވެރިކަމުގެ ދާއިރާއިންނާއި ފަތުރުވެރިކަމާއި ގުޅުންހުރި ވިޔަފާރިކުރުމުގެ ދާއިރާއިން ފާހަގަކޮށްލެވޭ މަސައްކަތްތަކެއް ކުރައްވާފައިވާ ބޭފުޅުންނަށް ވަނީ އެވޯޑް ދެއްވާފައެވެ. މީގެ ތެރޭގައި ބޭރުގެ ބައެއް ބޭފުޅުންނާއި ޖަމިއްޔާތަކާއި ޓެލެކޮމިޔުނިކޭޝަން ދާއިރާގެ ބޭފުޅުން ހިމެނެއެވެ.