ވެހިކަލެއް ނެތް ރަށްރަށުގައިވެސް ސަރުކާރުން މުސާރަ ދޭ ޑްރައިވަރުން އެބަ ތިބި: އާޒިމް
ސަރުކާރު ހިންގުމަށް ރައްޔިތުންގެ އަތުން ފައިސާ ނަގަމުންދާއިރު ސަރުކާރުގެ ޚަރަދުތައް ކުޑަކުރުމަށް އެއްވެސް މަސައްކަތެއް ކުރަމުން ނުދާކަން ފާހަގަކުރައްވާ މަޖިލިހުގެ މެދުހެންވޭރު ދާއިރާގެ މެމްބަރު އަލީ އާޒިމް ސަރުކާރަށް ފާޑުވިދާޅުވެއްޖެއެވެ.
އާޒިމް ވިދާޅުވީ ސަރުކާރުގެ ޚަރަދުތައް ކުޑަކުރުމަށް ފިނޭންސް މިނިސްޓްރީއިން އަންގާފައި ވީނަމަވެސް އެ އަމުރަށް އެއްވެސް ވަރަކަށް އަމަލުކުރަމުން ނުދާކަމަށެވެ. އެގޮތުން ސިޔާސީ މަގްސަދުތައް ހާސިލުކުރުމަށް ސިޔާސީ މަގާމުތަކަށް މީހުން އައްޔަން ކުރަމުންދާއިރު، ބޭނުންނުހިފޭ ވަޒީފާތައް އުފައްދައިގެންވެސް ވަޒީފާތައް ދެމުންދާކަމަށް އާޒިމް ވިދާޅުވިއެވެ.
އޭގެ ތެރޭގައި ބައެއް ރަށްރަށުގައި ދުއްވާނެ ވެހިކަލެއް ނެތް އިރު ޑްރައިވަރުންގެ ގޮތުގައި ވަޒީފާތައް ދީގެން އެމީހުންނަށް ސަރުކާރުން މުސާރަ ދެމުންދާކަން އާޒިމް ފާހަގަކުރެއްވިއެވެ.
"ވަޒީފާ ދިނުމުގެ ވިސްނުމުގައި އެބަދޭ، ދުއްވާ ވެހިކަލެއް ނެތް ރަށްރަށުގައި އެބަތިބި ހަމައެކަނި ސިޔާސީ މަގްސަދަށްޓަކައި ޑްރައިވަރުން ގެ ވަޒީފާ ދީފަ. ވެހިކަލެއް ނެތް ރަށްރަށުގައި ތިން ހަތަރު މީހުންނަށް ވަޒީފާ ދީފައި، އޭ ކީއްވެގެން، ހަމައެކަނި އެންމެ ބޭނުމަކަށް، ސިޔާސީ ގޮތުން އޭނާ އަށް ދޭން ޖެހޭ ތަންކޮޅެއް ބޮޑު އާއިލާއަކަށް ވީމަ"
މެދުހެންވޭރު ދާއިރާގެ މެމްބަރު އަލީ އާޒިމް
އާޒިމް އިތުރަށް ވިދާޅުވީ ފިނޭންސް މިނިސްޓްރީގެ ސަރކިއުލާގައި ޚަރަދު ކުޑަކުރުމުގެ ގޮތުން ސަރުކާރުގެ އިވެންޓުތައް މަދުކުރުމަށް އަންގާފައިވާކަމަށެވެ.
އެހެން ނަަމަވެސް ފާއިތުވި ހަފްތާގައިވެސް ސަރުކާރުން އެތައް އިވެންޓެއް ބާއްވާފައިވާއިރު، އެއިން އެއްވެސް އިވެންޓަކުން ރައްޔިތަކަށް ކުރި މަންފާއެއް ނެތްކަމަށް އޭނާ ވިދާޅުވިއެވެ.
އެކަންކަން ފާހަގަކުރައްވާ އާޒިމް ވިދާޅުވީ ސަރުކާރުގެ ޚަރަދުތައް ކުޑަ ނުކޮށް، ސަރުކާރު ހިންގުމަށް ރައްޔިތުންގެ އަތުން ނަގާ ޓެކްސް ބޮޑުކުރަން ހުށައެޅުމަކީ ބަލައިގަނެވޭނެ ކަމެއް ނޫންކަމަށެވެ. އަދި ސަރުކާރު ހިންގުމަށް ރައްޔިތުންގެ އަތުން ނަގާ ޓެކްސް ބޮޑު ނުކޮށް، އެހެން ގޮތެއް ހޯދަން ޖެހޭކަމަށް އާޒިމް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
