ޒަރީރަށް ހަމަލާދިން މައްސަލާގައި ތިން މީހަކަށް ދައުވާ ކުރަން ފޮނުވައިފި!

ރައްޔިތުން މަޖްލިސްގެ މަތިވެރި ދާއިރާގެ މެމްބަރު ޙަސަން ޒަރީރު ހަމަލާ ދިން މައްސަލައިގައި ތިން މީހަކަށް ދައުވާ ކުރަން ފޮނުވައިފިއެވެ.

މިދިޔަ މެއި މަހުގެ ފުރަތަމަ ދުވަހުގެ ފަތިހު ހަބީބީ ކެފޭ އެންޑް ބިސްޓްރޯ ތެރޭގައި އިންނަވަނިކޮށް ޒަރީރަށް, ފަސް މީހުންގެ ގްރޫޕަކުން ވަނީ ހަމަލާދީފައެވެ. މަރުތޭލައަކުން ޖަހައި ބޯ ފަޅާލުމުގެ އިތުރުން އެހެން ބައެއް އަނިޔާތަށް ވެސް އޭނާއަށް ވަނީ ލިބިފައެވެ.

މިކަމާއި ގުޅިގެން ޕީޖީ އޮފީހުން މިއަދު ބުނީ، މޭ 2023 ޒަރީރަށް ނުރައްކާތެރި ހަތިޔާރާއި، ތޫނު ހަތިޔާރު ބޭނުންކޮށްގެން ހަމަލާދީ، މާރާމާރީ ހިންގި މައްސަލައިގައި އަންނަނިވި ދަޢުވާތައް ކުރުމަށް 19 ސެޕްޓެންބަރު 2023 ދުވަހު ކްރިމިނަލް ކޯޓަށް ހުށަހަޅާފައިވާ ކަމަށެވެ.

1. މއ. ނައިޓްވިލާ، އިބްރާހީމް ޢަބްދުالله (ގައްބަރޭ)ގެ މައްޗަށް:

ޤާނޫނު ނަންބަރު: 17/2010 (ބިރުދެއްކުމާއި، ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު) ގެ 8 ވަނަ މާއްދާގެ ދަށުން، މީހަކަށް ނުރައްކާތެރި ހާނިއްކައެއްވާގޮތަށް ހަތިޔާރެއް ބޭނުންކޮށްގެން މާރާމާރީ ހިންގުން

2. ތ. ކިނބިދޫ، ދީފުރަމްގެ، އަޙްމަދު އަވްޝަމްއާއި،

3. މ. ތާޖް، މުލާއިމް މުޙައްމަދުގެ މައްޗަށް:

ޤާނޫނު ނަންބަރު: 17/2010 (ބިރުދެއްކުމާއި، ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު) ގެ 8 ވަނަ މާއްދާގެ ދަށުން، މީހަކަށް ނުރައްކާތެރި ހާނިއްކައެއްވާގޮތަށް ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުން.

ޒަރީރަށް ހަމަލާދިން މައްސަލާގައި ގައްބަރޭއަށް ދައުވާ ކޮށްފައިވާއިރު ދާދިފަހު، ޒަރީރު ކުރައްވާފައިވާ ޓްވީޓެއްގައި ޒަރީރު ވަނީ ގައްބަރޭ އަކީ އޭނާގެ ވަރަށް ގާތް އެކުވެރި ރައްޓެއްސެއް ކަމަށް ބުނެ އޭނާ ދޫކޮށްލުމަށް ގޮވާލައްވާފައެވެ.

"އަޅުގަނޑުގެ މައްސަލާގައި ހައްޔަރުކޮށްފައިވާ ގައްބެ މިނިވަންކޮށް ދެއްވާ. ގައްބެއަކީ އަޅުގަނޑުގެ ވަރަށް ގާތް ރައްޓިއްސެއް." ގައްބަރޭ އާއިއެކު ނަގާފައިވާ ފޮޓޯއެއް ހިއްސާ ކުރައްވައި، ފުލުހުންގެ ރަސްމީ ޓުވިޓާ އެކައުންޓްވެސް ޓެގް ކުރައްވައި ޒަރީރު ކުރެއްވި ޓްވީޓެއްގައި ވިދާޅުވެފައި ވެއެވެ.