ވެރިކަމުގައި ހުންނައިރު ވީހާވެސް ގިނަ ބާރެއް އަމިއްލަ އަތުގައި އޮތުމަށް ގިނަ ބަޔަކު އެދޭ: ރައީސް ނަޝީދު

ވެރިކަމުގައި ހުންނައިރު ވޭހާވެސް ގިނަ ބާރެއް އަމިއްލަ އަތުގައި އޮތުމަށް ވަރަށް ގިނަ ބަޔަކު އެދޭ ކަމަށާ، އެއީ ވެރިކަމުގެ ޠަބީޢަތް ކަމަށް ކުރީގެ ރައީސް، އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

މިދިޔަ ހުކުރު ދުވަހު ތިނަދޫއަށް ކުރެއްވި ދަތުރުފުޅަށްފަހު ނޫސްވެރިންނާއި ބައްދަލުކުރައްވައި ވާހަކަ ދައްކަވަމުން ރައީސް ނަޝީދު ވަނީ އެމަނިކުފާނާއި ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު ދުރުވެވަޑައިގެންފައިވާ ސަބަބުތައް ކަމަށް ލަފާކުރެވޭ ދެ ސަބަބެއް ހިއްސާ ކުރައްވާފައެވެ.

"އަޅުގަނޑަށް ލަފާކުރެވޭ ގޮތުގައި، ދެކަމެއް މީގެ ތެރެއަށް ވަންނާނެ. ފުރަތަމަ ކަމަކީ ވެރިކަމުގެ ޠަބީޢަތެއް އެއީ ބާރު ކޮންސެލިޑޭޓް ކުރަން ޖެހުން. އެއްވެސް ބޭފުޅެއް ވެރިއެއްގެ ގޮތުގައި ހުންނާކަށެއް ނުވެއް އެދޭނެ، ބާރު، ނުވަތަ އެހެން ގޮތަކަށް ދަންނަވަންޏާ، ވަރަށް ގިނަ ބޭފުޅުން ވެރިކަމުގައި ތިއްބާވާއިރުގައި އެދިވަޑައިގަންނަވާނެ ވިހާވެސް ގިނަ ބާރެއް އަމިއްލަ އަތްޕުޅުގައި އޮތުމަށް"

ރައީސް މުހައްމަދު ނަޝީދު

މިއާއެކު ރައީސް ނަޝީދު ވިދާޅުވީ، އެމަނިކުފާނުގެ އަރިހުގައި ރައީސް ޞާލިހު ހުންނަވާ ނަމަ، ރައީސް ޞާލިހު ގެ ވިދުން ކުޑަވާނެ ކަމަށް ބައެއް ބޭފުޅުން ލަފާއަރުއްވަމުން ގެންދެވި ކަމަށެވެ.

"ރައީސް އަށް ބައެއް ބޭފުޅުން ލަފާ އަރުއްވަމުން ގެންދެވީ، އަޅުގަނޑު ރައީސް އަރިހުގައި ހުންނަ ނަމަ، ރައީސް ފެންނަލެއް މަދުވާނޭ. ކުޑަ ވާނޭ. ވިދާ މިންވަރު ކުޑަވާނޭ." ރައީސް ނަޝީދު ވިދާޅުވިއެވެ.

އެހެންކަމުން އެބޭފުޅުން ރައީސް ޞާލިހުގެ ވިދުން ބޮޑުކުރެވޭނެ ގޮތަކަށް އެބޭފުޅުން ލަފާ އެރުއްވީ، ރައީސް ނަޝީދާއު ވާހަކަ ނުދެއްކެވުން ކަމަށާ، އެމަނިކުފާނު ގެންގުޅުއްވަންވީ އުސޫލަކީވެސް ނަޝީދު އެއްޗެއް ވިދާޅުވެއްޖެ ނަމަ, އެއީ ކިތަންމެ ބުއްދި ހަމަޖެހޭ އެއްޗެއްގެ ގޮތުގައި ވިޔަސް، އެއާއި އިދިކޮޅަށް އެކަން ކުރެއްވުން ކަމަށްވެސް ނަޝީދު ވިދާޅުވިއެވެ.

އަދި އެ ދެ ކަންތައް ކުރައްވަމުން ގެންދެވުމުން ރައީސް ޞާލިހުގެ 'ރެދަން ނުވަތަ ވިދުން' ބޮޑު ވާނެ ކަމަށް އެމަނިކުފާނަށް ލަފާއެރުއްވިފައިވާކަމަށެވެ.

ރައީސް ޞާލިހާއި ނަޝީދުވެސް އެމްޑީީޕީ ޕްރައިމަރީގައި ވާދަކުރައްވާނެކަން އިޢުލާން ކުރައްވާފައިވާއިރު, އެ ދެބޭފުޅުންގެ ގުޅުން އެންމެ ބޮޑަށް ހީނަރުވެގެން ގޮސްފައިވަނީ، ނަޝީދުގެ ކޮއްކޮ ނާޒިމް ސައްތާރު އެއްޖިންސުން ގުޅުން ހިންގުމުގެ ތުހުމަތުގައި ހައްޔަރު ކުރުމާއި ގުޅިގެންނެވެ. އެގޮތުން އެ މައްސަލަ އާއި ގުޅިގެން ނަޝީދު ވަނީ ރައީސް ޞާލިހު ޒިނޭ ކުރާ މަންޒަރު ފެންނަ ފޮޓޯ ތަކެއް ހުރި ކަމަށްވެސް ތުހުމަތު ކުރައްވާފައެވެ. އެހެން ނަމަވެސް ފަހުން ނަޝީދު ވަނީ އެފަދަ ފޮޓޯ ތަކެއް ނެތް ކަން ހާމަވާފަދަ މޭރުމަކުން ވާހަކަ ދައްކަވައިގެން އެވާހަކަ އޮއްބާލަން މަސައްކަތް ކުރައްވާފައެވެ.