ސިފައިންގެ އުޅަނދެއްގައި މާރިޔާއާއި ފިރިކަލުން ''ޓައިޓޭނިކް'' ގެ މަންޒަރެއް ކުޅުއްވާ ވީޑިއޯއެއް

ކޯސްޓު ގާޑު އުޅަނދެއްގައި ޑިފެންސް މިނިސްޓަރު މާރިޔާ ދީދީ އާއި ފިރިކަލުން އާމިރު، މަޝްހޫރު ހޮލީވުޑް ފިލްމް ޓައިޓޭނިކްގައި ލިއަނާޑޯ ޑީކެޕްރިއޯ އަދި ކޭޓް ވިންސްލެޓް ޓައިޓޭނިކް ބޯޓުގެ ދިރުނބާކޮޅުގައި ހުއްޓިގެން ތިބޭ ގޮތަށް ތިބެގެން ނަގާފައިވާ ވީޑިއޯއެއް ސޯޝަލް މީޑިއާގައި އާންމުވެއްޖެއެވެ.

ސިފައިންގެ އުޅަނދެއްގެ ކޮޅުފަސްކޮޅުގައި “ޓައިޓޭނިކް”ގެ މަންޒަރެއް ކުޅުއްވަނިކޮށް ނަގާފައިވާ އެ ވީޑިއޯއަކީ މާރިޔާގެ އިންސްޓަގުރަމް އެކައުންޓުގައި އިއްޔެ އަމިއްލައަށް އާންމުކުރެއްވި ވީޑިއޯއެކެވެ. އެ ވީޑިއޯގައި ކުޑަކުއްޖަކާއި ސިފައިންގެ މީހަކުވެސް ފެނެ އެވެ.

މި ވީޑިއޯއާ ގުޅިގެން ގިނަ ބައެއްގެ ފާޑުކިޔުން މާރިޔާއަށް އަމާޒުވެފައިވާ އިރު, ބައެއް މީހުން ބުނަމުންދަނީ މިއީ ދައުލަތުގެ މުދާ ނަހަމަ ގޮތުގައި ބޭނުންކުރުން ކަމަށާ މި މައްސަލަ ކަމާއިބެހޭ އިދާރާތަކުން ބަލަންޖެހޭނެ ކަމަށެވެ.

އަދި ކޯސްޓު ގާޑު އުޅަނދުތައް މާރިޔާދީދީގެ އަމިއްލަ ބޭނުމަށް ބޭނުން ކުރުމަކީ ރައްޔިތުންގެ ފައިސާއަށް ޚިޔާނާތްތެރިވުން ކަމަށްވެސް ހިޔާލު ފާޅުކުރި މީހަކު ބުނެފައިވެއެވެ.

މީގެ އިތުރުން، ސިފައިންގޭގެ ވަޒީފާގައި ކުރިން އުޅުއްވި ކުރީގެ ކޮމާންޑަރު އަހުމަދު ފަޔާޒު އަލީ ރިޒާ (ޕާޕާ) ކުރެއްވި ޓުވީޓެއްގައި ވިދާޅުވީ, ގައުމީ ސަލާމަތުގެ މުދާ އާއިލާގެ އުފަލުގައި ބޭނުންކުރަމުންދާ ކަމަށާއި އޭސީސީން މިކަން ތަހުގީގުކުރަންޖެހޭ ކަމަށެވެ.

"އެމް.އެން.ޑީ.އެފް ގެ ގިނަ އުޅަދުތައް މަރާމާތު ކުރާނެ ފައިސާނެތިގެން ފައްތިޔަލުގައި ވާއިރު، ކިރިޔާވެސް ދުވާ އުޅަދެއްވެއްޖެޔާ މިޖެހެނީ މިގޮތައް އާއިލީ ނާޗަރަންގީޔަށް ބޭނުންކުރަން، މި ނުވޭތޯ މަގާމުގެ ނާޖާއިޒް ފައިދާ ނެގުމަކަށް؟ ބައްޕާރުސަލްގެ މައްސަލަ ބެލުމަށްވުރެ މިކަން ބެލުން ރަގަޅުނުންތޯ؟ އަނެއްކާ އެފްޕީއައިޑީ ގެ ލާރިގަނޑު ހުސްވަނީތޯ؟" ފަޔާޒު ފޭސްބުކުގައި ލިޔުއްވާފައިވެއެވެ.

ކޯސްޓު ގާޑު އުޅަނދުތައް ޑިފެންސް މިނިސްޓަރުގެ އަމިއްލަ ބޭނުމަށް ބޭނުންކުރެވޭ އުސޫލެއް ސިފައިންގޭގައެއް ނޯވެއެވެ. އެހެން ނަމަވެސް މާރިޔާދީދީ އާއިލާ އާއި އެކު ރިސޯޓުތަކަށް ވަޑައިގަންނަވާ އިރުގަޔާއި، އެނޫންވެސް އަމިއްލަ ކަންކަމުގައި ކޯސްޓު ގާޑު އުޅަނދުތައް ބޭނުންކުރައްވާ ކަމުގެ ތުހުމަތުތައް ދޭތެރެ ދޭތެރެއިން ކުރެވެއެވެ.