ޚިޔާލު ފާޅުކުރުމުގެ މިނިވަންކަން އޮތް މިންވަރު ރޭ ފެނިގެންދިޔަ: މެޑަމް ފަޒްނާ

ވެރިކަންކުރާ މައި ޕާޓީއާއި އިދިކޮޅު މައި ޕާޓީ އެއް ރެއެއްގައި އެއް ތަނެއްގައި، ހަމަނުޖެހުމެއް ނުހިނގާ ޖަލްސާ ބޭއްވުމުން ހާމަވެގެން ދިޔައީ ޚިޔާލު ފާޅުކުރުމުގެ މިނިވަންކަން އޮތް ވަރު ކަމަށް ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު ވިދާޅުވެއްޖެއެވެ.

ރައީސް އިބްރާހިމް މުހައްމަދު ޞާލިހު ބައިވެރިވެވަޑައިގެންނެވި ޖަލްސާއެއް ރޭ އާޓިފިޝަލް ބީޗު ކުރިމަތީގައި ހުންނަ އެމްޑީޕީގެ މައި ހަރުގޭގައި ބޭއްވިއިރު، އެތަނުގެ ކުރިމަތީ އާޓިފިޝަލް ބީޗުގައި އިދިކޮޅުގެ މުޒާހަރާ ކުރިއަށް ދިޔައެވެ.

ރައީސް ބައިވެރިވެޑައިގެންނެވި ޖަލްސާއަކީ، އެމަނިކުފާނުގެ ރިޔާސީ ޕްރައިމަރީގެ ފުރަތަމަ ކެމްޕޭން ޖަލްސާއެވެ. އަދި ޕީޕީއެމްގެ ޖަލްސާއަކީ، ވ. އާރަށުގެ މައްސަލައިގައި ކުރީގެ ރައީސް ޔާމީނަށް އިއްވި ހުކުމާ ދެކޮޅަށް މުޒާހަރާ ކުރުމަށް ބޭއްވި ޖަލްސާއެކެވެ.

ދެ ޖަލްސާ ނިމުމާއެކު މެޑަމް ފަޒްނާ ކުރެއްވި ޕޯސްޓެއްގައި ވިދާޅުވީ، ވެރިކަންކުރާ މައި ޕާޓިއާއި އިދިކޮޅު ޕާޓީން އެއްތަނެއްގައި ޖަލްސާ ބޭއްވިއިރު، ހަމަނުޖެހުން ނުހިނގައި، އެއްވެސް ބަޔަކު ހައްޔަރު ނުކޮށް ޖަލްސާތައް ނިމިގެން ދިއުމުން، ޚިޔާލު ފާޅު ކުރުމުގެ މިނިވަންކަން އޮތް މިންވަރު ފެނިއްޖެ ކަމަށެވެ.

"ހަތަރެއް ޖެނުއަރީ 2022. ތާރީހީ ރެއެއް. ވެރިކަން ކުރާ މައި ޕާޓީ އެމްޑީޕީއާއި އޮޕޮސިޝަން ޕާޓީ ޕީޕީއެމްގެ ޖަލްސާ އެއްތަނެއްގައި ބޭއްވި ރެއެއް. ހަމަނުޖެހުމެއް ނެތް. މީހަކު ހައްޔަރެއް ނުކުރޭ. ޚިޔާލު ފާޅުކުރުމުގެ މިނިވަންކަން އޮތް ވަރު ފެނިގެން ދިޔަ ރެއެއް. ކެތްތެރިކަމުގެ ލާމަސީލު މިސާލެއް،" ރައީސް ޞާލިހުގެ ކެތްތެރިކަމަށް ތައުރީފު ކުރައްވައި ފަޒްނާ ވިދާޅުވެފައިވެއެވެ.

ކުރިއަށްއޮތް ރިޔާސީ އިންތިޚާބަށް އެމްޑީޕީން ނުކުންނާނެ ކެނޑިޑޭޓެއް ކަނޑައެޅުމަށްޓަކައި ބާއްވާ ޕްރައިމަރީއަށް ރައީސް ޞާލިހާއި ކުރީގެ ރައީސް މުހައްމަދު ނަޝީދު ކުރިމަތިލައްވައި، ފޯރިއާއެކު ކެމްޕޭން ކުރަން ފަށާފައި ވާއިރު، އިދިކޮޅުން އިހުތިޖާޖުތައް ކުރިއަށް ގެންދަނީ، އިދިކޮޅުން ރިޔާސީ އިންތިޚާބަށް ނެރެން ބޭނުންވާ ކެނޑިޑޭޓް ޔާމީނަށް ކުރި ހުކުމާމެދު ހިތްހަމަ ނުޖެހިގެންނެވެ.