ޚިޔާލު ފާޅުކުރުމުގެ ހައްގު ތަންމިނަށް: ހަރުގޭގައި ޖަލްސާ، ބޭރުގައި އިދިކޮޅުގެ މުޒާހަރާ!

ބުދަ ދުވަހުގެ ރެއަކީ ދިވެހިރާއްޖޭގެ ޑިމޮކްރަސީގެ ހަޔާތުގައި ތާރީހީ ރެއެކެވެ. އެތައް ގޮތަކުން އެރޭ ޚާއްސަ ވެގެންދެއެވެ. ބުދަ ދުވަހުގެ ރެއަކީ އެއް ތަނެއްގައި އެއް ވަގުތެއްގައި ރާއްޖޭގެ އެންމެ ބޮޑު ދެ ސިޔާސީ ޕާޓީގެ ފޯރުގަދަ ދެ ހަރަކާތެއް ބޭއްވިގެންދިޔަ ރެއެވެ.

ދެ ޕާޓީގެ ހަރަކާތްތައް އިއުލާނު ކުރުމާއި ގުޅިގެން، އެ ހަރަކާތްތަކަށް ފުރުސަތު ލިބޭނީ ކިހާ މިންވަރަކަށްތޯ ބެލުމުގެ ޝައުގުވެރިކަން އުފެދުނެވެ.

ސަރުކާރުގައި އޮންނަ އިރު ކޮންމެ ބަޔަކުވެސް ވާދަވެރިންގެ އަޑު ކަނޑުވާލަން މަސައްކަތްކޮށްފައިވާކަމީ ރާއްޖޭގެ ތާރީހު ހެކިދޭ ކަންކަމަށް ވާތީ، ފުރަމާލޭގައި އެއްވަގުތެއްގައި ވާދަވެރި ދެ ސިޔާސީ ޕާޓީގެ ހަރަކާތް އަމާންކަމާއި ސުލްހަވެރިކަމާއެކު ހިންގިދާނެކަމާމެދު ބޮޑެތި ސުވާލުތަކެއް އޮތީ އުފެދިފައެވެ.

ސޯލިހުގެ ޖަލްސާ ކުރިއަށް ދިޔަ ވަގުތު އިދިކޮޅުން މުޒާހަރާ

ބުދަ ދުވަހުގެ ރޭ އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ކެމްޕޭނު ޖަލްސާއެއް އޮތެވެ. އެ ޖަލްސާގައި އެމަނިކުފާނު ބައިވެރިވެވަޑައިގަތެވެ. އަރިހުގައި އެމްޑީޕީއަށް ސަރުކާރުގެ ކެބިނެޓު މިނިސްޓަރުންވެސް ބައިވެރިވެވަޑައިގަތެވެ.

ޖަލްސާ ފެށީ 9:00 ގައެވެ. އެމަނިކުފާނު ޖަލްސާ ފެއްޓެވުމަށް އެމްޑީޕީ މައި ހަރުގެއަށް ވަޑައިގަތްއިރު ސަރަހައްދު އޮތީ ފުރިފައެވެ. އެމަނިކުފާނަށް ތާއީދު ކުރައްވާ ސަޕޯޓަރުން ގިނަ އަދަދަކަށް އެ ސަރަހައްދުގައި ތިއްބެވިއެވެ.

އޭގެ އިތުރުން ހަރުގެއާއި ކުރިމަތީ އާޓިފިޝަލް ބީޗު ސަރަހައްދުގައި އިދިކޮޅުގެ ފޯރިގަދަ ހަރަކާތެއް އޭރު އޮތީ ފައްޓާފައެވެ. އިދިކޮޅުގެ ރިޔާސީ ކެންޑިޑޭޓް ރައީސް އަބްދުﷲ ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިދިކޮޅުން ގެންދިޔައީ އަޑުއުފުލަމުން ނެވެ.

ޖަލްސާ ފެށިގެން ނިމެން ދިޔައިރުވެސް އިދިކޮޅުގެ މުޒާހަރާގެ އަޑަށް ކުޑަވެސް ބަދަލެއް ނާދެއެވެ.

ރައީސް ސޯލިހު ވާހަކަދައްކަވަމުން ގެންދިޔައިރުވެސް އިދިކޮޅުން ދިޔައީ ރައީސް ޔާމީންގެ މައްޗަށް ކޮށްފައިވާ ހަރާން ހުކުން ބާތިލުކުރުމަށް ގޮވާލާ އަޑުއުފުލަމުން ނެވެ.

ރައީސް އިބްރާހިމް މުހައްމަދު ސޯލިހާއި ކެބިނެޓުގެ ވަޒީރުންގެ އިސްތިއުފާއަށް ގޮވަމުންނެވެ. އަދި ސަރުކާރަށް ބޮޑެތި ފާޑުކިޔުންތަކެއް އަމާޒުކުރަމުން ދިޔައެވެ.

އެހެން ނަމަވެސް އިދިކޮޅުގެ އެ ހަރަކާތް ފެއްޓިފަހުން ހުއްޓުވުމަށް ފުލުހުން ރޭ މަސައްކަތް ކޮށްފައެއް ނުވެއެވެ. ހަރަކާތް ނިމެންދެން ކުރިއަށް ގެންދިއުމުގެ ފުރުސަތު އޮތީ ދީފައެވެ.

އަނެއްކޮޅުން އެމްޑީޕީ ހަރުގޭގައި ކުރިއަށް ގެންދިޔަ ޖަލްސާވެސް މެދުކަނޑާލާފައެއް ނުވެއެވެ. ޖަލްސާވެސް ތާވަލާއި އެއްގޮތަށް ކުރިއަށް ގެންގޮސް ނިންމާލުމަށްފަހު ރައީސް ވަޑައިގަތް އިރުވެސް އެ ސަރަހައްދުގައި އެއްވެސް ހަމަނުޖެހުމެއް ހިންގާފައެއް ނުވެއެވެ.

ދެ ހަރަކާތް އެއްތަނެއްގައި ހިންގީ ހަމަނުޖެހުމެއް ނެތި

ސިޔާސީ ޕާޓީތަކުން ހިންގާ ހަރަކާތްތައް ހޫނުވެ ހަމަނުޖެހުމަށް ބަދަލުވާ މަންޒަރުތައް ތާރީހުގައި ދިވެހިން ވަނީ ދެކެފައެވެ. އެއާއެކު ބުދަ ދުވަހުގެ ރޭ އެއް ސަރަހައްދެއްގައި އޮތް ދެ ހަރަކާތް ހޫނުވާނެކަމަށް ގިނަ ބަޔަކު ތިބީ އަންދާޒާކޮށް ހިސާބު ޖަހައިގެންނެވެ.

އެހެން ނަމަވެސް ކަން ވީ ދިމާ އިދިކޮޅަށެވެ.

ދެ ބައިމީހުންވެސް އެބަޔަކަށް ފެންނަ ޚިޔާލެއް ފާޅުކުރުމަށްފަހު ސުލްހަވެރިކަމާއެކު މައިދާން ދޫކޮށް ދިޔަ މަންޒަރަކީ ޑިމޮކްރަސީއަށް ލޯބިކުރާ މީހަކަށް ހިތްގައިމު މަންޒަރަކަށް ވާނެއެވެ.

އިދިކޮޅުގެ ޕޯޑިއަމްގައި ސަރުކާރާއި ރައީސް ސޯލިހަށް ހޫނު ބަހުގެ ހަމަލާތައް ރައްދުކުރަމުން ދިޔައިރު، އިދިކޮޅުގެ ސަޕޯޓަރުންގެ މެދުގައި އޮތް ފޯރި އުތުރި އަރަމުން ދިޔައެވެ. ރައީސް ޔާމީން މިނިވަންކުރުމަށް އަޑުއުފުލަމުން ދިޔައީ ސަރުކާރުގެ ކަންފަތުގައި އެ އަޑުތައް އިއްވުމަށެވެ.

އެހެން ނަމަވެސް، އެ އަޑުތައް އިއްވުމަށްފަހު އިދިކޮޅުން ސަރަހައްދު ދޫކޮށްދިޔައީ އެއްވެސް ހަމަނުޖެހުމެއް އުފައްދަން މަސައްކަތް ނުކުރުމަށް ސަޕޯޓަރުންނަށް އަންގާފައެވެ. އަދި ހަރަކާތް ނިމުމުން އެތަނުގައި އިތުރަށް މަޑު ނުކުރުމަށް އަންގާފައެވެ.

ޒިންމާދާރު ސިޔާސީ ޕާޓީއެއް އިދިކޮޅުގައި އޮތުމަކީ ޚިޔާލު ފާޅުކުރަން ލިބޭ ފުރުސަތުގެ ނާޖާއިސް ފައިދާ ނަގާ ހަމަޖެހުން ނަގާލަން މަސައްކަތް ނުކުރާނެ ކަމުގެ އަލި ގަދަ ހެއްކެއްކަން ރޭ ޕީޕީއެމުން ދެއްކި ނަމޫނާއިން ހާމަވެގެން ދިޔައެވެ.

އަނެއްކޮޅުން އެމްޑީޕީ މައި ހަރުގޭގައި ވެސް ކުރިއަށް ގެންދިޔައީ ހަމަ އެވަރުގެ ފޯރިގަދަ ޖަލްސާއެކެވެ. ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ބައިވެރިވެވަޑައިގަންނަވާ އެމަނިކުފާނުގެ ފުރަތަމަ ޖަލްސާއެވެ.

ޖަލްސާއަށް ކުޑަވެސް އުނދަގުލެއް ފޯރާނަމަ އެކަން ހުއްޓުވުމުގެ ފުރިހަމަ އާރާއި ބާރު މިއަދު ރައީސް ސޯލިހުގެ އަތްޕުޅުގައިވެސް އެބައޮތެވެ.

ބޭނުންފުޅުވާނަމަ އެންމެ ފޯނު ކޯލަކުން، އިދިކޮޅުގެ ހަރަކާތް ހުއްޓުވާލެވުނީހެވެ. އަދި އެ ސަހަރައްދަށް އެއްވެ ތިބި މީހުން އެ ސަހަރައްދުން ފައްސާލެވުނީހެވެ.

އެހެން ނަމަވެސް ފެނިގެން ދިޔައީ ޚިޔާލު ފާޅުކުރުމަށް ޖާގަ ދެއްވި މަންޒަރެވެ. އެއީ ރާއްޖެ ބޭނުންވެގެން މިއުޅޭ ޑިމޮކްރަސީގެ ރީތި އުސޫލެވެ.

ޚިޔާލު ފާޅުކުރުމުގެ ހައްގު ތަންމިނަށް!

ގާނޫނު އަސާސީއިން ރައްޔިތުންނަށް ލިބިދޭ ޚިޔާލު ފާޅުކުރުމުގެ ހައްގު ލިބޭނެ ދުވަހެއްގެ އިންތިޒާރުގައި ރައްޔިތުން ތިބޭތާ ކިތަންމެ ދުވަހެވެ. ބުދަ ދުވަހުގެ ރެއަކީ އެ ހައްގު ރައްޔިތުންނަށް ތަންމިނަށް ހުޅުވިގެންދިޔަ ރެއެކެވެ.

ވާދަވެރި އޮޕޮސިޝަނަށް އެމީހުންގެ އަޑު ހަރުކޮށް ބާރުކޮށް އިއްވުމުގެ ފުރުސަތު ލިބުނެވެ. އަދި އެ ލިބުނު ހައްގުގެ ބޭނުން އިދިކޮޅުން ހިފީ ޒިންމާދާރުކަމާއެކުގައެވެ. ހަމަނުޖެހުމަކަށް ކުޑަވެސް ޖާގައެއް ނުދީ އެ ހައްގުގެ ބޭނުން ހެޔޮ ގޮތުގައި ހިފިތަން ފެނިގެން ދިޔައެވެ.

ބުދަ ދުވަހުގެ ރޭ ތާރީޚީ ރެޔަކަށް ވަނީ މިއީ މަދުން ނޫނީ ފެންނަ މަންޒަރަކަށް ނުވާތީއެވެ. ވާދަވެރި ސިޔާސީ މާހައުލެއްގައި ތަހުޒީބު މުޖުތަމައެއްގައި އަމަލު ކުރާނެ ގޮތުގެ ފުރިހަމަ މިސާލު ބުދަ ދުވަހުގެރޭ ފެނިގެން ދިޔައެވެ.

ޚިޔާލު ތަފާތުވުންތައް ހުއްޓަސް، ޚިޔާލު ފާޅުކުރުމުގެ ހައްގު ލިބެން ޖެހެއެވެ. އަދި ހަމަނުޖެހުން ނުހިންގާވެސް ޚިޔާލު ފާޅުކޮށް އަޑުއުފުލިދާނެކަން ރޭ ދިވެހިން ދަސްކޮށްފިއެވެ. އުންމީދަކީ ޑިމޮކްރަސީގެ ހަޔާތުގައި މި ލިބުނު ފުރުސަތު މި ގޮތުގައި ދެމިގެން ދިއުމެވެ.