ރައީސް ޔާމީން އަނބުރާ ވެރިކަމަށް ގެނައުމަށް ހޯޕް ކޮންފަރެންސްގެ ބައިވެރިން އަހުދުވެއްޖެ

ޕީޕީއެމްގެ ރިޔާސީ ކެންޑިޑޭޓު ރައީސް ޔާމީން އަބްދުލްގައްޔޫމު އަނބުރާ ވެރިކަމަށް ގެނައުމަށް އިދިކޮޅު ކޯލިޝަނުން ކުރިއަށް ގެންދިޔަ ހޯޕް ކޮންފަރެންސްގެ ބައިވެރިން އަހުދުވެއްޖެ އެވެ.

ގާތްގަނޑަކަށް 1100 މީހުން ހޯޕް ކޮންފަރެންސްގައި ބައިވެރިވެފައިވާއިރު ރައީސް ޔާމީން އަނބުރާ ވެރިކަމަށް ގެނައުމަށް އަހުދުވެފައިވަނީ ހޯޕް ކޮންފަރެންސް ނިންމާލުމަށް ރޭ އާޓިފިޝަލް ބީޗުގައި ބޭއްވި "ދުއްޕާން" ޖަލްސާގަ އެވެ.

އެ އަހުދުގައި ބައިވެރިން ވަނީ ރައީސް ޔާމީނަށް ދެވަނަ ދައުރެއް ހޯދާދިނުމަށް އެ ބޭފުޅުންގެ ލެވެލްގައި ކުރެވެން ހުރި ހުރިހާކަމެއް ކޮށްދިނުމަށް އަހުދުވެފައެވެ.

"ދިވެހި ގައުމުގެ ސިޔާދަތާއި މިނިވަންކަމާއި އިސްތިގުލާލު ދިފާއުކޮށް ސަރުކާރު ޖަވާބުދާރީ ކުރުވުމަށާއި ދިވެހިގައުމާއި ރައްޔިތުންގެ ހައްގުގައި ރައްޔިތުންގެ އެދުމާއި އުންމީދުތަކާއި އެއްގޮތަށް ދިވެހި ދައުލަތަށް ޚިދުމަތްކުރެއްވުމުގެ ފުރުސަތު ރައީސް ޔާމީން އަބްދުލްގައްޔޫމަށް ހޯދައިދިނުމަށާއި، ރިޔާސީ އިންތިޚާބުގެ ވޯޓު ކަރުދާހުގައި ރައީސް ޔާމީނުގެ ނަންފުޅު އޮންނާނެކަން ކަށަވަރުކުރުމަށް ކުރަންޖެހޭ އެންމެހާ ކަންކަން ކުރުމަށާއި، ރާއްޖޭގެ ރައީސުލް ޖުމްހޫރިއްޔާކަމުގެ މަގާމަށް ރައީސް ޔާމީން އަބްދުލްގައްޔޫމު އިންތިޚާބު ކުރުމަށް ކުރަންޖެހޭ އެންމެހާ މަސައްކަތްތައް ކުރުމަށާއި އެކަންކަން ކުރުމުގައި ޕްރޮގްރެސިވް ކޮންގްރެސް ކޯލިޝަންގެ ހުރިހާ މެމްބަރުންނާއެކު އެކަތިގަނޑެއްގެ ގޮތުގައި ދެމިތިބުމަށް އަހުރެން އަހުދުވަމެވެ"

ހޯޕް ކޮންފަރެންސްގެ ބައިވެރިންގެ އަހުދު

އެ އަހުދުގެ އިތުރުން ރޭގެ އެ ޖަލްސާގައި ހޯޕް ކޮންފަރެންސްގެ ބައިވެރިން ވަނީ މިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން ރައީސް ޔާމީންގެ މައްޗަށް ކޮށްފައިވަނީ ހަރާން ހުކުމެއްކަމަށް ގޮވާލާފަ އެވެ. އަދި އެމަނިކުފާނުގެ މައްޗަށް ސިޔާސީ ދައުވާތައް އުފުލުން ހުއްޓާލާ، މިހާރުން މިހާރަށް އެމަނިކުފާނު މިނިވަންކުރުމަށް ބައިވެރިން ވަނީ ގޮވާލައްވާފަ އެވެ.

ރައީސް ޔާމީން އަނބުރާ ވެރިކަމަށް ގެނައުމަށް ހޯޕް ކޮންފަރެންސްގެ ބައިވެރިން ރޭ އަހުދުވެފައިވާއިރު، އެމީހުންގެ ކޮނޑުގައި އެއެޅުނީ ވަރަށް ބޮޑު ޒިންމާއެއްގެ ގޮތުގައި އިދިކޮޅުގެ ލީޑަޝިޕުން ފާހަގަކުރައްވަ އެވެ. އެކަމާއި ގުޅޭގޮތުން ޕީޕީއެމްގެ ނައިބުރައީސް އަހުމަދު ޝިޔާމު ވިދާޅުވީ، ހޯޕް ކޮންފަރެންސްގެ ބައިވެރިންނަކީ ރައްޔިތުންގެ މަންދޫބުން ކަމަށެވެ.

ލީޑަޝިޕްގެ ބޭފުޅުން މާލޭގައި ކުރައްވާ މަސައްކަތްޕުޅު ރަށްރަށުގައި ކުރައްވާނީ އެ ރަށްރަށުގެ މަންދޫބުން ކަމަށާއި، މި ކޮންފަރެންސްގެ ބޭނުން ހިފާ މިހާރުން ފެށިގެން ކުރިއަށް އޮތް ރިޔާސީ އިންތިޚާބު ރައީސް ޔާމީނަށް ކާމިޔާބުކޮށްދިނުމަށް މަސައްކަތް ފެށުމަކީ ވަރަށް މުހިންމު ކަމެއްކަމަށް ޝިޔާމު ވިދާޅުވި އެވެ.