އެމްޑީޕީއިން ފަނޑިޔާރުގެ އިސްލާހުކުރާ ވާހަކަ ނުދެއްކިއްޔާ މާ ތާހިރު ވާނެ: ޝިޔާމު
ޝަރުއީ ދާއިރާ އިސްލާހުކުރަން ވީ ވައުދު ނުފުއްދުނު ޕާޓީ (އެމްޑީޕީ) އިން ފަނޑިޔާރުގެ އިސްލާހުކޮށް ތާހިރުކުރާ ވާހަކަ ނުދެއްކުމަށް މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނައިބުރައީސް އަހުމަދު ޝިޔާމު ގޮވާލައްވައިފި އެވެ.
އިދިކޮޅު ކޯލިޝަނުން ރޭ އާޓިފިޝަލް ބީޗުގައި ބޭއްވި "ދުއްޕާން" ޖަލްސާގައި ވާހަކަ ދައްކަވަމުން ޝިޔާމު ވިދާޅުވީ އެމްޑީޕީއަކީ ފަނޑިޔާރު ގެތަކުގެ ހުރުމަތް ކެނޑުމަށް ފެށުނީއްސުރެ މަސައްކަތް ކުރަމުން އައި ޕާޓީއެއް ކަމަށެވެ. އެގޮތުން ރާއްޖޭގެ ޝަރުއީ ކޯޓުތަކުގެ ނިންމުންތަކަށް ބޯ ނުލެނބުމަށް އެ ޕާޓީއިން މީގެ ކުރިން ނިންމުމެއް ނިންމާ، އެފަދައިން އަމަލުތައް ކޮށްފައިވާކަމަށް އޭނާ ވިދާޅުވި އެވެ.
އޭގެ އިތުރުން މި ސަރުކާރުގެ ފުރަތަމަ 100 ދުވަހުގެ ތެރޭގައި ޖުޑިޝަލް ސާވިސް ކޮމިޝަންގެ ކޮމްޕޮސިޝަން ބަދުލުކުރާނެކަމަށް ވައުދުވެފައި ވީ ނަމަވެސް މިހާތަނަށް އެކަން ކޮށްފައި ނުވާކަން އޭނާ ފާހަގަކުރެއްވި އެވެ.
ޖޭއެސްސީ އިސްލާހުކުރުމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ތިން ފަހަރުމަތިން ހުށައެޅުމުންވެސް އެމްޑީޕީގެ ސުޕަރ މެޖޯރިޓީއިން ޖޭއެސްސީ އިސްލާހުކުރުމަށް ހުށައެޅި ބިލު ބޭރުކޮށްލާފައިވާކަމަށް އޭނާ ވިދާޅުވިއެވެ.
"ތިން ފަހަރު އަޅުގަނޑުމެންގެ ޕާޓީއިން، ރައީސް ޔާމީންގެ ޕާޓީއިން ހުށައެޅުއްވި.. ޓޮމް ހުށައެޅުއްވި. އެއްކަލަ ސުޕަ މެޖޯރިޓީ އޮތް.. އެއްކަލަ ޖުޑިޝަރީ އިސްލާހުކުރަން، ޖޭއެސްސީ އިސްލާހުކުރަން އައި މީހުން ބޭރުކޮށްލީ އެ މައްސަލަ"
ޕީޕީއެމްގެ ނައިބުރައީސް އަހުމަދު ޝިޔާމު
އެކަން ފާހަގަކުރައްވާ ޝިޔާމު ވިދާޅުވީ ރާއްޖޭގެ ޝަރުއީ ދާއިރާ އިސްލާހު ކުރާ ވާހަކަ ދައްކަން އެމްޑީޕީ ލަދުގަންނަން ޖެހޭނެ ކަމަށެވެ. އަދި އެމީހުން އިތުރަށް ފަނޑިޔާރުގެ އިސްލާހުކުރާ ވާހަކަ ނުދެއްކިއްޔާ މާ ތާހިރުވާނެ ކަމަށެވެ.
"ޖޭއެސްސީ އިސްލާހުކުރަން.. ދިވެހިރާއްޖޭގެ ފަނޑިޔާރުގެ ތާހިރުކުރާ ވާހަކަ މި މީހުން ނުދެއްކިއްޔާ މާ ތާހިރުވާނެ"
ޕީޕީއެމްގެ ނައިބުރައީސް އަހުމަދު ޝިޔާމު
ޝިޔާމުގެ ވާހަކައިގައި ވަނީ މިދިޔަ ޑިސެމްބަރު މަހުގެ 25 ގައި ކްރިމިނަލް ކޯޓުން ރައީސް ޔާމީންގެ މައްޗަށް އިވިއްހި ހުކުމަށް ރައްޔިތުން ހަރާން ހުކުން ކިޔަމުންދާ ދިއުން ހުއްޓުވުމަށް ސަރުކާރުން ކުރަމުންދާ މަސައްކަތްތަކަށްވެސް ފާޑުވިދާޅުވެފަ އެވެ.
އެގޮތުން ޖޭއެސްސީގެ ރައީސާ ހިސާން ހުސެއިންގެ އަމުރަކަށް "ހަރާން ހުކުމް" ކިޔުން ހުއްޓުވުމަށް ފުލުހުން މަސައްކަތް ކުރަމުންދާ ކަން ފާހަގަކުރައްޗާ ޝިޔާމު ވިދާޅުވީ އެހެން ކިޔުން ހުއްޓާ ނުލާނެކަމަށެވެ.
އެ ހުކުމަކީ ސިޔާސީ ދައުވާތަކެއްގެ މައްޗަށް ނުހައްގުން ކޮށްފައިވާ ހުކުމެއްކަމަށް ރައްޔިތުން ގަބޫލު ކުރާ ކަމަށާއި، އަދި އެ ހުކުމް މަތީ ކޯޓުން ބާތިލުކުރާނެ ކަމުގެ ފުރިހަމަ ޔަގީންކަން އޮތުމުން އެ ހުކުމަށް ރައްޔިތުން ދީފައިވާ ނަން (ހަރާން ހުކުމް) ބަދަލު ނުކުރާނެކަމަށް އޭނާ ވަނީ ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
