މަޖިލީހުގެ މި އަހަރުގެ ފުރަތަމަ ދައުރަށް ސަރުކާރުގެ 23 ބިލް

މި އަހަރުގެ ރައްޔިތުންގެ މަޖިލީހުގެ ފުރަތަމަ ދައުރަށް ދައުލަތުގެ ފަރާތުން 23 ބިލެއް މަޖިލީހަށް ފޮނުވައިފި އެވެ.

އެގޮތުން ދައުލަތުގެ ފަރާތުން ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރަށް ހުށަހެޅުމަށް ޤަޞްދުކުރާ ބިލުތަކުގެ ލިސްޓު، ރައްޔިތުންގެ މަޖިލީހުގެ ގަވާއިދުގެ 82 ވަނަ މާއްދާގެ (ރ) ގައި ބަޔާންކޮށްފައިވާ ގޮތުގެމަތިން ރައްޔިތުންގެ މަޖިލީހުގެ ރައީސަށް މިހާރުވަނީ ފޮނުވައިފައެވެ.

ސަރުކާރުން ފޮނުވާފައިވާ ބިލް ތަކުގެ ތެރޭގައި ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީ އަށް އިސްލާޙް ގެނައުމުގެ ބިލް، ޖުޑިޝަލް ސާވިސް ކޮމިޝަންގެ ޤާނޫނަށް އިސްލާޙް ގެނައުމުގެ ބިލް، ދިވެހި ރާއްޖޭގެ ޤާނޫނުލް އުޤޫބާތައް އިސްލާޙް ގެނައުމުގެ ބިލް، ޖިނާއީ އިޖުރާއަތުގެ ޤާނޫނަށް އިސްލާޙް ގެނައުމުގެ ބިލް އަދި ޖިނާއީ މައްސަލަތަކުގައި ޤާނޫނީ އެހީތެރިކަން ބަދަލުކުރުމުގެ ޤާނޫނަށް އިސްލާޙު ގެންނަ ބިލް ހިމެނެއެވެ.

މީގެ އިތުރުން މަސްތުވާ ތަކެއްޗާއި ބެހޭ ޤާނޫނަށް އިސްލާޙު ގެނައުމުގެ ބިލް، ގޭންގު ކުށްތައް މަނާކުރުމާއި ބެހޭ ޤާނޫނަށް އިސްލާޙު ގެނައުމުގެ ބިލް، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނަށް އިސްލާޙް ގެންނަ ބިލް އަދި މަނީލޯންޑްރިން  އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ޤާނޫނަށް އިސްލާޙް ގެނައުމުގެ ބިލް ހިމެނެއެވެ.

ދިވެހި ފުލުހުންގެ ޚިދްމަތުގެ ޤާނޫނަށް އިސްލާޙު ގެނައުމުގެ ބިލާއި، މައުލޫމާތު ހޯދައި ލިބިގަތުމުގެ ޤާނޫނަށް އިސްލާޙު ގެނައުމުގެ ބިލް، އިންތިޚާބުތަކާއި ގުޅޭ ޢާންމު ޤާނޫނަށް އިސްލާޙް ގެނައުމުގެ ބިލް، ރިޔާސީ އިންތިޚާބުގެ ޤާނޫނަށް އިސްލާޙް ގެނައުމުގެ ބިލް އަދި ލޯކަލް ކައުންސިލްތަކުގެ އިންތިޚާބުގެ ޤާނޫނަށް އިސްލާޙް ގެނައުމުގެ ބިލް ވެސް މި އަހަރުގެ ފުރަތަމަ ދައުރުގެ ތެރޭގައި މަޖިލީހަށް ހުށައެޅުމަށް ގަސްދު ކުރާ ކަމަށް އޭޖީ އޮފީހުން ބުނެފައިވެއެވެ.

މީގެ އިތުރުން ޙައްޖާއި ޢުމްރާގެ ބިލް، ދިވެހިރާއްޖޭގެ ކުޅިވަރު ޤާނޫނަށް އިސްލާޙު ގެނައުމުގެ ބިލް، އިސްރަށްވެހިންގެ ބިލް، ފޮރިން އިންވެސްޓްމަންޓްގެ ބިލް، އިންޑަސްޓްރިއަލް  ރިލޭޝަންސްގެ ބިލް އަދި މޯލްޑިވްސް މީޑީއާ އެންޑް ބްރޮޑްކާސްޓިންގ އޮތޯރިޓީގެ ބިލް ހިމެނެއެވެ.

އަދި އަބުރާއި ބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ބިލް، ދިވެހިރާއްޖޭގެ ޖަލުތަކާއި ޕެރޯލްގެ ޤާނޫނަށް އިސްލާޙް ގެނައުމުގެ ބިލް ގެ އިތުރުން ކުނި މެނޭޖްކުރުމުގެ ޤާނޫނަށް އިސްލާޙް ގެނައުމުގެ ބިލް ވެސް މިއަހަރުގެ ރައްޔިތުންގެ މަޖިލީހުގެ ފުރަތަމަ ދައުރުގެ ތެރޭގައި ދައުލަތުން އެ މަޖިލީހަށް ހުށައަޅާނެއެވެ.