ރިޔާސީ އިންތިހާބުގައި ބޮޑު ތަފާތަކުން ރައީސް ޞާލިހް ބަލިވާނެ ކަމަށް ހިތުގައި އެއްވެސް ޝައްކެތްނެތް: ވަހީދު

ކުރިއަށް އޮތް ރިޔާސީ އިންތިހާބުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ބޮޑުތަނުން ބަލިވާނެ ކަމީ އެއްވެސް ޝައްކެއް އޮތް ކަމެއް ނޫން ކަމަށް މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ތޮއްޑޫ ދާއިރާގެ މެންބަރު ޙަސަން ޝިޔާން ހުށަހަޅުއްވާފައިވާ، އެމް.ޑީ.ޕީގެ ފުރަތަމަ ވެރިކަމުގައި ރާއްޖޭގެ ދަނޑުވެރިންނަށް ދޫކުރި ދަނޑުވެރިންގެ ސަބްސިޑީ އަލުން އަނބުރާ އިޔާދަކޮށް ދަނޑުވެރި މީހާއަށް ދިނުމަށް ގޮވާލައި ހުށަހަޅާފައިވާ ޤަރާރުގެ އިބްތިދާއީ ބަހުސް ގައި ވާހަކަ ދައްކަވަމުން ވައްޑެ ވަނީ މި ސަރުކާރުގެ ދަނޑުވެރިކަމާއި މަސްވެރިކަމުގެ ސިޔާސަތު ތަކަށް ވަރަށް ބޮޑަށް ފާޑުވިދާޅުވެފައެވެ.

އެގޮތުން ވިދާޅުވީ، ރައީސް ޞާލިހު ވެރިކަމަށް ވަޑައިގެންނެވީ ޖަޒީރާ ރާއްޖެއެއް ގެނެސް ދިނުމަށް ވަޢުދުވެވަޑައިގެން ކަމަށެވެ. އެގޮތުން، އެމަނިކުފާނުގެ މެނިފެސްޓޯ ގައިވެސް ރާއްޖޭގައި ދަނޑުވެރިކަމާއި މަސްވެރިކަން ކުރިއެރުވުމަށް ގިނަ ކަންކަން ކުރައްވާނެ ކަމަށް ލިޔުއްވާފައިވާ ކަން ވަހީދު ފާހަގަ ކުރެއްވިއެވެ. އެހެންނަމަވެސް، މިއަދު ފެންނަމުންދާ މަންޒަރަކީ ރާއްޖެއިން ދަނޑުވެރިކަމާއި މަސްވެރިކަންވެސް ނެތިދާ މަންޒަރު ކަން ފާހަގަކުރައްވައި ވަހީދު ވަނީ ރާއްޖެއަށް ކާށި އެތެރެ ކުރަން ޖެހޭ ހިސާބަށް ދަނޑުވެރިކަން ދަށަށް ގޮސްފައިވާތީ ކަންބޮޑުވުން ފާޅުކުރައްވާފައެވެ.

ކަސްޓަމްސް ގެ އަހަރީ އިންޕޯޓް، ތަފާސްހިސާބު ބަލާލިއިރުގައި، ހަމައެކަނި މިދިޔަ އަހަރު ކާށީގެ އުފެއްދުންތައް ރާއްޖެއަށް އެތެރެ ކޮށްފައި 56.7 މިލިއަން ރުފިޔާއަށް. މި އަހަރުގެ މި ފާއިތުވި ތިން މަސްތެރޭގައި 18 ޓަނުގެ ކާށި ރާއްޖެއަށް އެތެރެ ކޮށްފައި. ޓޫނާ ޕްރޮޑަކްޓްސް، ކަނޑުމަހުގެ، އޭގެ އަދި ބައެއް އެއްޗެހި މިއީ.. އިއްޒަތްތެރި ރައީސް، 17 މިލިއަން ރުފިޔާގެ ކަނޑުމަހުގެ ބާވަތްތައް ރާއްޖެ އެތެރެ ކުރާ ކަމަށް ކަސްޓަމްސްގެ ތަފާސްހިސާބުތައް ދައްކާ.

މެންބަރު މުހައްމަދު ވަހީދު

މިއާއެކު ވައްޑެ ވަނީ ދަނޑުވެރިކަމުގެ ދުވަހާއި ގުޅިގެން ބޭއްވުނު އެކި ޖަލްސާތަކުގައި ރައީސުލްޖުމްހޫރިއްޔާ ދައްކަވާފައިވާ ވާހަކަތަކުގައި އަބަދުވެސް ހުރީ ކަންކަން ކުރަންޖެހޭ ކަމަށް ވިދާޅުވެފައި ކަން ފާހަގަކުރައްވައި އެފަދައިން ޖެހޭ، ޖެހޭ ކިޔުއްވި ނަމަވެސް އެއްވެސް ކަމެއް ކުރެއްވި ތަން ނުފެންނަ ކަމަށް ވިދާޅުވެފައެވެ.

ވަހީދު ވިދާޅުވީ، ސަރުކާރުގެ ސްޓްރެޓެޖީ ތަކާއި އެކަން ކަން ތަންފީޒު ކުރުމަށް ކުރާނެ ކަންކަން ލިޔެވިފައި ވީ ނަމަވެސް، މި ވީ ހަތަރު އަހަރާއި ބައި ތެރޭގައިވެސް އެއްވެސް "އެކްޝަން" އެއް ނަގައި އެއްވެސް ކަމެއް ކުރެވިފައި ނުވާ ކަމަށެވެ. އެގޮތުން އަމަލު ކުރުމުގެ ބަދަލުގައި ރައީސް ޞާލިހު ހުންނެވީ  ކެތްތެރިވެވަޑައިގެން ކަމަށާ، ކަންކަން ކުރިއަރުވައި ރަނގަޅު ކުރުމުގެ ބަދަލުގައި އެމަނިކުފާނު އިސްކުރެއްވީ އަޅާނުލުމާއި އިހުމާލު ވުން ކަމަށްވެސް ވައްޑެ ވިދާޅުވި އެވެ.

"ހަތަރު އަހަރާއި ބައި ވިއިރުވެސް ރައީސް ޞާލިހު އިސްކުރެއްވީ ފަރުވާ ކުޑަ ކަމާއި އިހުމާލު ވުން. ދެން މިވާހަކަ ދެއްކީމާ ދެން މިއަދު އަނެއް ބައްދަލުވުން ބާއްވާފައި ފިޔަވަޅު ކަންނޭނގެ އަޅާނީ. އަޅުގަނޑާއި ދޭތެރޭގައި."

މެންބަރު މުހައްމަދު ވަހީދު

މިއާއެކު ވައްޑެ ވަނީ މި ދައުރުގެ ބާކީ އޮތް ކުޑަ ދުވަސްކޮޅުގައި ރައީސް ޞާލިހު ގެ މެނިފެސްޓޯގައިވާ ކަންކަން ތަންފީޒުކުރުމުގެ ކުރުމަށް ގޮވާލާފައެވެ.

"މިވެނި ކަމެއް ކުރަންޖެހެޔޭ، މިވެނި ކަމަކާ ކަންބޮޑުވެޔޭ ކިޔައި ކޮމެންޓްރީ ދޭ އުސޫލުން ވާހަކަ ދެއްކުމުގެ ބަދަލުގައި ދަނޑަށް އަރުއްވައި ކުޅުއްވައިގެން މިކަންކަން ކުރަން އެބަޖެހޭ އުޅުއްވަން. ދެން އަޅުގަނޑުމެންގެ ހިތުގައި ޝައްކެއް ނުހިނގާ، ކުރިއަށް އޮތް ސެޕްޓެމްބަރު މަހުގެ 9 ވަނަ ދުވަހު، ބޮޑު ތަފާތަކުން ރައީސް އިބްރާހިމް މުހައްމަދު ޞާލިހް ބަލިވެވަޑައިގަންނަވާނެ ކަމަށް. އެއީކީ ސުވާލެއް ވެސް އޮތް ކަމެއް ނޫން".

މެންބަރު މުހައްމަދު ވަހީދު

އެހެންކަމުން މިއޮތް ކުރު މުއްދަތުގައި ރައީސް ޞާލިހު ގެ މެނިފެސްޓޯގައިވާ ކަންކަން ތަންފީޒުކުރުމަށް މަސައްކަތް ކުރުމަށް ވައްޑެ ވަނީ ގޮވާލައްވާފައެވެ.