ވޯޓުލާ މީހުން ރެޖިސްޓްރީ ވެފައި އޮންނާނީ އެ މީހެއް ނިސްބަތްވާ ދާއިރާއަށް: އީސީ

ސެޕްޓެމްބަރު މަހުގައި އޮންނަ ރިޔާސީ އިންތިހާބުގައި އެމީހަކު ރެޖިސްޓްރީ ވެފައިވާނީ، ރަށްވެހިވެފައިވާ ދާއިރާ އަށް ކަމަށް  އިލެކްޝަންސް ކޮމިޝަނުން ބުނެފިއެވެ.

އިލެކްޝަންސް ކޮމިޝަން (އީސީ) އިން ސިޔާސީ ޕާޓީތަކާ އެކު މިއަދު ބޭއްވި ގައުމީ ލަފާ ދޭ ކޮމިޓީގެ ބައްދަލުވުމުގައި އީސީގެ ނައިބު ރައީސް އިސްމާއިލް ހަބީބް ވިދާޅުވީ، ވޯޓާސް ލިސްޓާއި ގުޅިގެން ޝަކުވާ ހުށަހެޅުމަށް ހުޅުވާލި ފުރުސަތުގައި ޖުމުލަ 551 ޝަކުވާ ލިބިފައިވާ ކަމަށެވެ. އެގޮތުން ލިބުނު ޝަކުވާ ތަކުގެ ތެރޭގައި؛

1) ނިޔާވެފައިވާ 465 މީހުން ލިސްޓުގައި ހިމެނުން

2) އެޑްރެސް ބަދަލުވެގެން 58 ޝަކުވާ

3) ނަން ބަދަލު ވެގެން 5 ޝަކުވާ

4) ލިސްޓުގައި ނަން ނެތީގެން 20 މީހުންގެ ޝަކުވާ

5) އައިޑީކާޑް ނަންބަރު ބަދަލުވެގެން 1 ޝަކުވާ

6) ދާއިރާ ބަދަލުވެގެން 3 މީހުންގެ ޝަކުވާ

މި ޝަކުވާތައް ހުށަހެޅި ފަރާތްތަކަށް މިހާރު ޖަވާބުދެވުފައިވާނެ ކަމަށާ، އެއާއި ގުޅިގެން އައި ބަދަލުތައް އިއްޔެ ގެޒެޓު ކުރެވިފައިވާ ކަމަށްވެސް ހަބީބު ވިދާޅުވި އެވެ.

މީގެ އިތުރުން ހަބީބު ވިދާޅުވީ، މި ޖުލައި މަހުގެ 16 ވަނަ ދުވަހު އެމީހަކު ރެޖިސްޓްރީ ވެފައިވާ ތަން ނޫން އެހެން ތަނެއްގައި ރި-ރެޖިސްޓާ ވުމުގެ ފުރުސަތު ހުޅުވާލާނެ ކަމަށެވެ.

"ރީ ރެޖިސްޓްރޭޝަން ކޮންމެ 5 އަހަރަކުން 1 އަހަރު އަޅުގަނޑުމެން ޒީރޯ އިން ފަށާނީ. އެހެންވީމާ 2018 ގައި ޒީރޯ އިން ފަށާފައި، އެ ބުރު މި ނިމުނީ 2023 އައި އިރު. ދެން 2023 ގެ ރިޔާސީ އިންތިހާބު އަޅުގަނޑުމެން އަނެއްކާވެސް ސުމަކުން ފަށާތީ، ވޯޓުލާ ކޮންމެ މީހެއްވެސް އޮންނާނީ އެމީހެއްގެ ދާއިމީ އެޑްރެސް ނިސްބަތްވާ ތަނަކަށް ރެޖިސްޓްރީ ވެފައި މިހާރު. ރާއްޖެއިން ބޭރަކު، ރިސޯޓަކު، އެއިން އެއްވެސް ތާކު، މީހަކު ރެޖިސްޓްރީ ވެފައެއް ނޯންނާނެ މިހާރަކު. އެމީހެއްގެ ދާއިމީ އެޑްރެސް އޮންނަ ރަށެއްގައި ރެޖިސްޓްރީ ވެފަ އޮންނާނީ.

އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބު

ހަބީބު އިތުރަށް ވިދާޅުވީ، އެމީހަކު ރަށްވެހިވެފައިވާ ރަށްނޫން އެހެން ތަނެއްގައި ވޯޓުލުމަށް ރީ-ރަޖިސްޓްރޭޝަނަށް ހުޅުވާލާނީ ޖުލައި 16 އިން އޮގަސްޓްމަހުގެ 5 ދުވަހުގެ ނިޔަލަށް ކަމަށެވެ.

އަދި އޮންލައިންކޮށް ރީ-ރަޖިސްޓްރީ ކުރެވޭނީ ޖުލައި 16 އިން ޖުލައި 29 ގެ ނިޔަލަށް ކަމަށާ، ޖުލައި 30 އިން އޮގަސްޓު 5 އަށް ރީ-ރަޖިސްޓްރީ ކުރެވޭނީ ފޯމުން އެކަނި ކަމަށްވެސް ވިދާޅުވި އެވެ.

2023 ސެޕްޓެމްބަރ 9 އަށް 18 އަހަރު ފުރޭ، 138317 އަންހެނުންނާއި، 144355 ފިރިހެންނާއެކު ޖުމްލަ 282672 މީހުންނަށް ވޯޓުދިނުމުގެ ޙައްޤު ލިބިފައިވާ ކަމަށް އިލެކްޝަންސް ކޮމިޝަނުން އެންމެ ފަހުން ނެރުނު ލިސްޓުގައި ވެއެވެ.