ރީ ރެޖިސްޓަރ ވުމަށް މިމަހު 16ގައި ހުޅުވާލާނެ: އީސީ
ކުރިއަށް އޮތް ރިޔާސީ އިންތިޚާބުގައި ރީ ރެޖިސްޓަރ ވުމަށް މިމަހު 16 ގައި ހުޅުވާލާނެ ކަމަށް އިލެކްޝަންސް ކޮމިޝަނުން ބުނެފިއެވެ.
އީސީގެ ފަރާތުން މިކަން ހާމަކޮށްފައިވަނީ އީސީ އިން ސިޔާސީ ޕާޓީތަކާ އެކު މިއަދު ބޭއްވި ޤައުމީ ލަފާ ދޭ ކޮމިޓީގެ ބައްދަލުވުމުގައި ވާހަކަ ދައްކަވަމުން އީސީގެ ނައިބު ރައީސް އިސްމާއިލް ޙަބީބެވެ.
ޙަބީބު ވިދާޅުވީ ރީ ރަޖިސްޓްރީކުރަން 21 ދުވަހުގެ މުއްދަތެއް ލިބޭނެ ކަމަށާއި އެ މީހަކު ހުރި ތަނަކުން އޮންލައިންކޮށް ފޯމު ހުށައަޅައިގެން ވެސް ރީ ރެޖިސްޓަރ ވެވޭނެކަމަށެވެ.
"ވޯޓުލާ ކޮންމެ މީހަކުވެސް އޮންނާނީ އެމީހެއްގެ ދާއިމީ އެޑްރެސް ނިސްބަތްވާ ތަނަކަށް ރަޖިސްޓަރ ވެފަ މިހާރު، ރާއްޖެއިން ބޭރަކު ރިސޯޓަކު އެއިން އެއްވެސް ތާކު ރެޖިސްޓަރ ވެފައެއް ނޯންނާނެ މިހާރަކު، އެމީހާގެ ދާއިމީ އެޑްރެސް އޮންނަ ރަށެއްގަ އެމީހާ ރެޖިސްޓަރ ވެފަ އޮންނާނީ، އެހެންވީމަ 16 ޖުލައި އިން 25 އޮގަސްޓަށް ރީ ރެޖިސްޓަރ ވުމަށް 21 ދުވަސް ހުޅުވާލާނީ" ޙަބީބުގެ ވާހަކައިގައި ވިދާޅުވިއެވެ.
ރިޔާސީ އިންތިޚާބުގައި ވޯޓުލުމުގެ ޙައްޤު ލިބިފައިވާ މީހުންގެ ދާއިމީ ވޯޓަރސް ލިސްޓަށް ހުށައެޅި 551 ޝަކުވާ އިސްލާހު ކުރުމަށްފަހު އެލިސްޓު މިހާރުވަނީ ގެޒެޓްކޮށްފައެވެ.
ވޯޓާސް ލިސްޓަށް ހުށަހެޅި ޝަކުވާތަކުގެ ތެރެއިން 465 ޝަކުވާއަކީ މަރުތަކާ ގުޅިފައިވާ ޝަކުވާއެވެ. އަދި ދާއިމީ އެޑްރެސް ބަދަލުވެގެން 58 ޝަކުވާ ލިބުނުއިރު ލިސްޓުގައި ނަން ނެތިގެން ހުށަހަޅާފައިވަނީ 19 ޝަކުވާއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
