އިހަވަންދޫ، ޗާލު ކޮމިޔުނިޓީ ސެންޓަރުގެ ފޮޓޯތައް ދައްކާލައިފި؛ މަހްލޫފް ވިދާޅުވީ އެއީ ކުރެހުމެއް ނޫން ކަމަށް!
މިސަރުކާރުން ރާއްޖޭގެ އެކި ކަންކޮޅުތަކުގައި ތަރައްގީ ކުރަމުންގެންދާ ޒަމާނީ ކޮމިއުނިޓީ ސެންޓަރުތަކުގެ ތެރެއިން ހއ. އިހަވަންދޫގައި ގާއިމްކުރެވޭ މަރުކަޒުގެ ޗާލު ފޮޓޯތައް، ޔޫތު މިނިސްޓަރު އަހުމަދު މަހުލޫފް ދައްކާލައިފިއެވެ.
އިހަވަންދޫ ކޮމިޔުނިޓީ ސެންޓަރުގެ ފޮޓޯތައް ހިއްސާ ކުރައްވައި މަހްލޫފް ކުރެއްވި ޓުވީޓުގައި ވިދާޅުވީ އެއީ، ތަނެއްގެ ކުރެހުމެއް ނޫން ކަމަށެވެ. އެހެނެއް ކަމަކު، އެއީ ރައީސް އިބްރާހިމް މުހައްމަދު ޞާލިހު ރާއްޖޭގެ އެކި ކަންކޮޅުތަކުގައި ތަރައްގީ ކުރައްވަމުންގެންދަވާ ޒަމާނީ ކޮމިއުނިޓީ ސެންޓަރުތަކުގެ ތެރެއިން ހއ. އިހަވަންދޫގައި ގާއިމްކުރެވޭ މަރުކަޒު ކަމަށެވެ. އަދި އެތަނުގެ މަސައްކަތްނިމި ހުޅުވުމާއި ގާތްވެފައިވާ ކަންވެސް މަހްލޫފް ފާހަގަ ކުރެއްވި އެވެ.
"މިމަރުކަޒުތަކުގައި ކުޅިވަރު ކުޅުމުގެ އިތުރުން، ޖަމުއިއްޔާތަކަށް މަސައްކަތްކުރެވޭނެ އިންތިޒާމް ހަމަޖެހޭނެއެވެ. އަދި އިތުރު ގިނަ ލުއިފަސޭހަތަކެއް ލިބިގެންދާނެއެވެ." މަހްލޫފް ވިދާޅުވި އެވެ.
ސާދާ، ބަލާލަން ރީތި، ދޯންޏަކާއި ވައްތަރު ގޮތެއްވެސް ފެންނަ ފެނުމުން ސިފަވާ އިހަވަންދޫގެ އެ ކޮމިޔުނިޓީ ސެންޓަރުގައި ހުރީ، ފެއްސާއި، ގަދަ މުށި އަދި ހުދު ކުލައެވެ.
މަހްލޫފް އިތުރަށް ވިދާޅުވީ، ރާއްޖޭގެ އެކި ކަންކޮޅުތަކުގައި 31 ކޮމިއުނިޓީ ސެންޓަރު ތަރައްގީކުރުމުގެ މަސައްކަތް ކުރިއަށްދާ ކަމަށެވެ.
މަހްލޫފް މިފަދަ ޓުވީޓެއް ކުރައްވާފައި މިވަނީ މި ސަރުކާރުން އަޅާނެ ކަމަށް ވައުދުވި ގަލޮޅު ދަނޑާއި، އެހެންވެސް ދަނޑުތަކުގެ މަސައްކަތް ނުނިމި ދައުރު ނިމެން ކައިރިވެފައިވާތީ, ގިނަ ބައެއްގެ ފާޑުކިޔުންތައް ސަރުކާރަށާއި، ޔޫތު މިނިސްޓްރީއަށް އަމާޒުވަމުން އަންނަ ދަނޑިވަޅެއްގައި ކަން ފާހަގަކޮށްލަންޖެހެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
