މަހިބަދޫ މުދާ އުފުލާ ދޯނި އެއްކޮށް އަޑިއަށް ގޮސްފި!

މާލެއިން ފުރައިގެން އދ.މަހިބަދޫއަށް ދަތުރުކުރަމުންދިޔަ މުދާ އުފުލާ ބޯޓު، އެއްކޮށް އަޑިއަށްގޮސްފައިވާ ކަަމަށް ފުލުހުން ބުނެފިއެވެ.

ފުލުހުންގެ މީޑިއާ އޮފިޝަލް ވިދާޅުވީ، މާލެއިން ފުރައިގެން މަހިބަދޫ އަށް ދަތުރު ކުރަމުންދިޔަ، ރިކާޑޯ ނަމަކަށް ކިޔާ މުދާ އުފުލާ ބޯޓު, އަލިހުރަސް ކަނޑުން އަޑިއަށްދާ ކަމަށް މިރޭ މައުލޫމާތު ލިބުމާއި ގުޅިގެން، މަހިބަދޫ ފުލުހުންގެ ލޯންޗު އެ ސަރަހައްދަށް ގޮސް، ދޯނީގައި ތިބި 8 ފަޅުވެރިން ފުލުހުންގެ ލޯންޗަށް ނަގާފައިވާ ކަމަށެވެ.

އަދި އެމީހުން ފުލުހުންގެ ލޯންޗުގައި މަހިބަދޫ އަށް ގެންގޮސްފައިވާ ކަމަށާ ފަޅުވެރިންގެ ހާލު ރަނގަޅު ކަމަށް މީޑިއާ އޮފިޝަލް ވިދާޅުވި އެވެ.

މިއާއެކު މީޑިއާ އޮފިޝަލް ވިދާޅުވީ އެ ދޯނި އެއްކޮށް އަޑިއަށް ގޮސްފައިވާ ކަމަށެވެ.

މައުލޫމާތު ލިބިފައިވާ ގޮތުގައި ފުލުހުންނާއި މަހިބަދޫ ދޯންޏަށް އެ ސަރަހައްދަށް ދެވުނު އިރުވެސް ދޯނި ވަނީ އެއްކޮށް އަޑިއަށް ގޮސްފަ އެވެ. އަދި ދޯނީގެ ފަޅުވެރިން ގާތްގަނޑަކަށް ގަޑިއެއްހާއިރު ވަންދެން ކަނޑުގައި ތިބެން ޖެހުނު ކަމަށްވެސް އެރަށުން ވޮއިސް އަށް މައުލޫމާތު ދިން ފަރާތެއް ބުނެފައިވެއެވެ.

އެ ދޯންޏަކީ އެ ރަށު ވިޔަފާރި ތަކުގެ މުދާ އުފުލާ ބޯޓަކަށް ވާއިރު، ދޯނި އަޑިއަށް ގޮސްފައިވަނީ މުދާ ތަކާއިވެސް އެކުގައި ކަމަށް މައުލޫމާތު ލިބެއެވެ.