ރައީސް ޔާމިން ޖަލުގައި އޮތުމަކީ ރުހޭ ކަމެއް ނޫން، އެމަނިކުފާނަކީ އެތައް ޚިދުމަތެއް ކުރެއްވި ބޭފުޅެއް: ނަޝީދު

އިދިކޮޅު ޕްރޮގްރެސިވް ކޮންގުރެސް ކޯލިޝަނުގެ ލީޑަރު އަދި ރިޔާސީ ކެނޑިޑޭޓު ރައީސް ޢަބްދުﷲ ޔާމީން ޢަބްދުލްޤައްޔޫމު ޖަލުގައި އޮތުމަކީ އެއްވެސް އިރެއްގައި ރުހުނު ކަމެއް ނޫން ކަމަށާއި، އެމަނިކުފާނަކީ އެތައް ޚިދުމަތްތަކެއް ކޮށްދެއްވި ބޭފުޅެއް ކަމަށް ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ނަޝީދު މިހެން ވިދާޅުވެފައިވަނީ 'ދަ ޑިމޮކްރެޓްސް' އުފެއްދުމަށް މިރޭ ޢިޔާސުއްދީން ސްކޫލުގައި ބޭއްވުނު ރަސްމިއްޔާތުގައި ވާހަކަފުޅު ދައްކަވަމުންނެވެ.

އެގޮތުން ނަޝީދު ވިދާޅުވީ ޚިޔާލު ހޯދުމުގެ ވޯޓުތަކުން ރައްޔިތުންގެ ގިނަ މީހުން ގޮތެއް ނުނިންމާ ތިބި ކަމަށް ދައްކާ ކަމަށެވެ.

"ރައީސް އިބްރާހީމް މުޙައްމަދު ޞާލިޙަށް ލިބިވަޑައިގަންނަވަނީ 15 ޕަސެންޓް އޭ. އަޅުގަނޑަށް ލިބެނީ 6 ޕަސެންޓް އޭ. ރައީސް ޔާމީނަށް ލިބިވަޑައިގަންނަވަނީ 18 ޕަސެންޓް އޭ. ރާއްޖޭގެ 55 ޕަސެންޓް ގެ ރައްޔިތުން ތިބީ ގޮތެއް ނުނިންމައޭ." ނަޝީދު ވިދާޅުވިއެވެ.

މިއާއިއެކު ރައްޔިތުން ގޮތެއް ނުނިންމާ އެތިބެނީ ރައީސުލްޖުމްހޫރިއްޔާ އިބްރާޙިމް މުހައްމަދު ޞާލިހު ދެވަނަ ދައުރެއްގެ ވާހަކަފުޅު ދައްކާވާއިރުކަން އެމަނިކުފާނަށް އިނގިވަޑައިންނަވާނެ ކަމަށް ނަޝީދު ފާހަގަކުރެއްވިއެވެ.

އަދި ރައީސް ޔާމީނު ޖަލުގައި ހުންނެވި ނަމަވެސް އެމަނިކުފާނަށް 18 އިންސައްތަ ވޯޓު ލިބިވަޑައިގަންނަވާ ކަމަށް ނަޝީދު ފާހަގަކުރެއްވިއެވެ.

"އެއްވެސް އިރެއްގައި ރުހުނު ކަމެއްނޫން އެއްވެސް މީހަކު ޖަލުގައި އޮތުން އެއީ. ރައީސް ޔާމީނަކީ މިދިޔަ ފަސް އަހަރު ރާއްޖޭގެ ރައީސްކަން ކުރެއްވުމުގެ އިތުރުން ރައްޔިތުންގެ މަޖިލީހުގެ މެންބަރުކަމާއި، ދައުލަތުގެ ވަޒީރުކަމާއި، މައްޗަންގޯޅީގެ ވެރިކަމާއި، މިހެން މިހެން ގޮސް އެތައް ޚިދުމަތްތަކެއް ކުރައްވާފައިވާ ބޭފުޅެއް." ނަޝީދު ވިދާޅުވިއެވެ.

މިއާއިއެކު ނަޝީދުގެ ވާހަކަފުޅު ނިންމާލައްވަމުން ވަނީ މި ރިޔާސީ އިންތިޚާބުގައި އެމަނިކުފާނާއި ރައީސް ޔާމީން ކުރިމަތިނުލައްވައި ދެމީހުންއެކުގައި ބާރަށް މަސައްކަތް ކޮށްގެން ރާއްޖޭގެ ރައްޔިތުން އެދޭ ގޮތް ހޯދައިދޭން މަސައްކަތް ކުރުމަށް ގޮވާލައްވާފައެވެ.