ސަރުކާރުން މަސައްކަތްކުރަނީ ދިމަދިމާލުގައި ހުރި ފައިސާ 2023އަށް އެއްކުރަން: ޝިޔާމު

ރައީސް އިބްރާހިމް މުހައްމަދު ސޯލިހުގެ ސަރުކާރުން މިހާރު މަސައްކަތްކުރަމުންދަނީ އެކި ދިމަދިމާލުގައި ހުރި ފައިސާ ކުރިއަށް އޮތް ރިޔާސީ އިންތިޚާބު އަންނަންވާއިރަށް އެއްކުރުމަށްކަމަށް މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެއެވެ.

ދައުލަތުގެ އާމްދަނީއަށް ބޮޑު ގެއްލުމެއް ލިބޭގޮތަށް ރައީސް ސޯލިހު ތަސްދީގުކުރެއްވި ތްއަރިޒަމާއި ބެހޭ ގާނޫނަށް އަލުން އިސްލާގެނައުމަށް މަޖިލީހަށް ހުށައަޅާފައިވާއިރު، އެ ބިލަށް ބަހުސްކުރައްވަމުން ޝިޔާމު ވިދާޅުވީ އެއީ ކަނޑައެޅިގެން ސަރުކާރުން ކޮރަޕްޝަން ހިންގުމަށް ކުރިކަމެއްކަމަށެވެ.

އޮޅިގެންކަމަށް ވިދާޅުވެ، ރައީސުލްޖުމްހޫރިއްޔާ ޓުއަރިޒަމާއި ބެހޭ ގާނޫނަށް މަޖިލީހުން ގެނައި އިސްލާހު ފާސްކުރުމާއި ގުޅިގެން ދައުލަތަށް 600 މިލިއަން ރުފިޔާގެ ގެއްލުންވެފައިވާކަމަށެވެ.

"މީ ހަމަ ސީދާ ވައްކަންކުރަން ގެނައި އިސްލާހެއް ފުރަތަމަ. ެކަމަކު މިހާރު މީގަ ބޮލަށް އަރައިފި. ވެހިރާއްޖޭގައި ތިބި ބައެއްކަހަލަ ލޯފާމްތަކާއި، މީރާއިންވެސް މިކަމުގެ ވާހަކަދައްކާތީ އަނެއްކާ މީތި ރަނގަޅު ކޮށްލަން މި ގެނައީ. 600 މިލިއަން ރުފިޔާގެ ގެއްލުން ވެއްޖެ" ޝިޔާމު ވިދާޅުވިއެވެ.

އޭގެ އިތުރުން އަމީނީ މަގު ހެދުމުގެ މަސައްކަތް ސިޓީކައުންސިލްގެ އަތުން އަތުލާ، ޕްލޭނިން މިނިސްޓްރީއިން އާރުޑީސީއަށް ދީފައިވަނީވެސް ކޮރަޕްޝަންއަށް ދައުލަތަށް ބޮޑު ގެއްލުމެއްވާގޮތަށްކަމަށް ޝިޔާމު ވިދާޅުވިއެވެ. އަދި އެ މަސައްކަތަކީ ކަނޑައެޅިގެން ކޮރަޕްޝަންގެ ތެރެއިން ހިންގާ މަޝްރޫއެއްކަމަށް ޝިޔާމު ވިދާޅުވިއެވެ.

"އަމީނީ މަގު ހަދަން މާލޭ ސިޓީކައުންސިލުން 37 މިލިއަން ރުފިޔާއަށް ދިނީފައި ގޯސްވެއްޖެ ސަރުކާރަށް، ގޯސްވެގެން އެ އެގްރިމަންޓު ތާމިނޭޓު ކުރުވައިފި. ދެން ޕްލޭނިން މިނިސްޓްރީއިން މި ހަވާލުކުރީ އާރުޑީސީއަށް ކިހާވަރަކަށްތޯ؟ 84 މިލިއަން ރުފިޔާއަށް. އަޅުގަނޑު ހިތަށް އަރާ ރަނުންބާއޭ މަގު ދަމާލަނީ؟" ސައީދު ވިދާޅުވިއެވެ.

އެކަންކަން ފާހަގަކުރައްވާ ޝިޔާމު ވިދާޅުވީ ސަރުކާރުން ވައްކަން ކުރުމުގައި ހައްދުން ނައްޓާފައިވާއިރު، ދައުލަތުގެ މާލިއްޔާއިން ވައްކަންކޮށް، ސަރުކާރު ކުންފުނިތައް މެދުވެރިކޮށް ކޮރަޕްޝަން ހިންގަނީ އެކި ދިމަދިމާލުގައި ހުރި ފައިސާ 2023 ގެ ރިޔާސީ އިންތިޚާބަށް އެއްކުރުމަށްކަމަށެވެ.

"ދިމަދިމާލުގައި ހުރި ފައިސާ 2023ގެ ރިޔާސީ އިންތިޚާބަށް ބޭނުންކުރަން މަސައްކަތް މިކުރަނީ" ޝިޔާމު ވިދާޅުވިއެވެ.

ޝިޔާމުގެ ވާހަކައިގައިވަނީ ރައީސް ސޯލިހު ދައުލަތުގެ މާލިއްޔާއަށް ބޮޑެތި ޚިޔާނާތް ވެފައިވާކަން ފާހަގަކުރައްވާފައެވެ.

އެގޮތުން ވެރިކަމަށް ވަޑައިގެން ސެޓަލްމަންޓު ކޮމެޓީއެއް ހައްދަވާ ގާތް މީހުން މިލިއަނުން ފައިސާ ބަހާފައިވާއިރު، އެކަމަކީ ގޯހުން ހިނގާފައިވާކަމެއްކަން މިހާރު އެމްޑީޕީއިން ގަބޫލުކުރާކަމަށް އޭނާ ވިދާޅުވިއެވެ. އޭގެ އިތުރުން 2019 ވަނަ އަހަރު އޮތް މަޖިލިސް އިންތިޚާބުގައިވެސް ރައީސް ސޯލިހު ދައުލަތުގެ މުދާ ނަހަމަގޮތުގައި ބޭނުންކޮށްފައިވާކަމަށް އޭނާ ވިދާޅުވިއެވެ.

އެކަންކަން ފާހަގަކުރައްވާ ޝިޔާމު އިތުރަށް ވިދާޅުވީ، ސަރުކާރުން ކުރާ ވައްކަންތައް ބެލުމުގެ ޒިންމާ މަޖިލީހުގެ ކޮނޑުގައިވެސް އެޅިފައިވާކަމަށެވެ. އެމްޑީޕީ ސުޕަރ މެޖޯރިޓީ މަޖިލީހުގައި އޮވެ، ސަރުކާރުގެ ވައްކަންތައް ނުހުއްޓުވޭނަމަ، ނުވަތަ އެކަމަށް ސަރުކާރު ޒިންމާދާރު ނުކުރެވޭނެ އެކަމުގެ ފުރިހަމަ ޒިންމާ މަޖިލީހުގެ ރިޔާސަތުން ނަންގަންވަން ޖެހޭކަމަށެވެ.