ގާސިމަކީ މި ގައުމަށް ލިބުނު ރަން މުތެއް ކަހަލަ ބޭފުޅެއް: ޢަލީ ވަހީދު
ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމް އަކީ ދިވެހިރާއްޖެއަށް ލިބުނު ރަންމުތެއް ފަދަ ބޭފުޅެއް ކަމަށް، އެމަނިކުފާނުގެ އިންތިޚާބީ އޭޖެންޓް، އަދި ކުރީގެ ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
ރިޔާސީ އިންތިހާބުގެ ކެމްޕެއިނަށް ފުވައްމުލަކަށް ވަޑައިގެން އެރަށު ރައްޔިތުންނާ ބައްދަލު ކުރައްވާ ވާހަކަ ދައްކަވަމުން ޢަލީ ވަހީދު ވިދާޅުވީ، ކުރިއަށް އޮތް ރިޔާސީ އިންތިހާބުގައި ޖުމުލަ 8 ކެންޑިޑޭޓުން ބައިވެރިވާއިރު، އެ ބޭފުޅުންނަކީ ކޮންބައެއްކަން އެނގެންޖެހޭ ކަމަށެވެ. އަދި އެ ބޭފުޅުން ގައުމަށާއި ދިވެހި ރައްޔިތުންނަށް ކޮށްދިން ކަންކަމަކީ ކޮބައިތޯވެސް ސުވާލު ކުރަން ޖެހޭ ކަމަށް އޭނާ ވިދާޅުވި އެވެ.
އަޅުގަނޑުމެން ސުވާކު ކުރަންވީ 8 ނަމާއި ދޭތެރޭ. ކާކަށްހޭ ވޯޓު ލަންވީ. ކީއްވެގެންހޭ. އެ ސުވާލުގެ ޖަވާބު ތި ބޭފުޅުންނަށް އެނގިވަޑައިގަންނަވާނެ. މިގައުމަށް މިދިޔަ 73 އަހަރު، ލިބުނު ރަންމުތެއް ކަހަލަ، ނަސީބެއް ކަހަލަ ކެންޑިޑޭޓެއް ގާސިމް އިބްރާހިމް އަކީ.
ޢަލީ ވަހީދު
ގާސިމަކީ ރަންމުތެއް ކަހަލަ ބޭފުޅެއްގެ ގޮތަށް ސިފަ ކުރެއްވި ސަބަބު ހާމަކުރައްވައި ޢަލީ ވަހީދު ވިދާޅުވީ، މީހަކު ބަލިވެގެން އެމަނިކުފާނުގެ އަރިހަށް، އެހީއަށް އެދި މީހަކު އައިސްފި ނަމަ، ދުވަހަކުވެސް ނޫނެކޭ ވިދާޅުނުވާ ކަމަށެވެ. އަދި އެ އެހީވެދިން މީހުންނަށް އެހީވެވަޑައިގެންފައި ވަނީ ރައީސުލްޖުމްހޫރިއްޔާ ކަމުގެ މަގާމުގައި ހުންނަވައިގެން ނޫން ކަމަށާ، އެއީ އެއްވެސް ސަބަބަކާއި ނުލައި އެމަނިކުފާނު ކުރެއްވި ކަމެއް ކަމަށް ޢަލީ ވިދާޅުވި އެވެ.
އެހެންކަމުން މި ގައުމަށް މިހާރު ބޭނުންވަނީ، ގާސިމް ފަދަ ބޭފުޅެއް ކަމަށް ޢަލީ ވަހީދު ވިދާޅުވި އެވެ. އެހެނީ އެމަނިކުފާނަކީ ކީރިތި ގުރުއާނާއި، ކީރިތި ރަސޫލާ ޞައްލައްالله ޢަލައިހި ވަސައްލަމް ގެ ސުންނަތާއި އަދި ގާނޫނު އަސާސީގެ ތެރެއިން ވެރިކަން ކުރާނެ ވެރިއެއް ކަމަށްވެސް ޢަލީ ވަހީދު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
